¹ To kuna faritin o ningu kalanyunoni Erod kwatun lo Yesu ² Ko jimitan diho kalihitak kulenge, "A ra ele Jon Kabatisani, lo waru inyi to kiji lo kaweyak. Inyi li co inyi i tiyo kuno tanguhin.

³ Orumu Erod i nief Jon ko tora inyi ko fiha lotorare to tenya lo Erodias ngoruani lo rece Pilip. ⁴ Tonyio, orumu Jon o jo diho inyi, o beru cik isi ki tongore ngoruani lo rece lilo. ⁵ O wak orumu Erod ki fadaru Jon o bang hati inyi cio, tonyio, o yeniti orumu jimitan a ra inyi kamocani.

⁶ To far lo karama lo otomonore lo Erod, o lotu kito lo Erodias ko kia ketemoni lo Erod ko welo kulenge. O kwama hati Erod noo, ⁷ oto o cik i butia kileng lo ki cuara inyi teke tohi na lo wak inyi. ⁸ To kisusua lo ngotenge, inyi ko jimitan, "ki co nan kue lo Jon Kabatisani iyo itadit jija. ⁹ Oto Erod i toyo noo, na ha to ki butia lenge ketemoni lo welo kulenge, inyi ko ciha o jo o jir i cori inyi tohi na li lifa inyi. ¹⁰ ko ngutoroti kue lo Jon to lotorare ¹¹ iyauni to itadit i cori na kito ko ki yaruno diho ngotenge. ¹² O fuonu kalihitak kulo Jon i yaru ken lenge o fuori o nuhahini. O fuori ko rihohinoti diho Yesu.

¹³ Ojo Yesu o ning tohi na li tiihino, ko ki ngadaru to tigol lolit faji na i polo. Cio ningo ji, i jif ilulung inyi to kangite to kejuha. ¹⁴ Ojo Yesu o goru o deu ilulung lo cio kula i borengi, i nief kisa inyi. Iti furie kamuak kulecieng. ¹⁵ Ojo kurou lo nyihu o fuonu kalihitak kulenge o jimi diho inyi, o jimi faji na i polo ene bebe, lo lotuno manyu kov mutohun. To rihohi cio o fuo kangite o jir o fuori i nyanguni kude dahidahi kulecieng.

¹⁶ Ifotu Yesu o io i da icieng o tum fuoro, i cuarata icieng tohi lo daha.

¹⁷ Ifotu icieng o jo, ki ngöni ohoi ko ibuneha miet jia ko kayam are.

¹⁸ Ojo inyi, i yaunoti ene diho nan. ¹⁹ Inyi ko rihohino cio ojir i tongoti kov iyo nyari. Inyi ko tinguno kuna ibuneha miet ko kayam are ko deya kai, i co kwama ko ki bebenya ibuneha ko ki cuara kalihitak. Kalihitak ko ki cuara cio ²⁰ onya icieng fad i moneho. I tutufu kalihitak aduhuhin tomon ko are kulo firüfirü kulo ibuneha otonge. ²¹ Wel lo cio kula lo nyia o tum rei alif miet, i da kileng i keni ngoruo ko tee.

²² Deudeu Yesu ko rihohino kalihitak kulenge o jo i rwohoto tigol o jir i temi angati tode lo nam o rihe inyi o ciha ilulung. ²³ La ngun lo cik icieng, ko loro kai lo donge ki liva ake. Ojo lo goru kurou, o tong inyi ijia ake ²⁴ Oto o rumu tigol lo loma to tode lo nam, i yeyela manyu nam inyi kutunta kiyoma ketemoni lenge. ²⁵ Ojo lo goru tik ongon lo karue, olö Yesu diho icieng. Olot to kai lo nam, na ha icieng ko bangun bebe. ²⁶ Oto ojimi a ra Okorif, i gorori hati to bangun.

²⁷ Oto deudeu Yesu ko jimitan diho icieng, iti goloto taulo. Nan ele, ke bangata.

²⁸ Ojo Pita, Lahitok, ka la ra isi dede, ki rihohi nan a lotu diho isi to kai lo kivi.

²⁹ Ojo Yesu diho inyi, "ou" Pita ko ki culoro to tigol, ko lotita to kai lo kivi iya idi lo ngönore Yesu. ³⁰ Oto ojo inyi odeu kiyoma, o bang inyi icaha ki lutoro. I gore bebe o jo "Lahitok, ki luak!"

³¹ Yesu ko ki niefa kana lenge deudeu ko jimitan diho inyi, "Isi na li sidi kiruk, nyio isi i kukuya?"

³² Ojo icieng i ruok tigol, kiyoma ko woita ³³ Na ha kula lo ngöni katua lo tigol ko ki worati inyi o jimi, "I ra isi kito lo Lobanga, dede."

³⁴ Ojo icieng o rangu, ko ki culohinoti Genesaret. ³⁵ Ojo cio kulo na kov o heru Yesu, i dieretahini hati tenya lenge fajihit fad kuna li rit Genesaret. I yauni cio kamuayak fad diho inyi ³⁶ I livati inyi o jimi, i ngohi hati kamuayak to tiru kileng kutuk lo kiela lenge. Na ha cio fad kula lo tir inyi ko jiran.