¹ Worae wosae no te domtau hina vevesai tanumue. Ne no vivilo lesi na tanumue rindi, no soaria, ale tanumue rindi mo tau telei God, matan Tari tamalohi-sorai nale korekore na le vano ana verama. ² Matan sohena kamim no mataivosai na tanumue rindi mo tau telei God. Vevesai tanumue rindi muende na vitivitia na re Iesu Kristo mo mai hina visiho, nira na tau telei God. ³ Moiso vevesai tanumue muende na te vitiviti Iesu, nira na te tau telei God. Nian nia tanumue rindi nia tanumue tavalu telei Kristo, kamim no rongo muende na no mai, ne nira ana verama moiso. ⁴ Vahuranji waririhi kamim non God, moiso no liura, matan muende telei kamim mo suiha liu muende ana verama. ⁵ Muende nira noni verama, matan sohena na le sorahi na verama, Moiso verama mo tamburongo nira. ⁶ Hinda noni God. Vevesan muende na rongo vosai God na tamburongo hinda. Ne vevesan muende nira mote non God nate tamburongo hinda. Ana sala rindi ka bo matawosai na Tanumue Retiduhu, moiso tanumue jalioa. ⁷ worae wosai, ava ka boiboinda hatehateahi, matan boiboia nia non God, Moiso hisei te wonamim mo noha boiboia, nia mo wora haramba hini God, Moiso mo matawosai God. ⁸ Ate hisei mo te noha boiboia nia mo te matavosai God, matan God nia boiboia. ⁹ Matan boiboia non God mo mateterahi teleinda, mo sora Natuna hese mo mai ana verama, mue ka bo mauru hinia. ¹⁰ Hina boiboia rindi, mo te hinda ka boi God ne nia mo boinda, moiso mo sora Natuna mo mai matan alai takahi na nonda hina sasati. ¹¹ Worai wosai, ale God mo boinda asena, hinda ka bo boiboinda hatehatehi alesohena. ¹² Motete wonanda a soari God, ne ale ka boinda hatehateahi God a ovi teleinda, Moiso nona boiboia mahere a ovi teleinda. ¹³ Matan sohena hinda ka rongovosaia, matan hinda ka ovi hinia, moiso nia mo silenda hina Tanumuena. ¹⁴ Moiso hinda ka soaria, moiso ka viti votovoto, mue Tamana mo sora Natuna mue nia ambo ivahamauru non verama. ¹⁵ Hisei te wonamim a vahamareohi Iesu mue nia natun God, God a ovi teleia moiso nia a ovi telei God. ¹⁶ Moiso hinda ka mai kamatavosaia, Mousa ka domtauhi na boiboia muenda God mo slea matanda. God nia boiboia ate hisei a ovi hina boiboia a ovi telei God moiso God a ovi teleia. ¹⁷ Boiboia nia mo mahere asena teleinda, ana sala rindi mue ka bo lolomatua ana bongi sora votovotoa matan a sohen Nia, moiso le sohena teleinda ana verama ron. ¹⁸ Boiboia nia motete matahua aie. Ne boiboia mahereasena rindi mo bulahi takaihi na matahua, matan matahua mo lai na komokomoa, ne muende nia mo matahu mo te mahere hina boiboia. ¹⁹ Hinda ka boia, matan Nia mo boinda talom. ²⁰ Ale a te wonamim are iau ku boi God, ne nia mote boi nona worai , nia tamalohi dandani, matan muende mo te boi nona worai muende le soaria, ate matavosai a boi God muende mote soaria. ²¹ Le sohena ka lai na soraimatua rindi teleia, hisei te wonamim mo boi God mo boi nona worai ale sohena.