¹ To la far, o lo Yesu a ra katua lo manatak to Sabit. Orumu kinga o daha jayona kulenge oto icieng o ngitunitati ngamang o notati to kac o ningati. ² Ojo Farisihin o deu ji, o jimi diho Yesu, "To de ba, i tiyo jayona kulilo tohi na lo beru cik to Sabit.

³ nyahahi inyi o jo, i da ite li kenu tohi na afa li tii David ko kalihitak kulenge ko riafu afa kinga icieng? ⁴ O lotu afa inyi o rute kaji lo Lobanga ko kalihitak kulenge ko dahati ibune na inyu na lo dua diho icieng daha oto kaduarak ake lo dahita. ⁵ kode i da ite li ken diho cik o jo kaduarak kula li tiyo kaji lo Lobanga i comaritati Sabit i da a ra kipal. ⁶ Ahi rihohi jimitan o ngön tohi na hitok i lany kaji lo Lobanga ene. ⁷ Ngara i yen ite fotiri lo ene tenya lo jo, "A wak nan kisa i da a ra lajulot, ji ite i da i ngoto tenya kueci kulo cio kula lo ru kipal. ⁸ Tonyio, kito lo tungani la ra Lahitok lo Sabit.

⁹ Ojo lo ring to na faji, ko loro lotubare lecieng, ¹⁰ olö o rumahi lobo tungani ija na lo wei kana angati ko ki tifia inyi lo tahita lo tenya o jir i tobore inyi. Ojo i ruk re cik kiti furiorita cio to sabit.

¹¹ I nyahahi inyi icieng ojo, ko lo ngön lobo to kiji lingi ko ker na lo dohi katua lo tula. I da Inyi o lö o tingu to Sabit? ¹² Ida lofere lo tungani o gol i lany ker? Tona i ruk cik ki tiyo kuna i jiri to Sabit." ¹³ Inyi ko jimitan diho la tungani, to dongahi na kana lilo, lerok ko dongahino na kana. Kana lenge ko jiran o riworo ko lobito. ¹⁴ Oto Farisihin ko fuoro tora tenya lo ki fadaru inyi Yesu.

¹⁵ Iyana lo yenare Yesu ji, ko ki ngadaru to na faji. O div cio becek inyi, iti furie inyi muaita kulecieng. ¹⁶ O cik manyu icieng o jir i da o rihohini cio inyi ngai. ¹⁷ A ra ene lo kiti futa kulafa tenyitenyi lo teny kamocani Aisaya o jo; ²² Ko ki yaunoti tungani na li nief lodonyok, o ngodo I da manyu o tenya. Yesu ko kiti furioro inyi i co inyi o tenya, o kueny manyu ²³ Cio fad ko ki pany bebe i tifiati o jimi, i da ha ba ele a ra kito lo David?"

²⁴ Ojo Farisihin o ning ji, o jimi, a ra to Beelzebub kabu lo lodonyok i fuhitare inyi lerok lodonyok.

