¹ Inyi na far bito o rute Yesu to kaji o lö ki tongo kutuk lo nam. ² Na ha o fuonu ilulung kula i borengi diho inyi. Inyi ko ki ruoho tigol i tongohino katua, cio fad ko woita tode lo nam. ³ Inyi ko foro tenyitenyi becek to kitisirani ojo, O lö afa karemoni yaa kinyemo kunenge. ⁴ Ojo o yaa ji, odohi kinyemo kude kikoi i nunume kwenyi kulo kai. ⁵ Odohi kude morutore, faji na li da kov o bolo ⁶ Ojo kolong onok, ko curaru kabujak i norari. tonyio, oru kerda, i da ogur kov. ⁷ Kinyemo kude o dohi kikware, i tik kikwa icieng bolorun ⁸ oto kude o dohi diho kov na i jir, o fuonu o ngiju kude kakeny mia. Kude kakeny mia, kude kakeny keek ile, ko kude kakeny keek uni lo kulafa lo yiihini ⁹ La ngön kiyok i ngohi to ning.

¹⁰ Ofuonu kalihitak kulenge ko ki tifia inyi o jimi, nyio iti yena isi cio to kitisirani.

¹¹ Inyahahi inyi icieng o jo, genyun lo tenyitenyi kuna li duha diho okabue lo kai, ki cori diho ite. I da a ra diho icieng. ¹² Tungani la lo tehita, o sodohini o jir o tek o raban. La li da o tehita, kileng na sidi na lo ngönore inyi, o rujori. ¹³ Inyi li co nan a foro to kitisirani. O jir "Kileng ngo deyati i da o deuni; kileng ngo ningoti i da o ninguni Kode i gigiluni"

¹⁴ Iti fut diho icieng kimoca lo Aisaya lafa lo jo, I ningo ca ite i da kileng i niang. I deya ca ite i da kileng i da heru. ¹⁶ Oto o ngön gum diho konyeha kulingi, tonyio, i deya ite. Ko kiyoha kulingi, tonyio, i ningo ite. ¹⁷ Inyina ahi rihohi nan ite tenya lo dede, o kodomo afa kamocak kula i borengi ko cio kula i nyuji deya tohi na li deya ite, i da hati o deuni ko ningo tohi na li ningo ite, i da manyu icieng o ningu. ¹⁸ Ito ning bo fotiri lo kitisirani lo kayaani ¹⁹ ko lo ning tungani tenya lo okabue lo Lobanga i da hati i niang, o lotu karohojani o kware kinyemoti na lo yiihini tau lenge. Inyi kinyemoti na lo dohi kikoi. ²⁰ La lo ri iya kinyemoti na lo dohi morutore. Inya la lo ning tenya ko runya ki ruk deu i fotu to kwama. ²¹ Tona lo ru kerda kunenge i tong faritin kude kuting. Ko lo lotu kidak kode mehino, o wuroro deudeu. ²² La lo ri ko kinyemoti na lo dohi kikware, a ra tungani la lo ning tenya oto hati tenyitenyi kulo kov ko kiudo lo bara ko gororo na tenya to warun lenge. ²³ Ojo la lo ri ko kinyemoti na lo dohi katua lo kov na i jir, o ri iya tungani la lo ning tenya i fotu ko ricahino diho tau na i baya. O ngiju kakeny mia, keek ile kode keek uni lo kinyemo kuna lo yiihini.

²⁴ Oforohi Yesu icieng lobo kitisirani ari ojo, ori okabue lo Kai iya tungani la lo yiihi kinyemo kuna i jiri mana lenge. ²⁵ Ojo cio lo getoro fad, o lotu meroni lenge ko yiihino duani katua lo obolore lenge ko loro. ²⁶ La ngun li koro obolo, oboto manyu tiriwa to katua lo mana. ²⁷ Ofuonu karwaak kulo monye lo mana diho inyi o jimi, lahitok, i da re afa kinyemo kula i jiri i yiihi isi mana lilo? To aji hati ofuonunore manyu tiriwa?

²⁸ Orihohi inyi icieng ojo, "meroni li tii ene" i tifi karwaak inyi o jimi, i wak hati isi ohoi ki fuo ki rute icieng?

²⁹ I nyahahi inyi icieng ojo, "I da. Ngi rute ha ca ite ngamang ko tiriwa a ra lobito. ³⁰ i ngohi to dori a ra lobito many o goru far lo dengo. Lu far ahi rihohi mute nan kadengok a jo, i temoto re ito ngode tiriwa i totor o jir o curari. Oto hati i dengu ngamang i yauno dero lei."

