¹ La ngun lo keru Yesu tenya kuno tenyitenyi ko ngerihino Galile ko loro kov lo Judea tode lo Jodan. ² Oto ilulung i jifuno inyi, inyi hati ko kiti furioro muaita kunecieng to inya.

³ Kude Parisihin ko fuonuno laba inyi to ki tifia o jo, "I ruk cik tunes jaha ngoruani nenge to kude tenyitenyi keken?

⁴ Yesu ko ki nyahahino icieng o jo, i da ite li ken o jo to kiteri i kukum kaduhoni icieng retoni ko ngoruani? ⁵ Oto o jo, to ene tenya o ngerihi ca retoni monye ko ngotenge ko ki morati ko ngoruani nenge a rahare are ken lobito? ⁶ Jimitan li da icieng o rihe a rahiti are oto lobito. Tona, tohi na li morahi Lobanga ke co tungani o kor.

⁷ icieng ko ki tifia o jo, nyo hati afa Moses o cik o jo, o jir tungani i co ngoruani nenge waraga lo jaha i fuharore hati inyi?

⁸ I nyahahi Yesu o jo, I ruk afa Moses ite jaha ngoruo kuningi to na golun lo taulo kuningi. Oto i da hati afa o ngön ji to kiteri. ⁹ Ahi rihohi ite a jo, tungani na lo jak ngoruani nenge mayak to rujon lo kue oto o yem lobo ake, Li tii lomuna".

¹⁰ O jo kalihitak diho inyi, ka lo ri tenya ji kiji lo retoni ko ngoruani oto o yak ki tongo i da kileng i yema.

¹¹ Inyahahi Yesu icieng o jo, i da cio fad i ruk ene tenya oto o ngön to cio kuna li cori. ¹² Ongöni cio kuna lo gelemoro many to tomonuno, kude a ra cio lo gelem oto o beru kude yema to tenya lo okabue lo kai. Tungani na li ruk ki tongo ji i ngohi i ruk".

¹³ Oto i yauni tee kula sidiha diho Yesu o jo o jir inyi otir ko kilivahino icieng. Oto kalihitak ko ki rienga kayaunok kunecieng. ¹⁴ Yesu ko jimitan, ingohi tee kula sidiha to fuonu diho nan ke tihoto icieng, tonyo, a ra okabue lo kai necieng kula lo ri ko kulo. ¹⁵ Ojo lo keru fiha kana nenge kenite kunecieng, ko loro to inya iya ketemoni.

¹⁶ Oto o lotu lokilahaji diho Yesu ko ki tifia inyi o jo, "Katiyenani, nyo tohi na i jir na nga tii nan o jir a rumunorre warun na lo sio?

¹⁷ Inyahahi Yesu inyi o jo, nyo i tifia isi nan to tohi nan i jir? O ngön tungani na i jir lobito keken. Ka li wak rutorro warun i tifia cihicihi.

¹⁸ I tifi o jo, ani? I nyahahi Yesu o jo, ke fade, ke yiau, ke koko, ke gulihi ¹⁹ To bang munyi ko ngutingi, i maru manyu loriehat nino.

²⁰ Ojo na lokilahaji, kuna fad la ric nan. Nyio lo rihe o ngoromahino diho nan?

²¹ Oitohi Yesu ojo, ka li wak isi biran, i lö iti lote sangite kunino fad i corahi kakidahak oto ca isi i ngönore bara kai, i lotu hati i jif nan. ²² Ojo na lokilahaji ji, ko itoro to mejun lo tau, tonyo, obara inyi bebe.

²³ Yesu ko jimitan iyo kalihitak kunenge, ahi rihohi nan ite tenya lo dede, o gol iyo kabarani rutoro okabue lo kai. ²⁴ Ahi rihohi ite ari, o tanga iyo lonaga rutorro to konyek lo libira i lany kabarani rutorro okabue lo Lobanga".

²⁵ Ojo kalihitak o ning na tenya ko ki panyiti noo ko ki tifiati jimitan, ngai ha ba lo tum luaharu?

²⁶ Oto Yesu o de icieng ko jimitan, iyo cio i da ene otumuno ojo iyo Lobanga, otumuno sangite pili.

²⁷ I tifi Pita inyi o jo, lohi ngohi ohoi sangite ki jif omot nino. Nyio mute ba lo ngön to ohoi?

²⁸ Ojo Yesu diho icieng, ahi rihohi tenya lo dede, to kiti ngejuho lo sangite fad ka li tongo kito lo tungani iyo seger lo okabue nenge, ite kulo lohi jif nan manyu mute i tongo iyo segeri tomon ko are lo ngoto lo tenya iyo imaniti tomon ko are kulo Israel. ²⁹ Ko cio kula lo ngerihi kajihit, recerra, kanecera, monyeri, ngoruo, tee, ko manatak to nan, o rumuni mute kakeny mia lobito lo sangite fad o lunyohini manyu mute warun na lo sio. ³⁰ Ato becek kuna la rahiti ketemok, a rahiti mute kulo kifuongi. Becek manyu kula la rahiti kulo kifuongi manyu mute a rahiti ketemok.