²⁵ Yesu yenun ki buha lecieng ko jimitan, ko lo kora okabue o remoriti, i da na Okabue o woita. Kode ko lo kora kaji o ngön swa katua nenge akeake, owuroro na kaji. ²⁶ Ka li fuhita Sitan Sitan inyi jimitan o kora okabue lenge o remoriti, aja hati ca inyi o woita? ²⁷ Na manyu, ka la fuhita nan lodonyok to golun lo Beelzebub, to golun lo ngai i fuhita kajivitak kulingi? Tona a ra mute icieng kangotok kulo tenya kueci kulingi. ²⁸ Ojo ka la fuhita nan lodonyok to golun lo Okorif lo Lobanga, inyi jimitan lo lotu okabue lo Lobanga diho ite. ²⁹ Manyu, aja tungani o tum bela kaji lo tungani kagoloni ka li da re i tem o tor na kagoloni? Inyiha o tum bela na kaji. ³⁰ Tungani na li da ki ngön ko nan, ki beru nan. Manyu na li da ki tuba ko nan a ra katisarani. ³¹ Tona ahi rihohi ite jimitan kipalipali ko morimori fad kuna lo morore cio Lobanga, o launi mute. Ojo morimori kuna lo mororehin Okorif la Inyu, i da o launo tur. ³² Ko lo teny tungani tenya a ra na lo moro kito lo tungani, o launi. Ojo tungani la lo tenya o moro Okorif la Inyu i da o launi kileng to kuno faritin kode to faritin kuna lo fuonuno. ³³ Ingohi ciani to jir o jir manyu ngahi kunenge ojo ko lo rohoi ciani o rohori manyu ngahi kunenge. To nyio, o heruno ciani to ngahi kunenge. ³⁴ Ite tee kulo munuok, aja ite kula i boti taulo i tum tenyuno lobo tenya i jir? Tonyio, o tenya bo kutuk tohi na li fut tau. ³⁵ Tungani la i jir o duma sangite kuna i jiri kuna li kumahi inyi katua lenge. Tungani la i rohoi manyu o duma sangite kula i rohori kuna li kumahi inyi katua lenge. ³⁶ Oto ahi rihohi ite jimitan, to far lo ki fura, i titim mute cio tenyitenyi fad kuna lo cora icieng i da iyioti. ³⁷ Tonyio, to tenyitenyi kulilo o tum ki lahahini isi. To tenyitenyi kulilo manyu o tum ki ngotohini isi tenya.

³⁸ Na ha kude Farisihin ko katiyenak kulo cik ko jimitan diho Yesu, Katiyenani, ki wahita ohoi tangu ki totorita diho isi.

³⁹ I fotu Yesu o jo, kofiang lo cio kula i rohori ko kulo lomuna kitotorita lo tangu diho nan! O ru lobo ngi cori icieng oto hati kitotorita lo kamoconi Jona ⁴⁰ Tonyo, iya lafa lo manyare Jona kocehe lo kayamiti faritin uni ko karuehin uni; iyana manyu ca kito lo tungani o many faritin uni ko karuehin uni tau lo kov. ⁴¹ O ngot mute cio kulo Nineve lokiho lo cio kulo ene kofiang tonyo li rwo afa icieng langun lo ningi tenya lo Jona. Na hati lo bolo i lany Jona enene. ⁴² O woita mute kabu ngoruani lo ngati lo orof ko ene kofiang lokiho, o ngotohini tenya kueci kulecieng. Tonyio, o lotu afa inyi many to lohicungi lo kov ningo tenyitenyi kulo genyun kuna lo tenya Solomon. O ngön hati Lahitok na li lany Solomon enene. ⁴³ Ko lo rutu lodonyohi to ken lo tungani, o fuori i lori olengi tahita lohiyomare i da o rumuni. Ko jimitan, ahi yite ca lafa kaji la ngohi nan. Ojo o goru o rumu kaji o wat lo fiaru fad, ko ki kukumahino. 45 ⁴⁴ Oto ko yitoro o lo i cohuno lodonyohi kulakude myetare kula i rohori i lany inyi ko johohinoti manya ija, na ha ca koditi lo lohicungi lo na tungani ko rohojun i lany lafa lo ketemoni. ⁴⁵ O ri mute ji diho ene kofiangiti i rohoi.

⁴⁶ Orihe Yesu o tenya diho ilulung, o lotu ngotenge ko recerra kulenge. Owoitati sita o wahiti tenya ko inyi. ⁴⁷ Lobo tungani ko rihohino inyi jimitan, iyang lilo ko recerra kulilo kula lo woitati sita. O wahiti tenya ko isi.

⁴⁸ fotohi inyi ojo, iyang lei ngai? Ko recerra kulei ko oho ngai? ⁴⁹ O wüt kalihitak kulenge ojo, kulo la ra iyang lei, recerra ko kanecera kulei. ⁵⁰ Tonyio, tungani la li tii wahun lo Apa lei la lo ngön Kai, inyi la ra rece, kanece ko iyang lei.