¹ O fuonu Farishin ko Sadiusihin diho Yesu laba inyi o jir ba i tii kitotorita to Kai. ² I fotu inyi o jo, ko lo lotu kurou, i jo ite o fila ca kov tona lo do kai. ³ Kiwanyi i jo, o cia ca kuju ko kiyoma o kuta tona lo do kai, i dis manyu. I yen ite kobo ki bebelo lo kai i da hati i yen kobo lo ki bebelo lo faritin. ⁴ Kofiang kuna i rohori ko kulo lomuna i tifiati kitotori kulo tangu, oto o ru ca lobo li cori icieng mayak kitotori lo Jona. Yesu ko ngerihino icieng ko lotita.

⁵ O jo icieng o fuo tode lo nam, o luluhi kalihitak yoruno ibune ⁶ Ojo Yesu diho icieng, "Ito geny I ririati kenite iyo ibula kulo Farisihin ko Sadiusihin

⁷ I gugumo icieng ene tenya to kiji lecieng o jo a ra tona li da ohoi ki yaunore ibune.

⁸ To yenun lo kigugumo lecieng, i tifi Yesu icieng o jo, "Ite kula lo sidi kiruk! nyio i risa ite to kiji lingi, tenya lo rujon lo ibune? ⁹ Orije ite i da li niang? I da ite i buhu kulafa ibuneha miet la fitare nan cio alif miet, ko aduhuhin baya afa iti futahi otonge? ¹⁰ Kode kulafa mietare to cio alif ongon ko aduhuhin baya afa iti futahi ite otonge? ¹¹ Aja hati i lunya ite jimitan i da nan a tenya diho ite tenya lo ibune? Oto i ririati kenite diho ibula kulo Farisihin ko Sadiusihin." ¹² Icieng ko ki niang jimitan i da inyi o jo o jir icieng i riria kenite iyo ibula kuna lo yerarehin oto to ibula kulo kiti yena lo Farisihin ko Sadiusihin.

¹³ Ojo Yesu o lotu kov lo Kesaria Pilipi, I tifi kalihitak kulenge o jo, "Ojo re cio kito lo tungani ngai?"

¹⁴ I nyahahi icieng ojo, "Ojo kude Jon Kabatisani, kude o jo Elia, o rihe manyu kude ojo Jeremia kode lobito to kiji lo kamocak."

¹⁵ Oto i tifi icieng ojo, "Adi ite, i jo ite nan ngai?

¹⁶ I fotu Saimon Pita o jo, "Isi Kristo, Kito lo Lobanga la i wuar."

¹⁷ Inyahahi Yesu o jo, "Ingön isi ko gum Saimon, kito lo Jona tonyio i da a ra tungani lohi totorohi isi ene tenya oto Apa lei la lo ngön Kai" ¹⁸ Ahi rihohi isi manyu a jo, ira isi Pita. Manyu Kai lo ene tabak a fahahi ca nan kanisa lei, i da manyu ca lokolihin kulo weun o tum o lanyu inyi. ¹⁹ Ahi corahi ca nan isi kingajiti kulo Okabue lo Kai, tohi na li tor isi to kov, o tori manyu to kai, ko tohi na li lak isi to kov, o lahi manyu to Kai. ²⁰ ko cihahino icieng jimitan o jir i da o rihohini lobo tungani o jo a ra inyi Kristo.

²¹ Ki caha to na iya ketemoni i cak Yesu ki titima diho kalihitak kulenge o jo o jir inyi a lö Jerusalem rumuno kidak na hitok to kac kulo lohituaha, kaduarak kula hitoha ko katiyenak kulo cik, manyu o jir i fadari inyi oto o waru to far lo uni.

²² Orihe Pita inyi kalele ko ki caha ciha inyi o jo, "I da Lahitok, i da ca ene tohi i tiihino diho isi."

²³ I belo Yesu ko rihohino Pita o jo, "To yite kifuongi nei Sitan! I ra isi katihoni lo ketemoni lei. I da isi i ngön ko kibuha lo sangite kulo Lobanga oto kulo cio." ²⁴ Yesu ko jimitan diho jayona kulenge, ko lo wak tungani lotuno omot lei, o jir o beru ken lenge ake ake o ting hati keteiriwa ki jiv nan ²⁵ Tonyo, tungani la lo wak rica warun lenge i tiri mute oto tungani la li tiri warun lenge to nan, o rumahi mute. ²⁶ O luak tungani to nyio ko rumu ene kov pili oto hati okorif lenge o ri? Kode nyio ngi cio tungani o tobore Okorif lenge? ²⁷ Tonyio o lotuno mute kito lo tungani ko kimedek lo Monye ko malaikahin kulenge ko duma hati tungani lobito lobito iya li tiyore inyi. ²⁸ Ahi rihohi ite tenya lo dede, i da mute ca kude kuna lo woitati ene i mangi wei o rihe i da lo deuni kito lo tungani i genuno diho Okabue lenge."