³¹ Orihohi icieng lobo kitisirani. Ori okabue lo kai iya kirijati lo karadali na lo dumu tungani i tubulahi mana lenge. ³² kileng inyi la ra na sidi tur to kiji lo kinyemo pili. oto ko lo bolo, inyi li lany to katua lo mana o lotu a ra ciani na lo fuonu ko kweny o dohi diho tanitani nenge. ³³ Orihohi icieng kitisirani lobo o jo, ori okabue lo Kai iya ibula kuna lo dumu ngoruani omunahi diho kofuo kuna i borengi many iti furu na ibune fad.

³⁴ O tenya Yesu kuno tenyitenyi fad diho ilulung to kitisirani, o ru lobo tohi lo rihohi inyi i da o for to kitisirani. ³⁵ Inyina iti fut lafa tenya lo teny kamoconi o jo. A nga ca nan kutuk lei to kitisirani. A foru ca nan tenyitenyi kulafa li duha many to duho lo kov.

³⁶ Inyi ko ngerihino ilulung ko rutoro kaji, o fuonu kalihitak kulenge diho inyi o jimi, "kiti timahi ba diho ohoi kitisirani lo duani to manahatua"

³⁷ Inyahahi inyi o jo, kayaani lo kinyemo kuna i jiri, inyi kito lo tungani. ³⁸ Mana, inyi kov. A ra kinyemo kuna i jiri tee kulo okabue. Tiriwa, icieng tee kulo karohojani. ³⁹ Ko meroni na lo yaa icieng, inyi Sitan. Dengo, inyi lohicungi lo kov, ko kadengok icieng malaikahin. ⁴⁰ Iya na lo rutororehin duani o curari to kima, o ri manyu mute ji to lohicungi lo kov. ⁴¹ Iti vahe mute kito lo tungani malaikahin kulenge o duari to katua lo okabue sangite fad kuna li yauno kipal ko cio pili kula li tiyo rohojun. ⁴² I birohi mute icieng pili kimatare na i yarat, faji lo kicira ko komo lo kala. ⁴³ Kajirak mute hati i medehi iya kolong to okabue lo Apa lecieng. La lo ngönore kiyoha, to ning!

⁴⁴ Ori okabue lo Kai iya bara na lo nuha kov manahatua. Ko lo lö tungani o rumahi, ko nuhahino ari. To kwama lo tau o lö iti lote sangite kulenge fad ko ki nyanguno na mana. ⁴⁵ O ri manyu okabue lo kai ari iya katilotoni la lo tahita tiho kulo wel. ⁴⁶ Ojo o rumu lobo na i gol wel nenge noo, ko loro kiti lotoro sangite kunenge fad ko ki nyanguno inyi na tihoti.

⁴⁷ Ori manyu okabue lo Kai iya bwai na li birohini katua lo nam ko garüno koditi kulo kayam fad. ⁴⁸ Ojo li fut inyi, i pihu kalohak kulo kayam inyi tode. I tongohinoti hati kov ki nyunyumo kayam kuna i jiri o fihi katua lo aduhu, o ruacari kuna i rohori oleng. ⁴⁹ Ori mute ji to lohicungi lo kov. O fuonu mute malaikahin i gegele karohojak to kiji lo cio kula i jiri, ⁵⁰ i birohi kimatare la i yarat; faji na lo ngön kicira ko komo lo kala.

⁵¹ Ko ki tifia icieng o jo, li niang ite kuno sangite fad? I ruk icieng o jimi, ibo.

⁵² Oto o jo diho icieng, tona, katiyenak kulo cik fad kula liti yeni tenya lo okabue lo Kai, o ri icieng iya monye lo kaji na li yauno to katua lo kaji lenge bara ngejuk ko ongore. ⁵³ Ojo Yesu lo keru kuna kitisirani fad, ko loro to inya.

⁵⁴ goruno kalecieng ji, i cak inyi kiti yena cio to lotubarehin kulecieng oto icieng i pany noo. I tifia icieng o jo, aji o rumunore lerok ene genyun ko tuman lo ki tiyo kuno tanguhin? ⁵⁵ I da re kito lo kagatani lo bauhin ele? I da re ngotenge o bara Meri, i da recerra kulenge koho Jemis, Josef, Saimon ko Judas? ⁵⁶ I da kanecera kulenge ki ngöni ko ohoi ene? Aji hati o rumunore lerok kuno sangite fad?" ⁵⁷ Iti kaj icieng inyi. Na ha o jo Yesu diho icieng, "I da o bangiti kamocani to kalecieng ko kaji lecieng ake" ⁵⁸ I da kileng inyi I tii lobo tangu ija to rujon lo kiruk lecieng.