¹ Vauhuranji ku hahri telei kamim matan note jovi hina hina sasati. Ale ate wonamim mo jovi hina hinasasati, kamam la noha ituan nia, Nia mai Tamana. Ituani rindi nia Iesu Kristo nia hina mahere. ² Moiso nia malamalaia matana noda hinasasati, moiso mo te matan noda manihi ne lesohena matai verama a waihese. ³ Ka rongo wosaia ka le mai matan ka mboi ka rongo wosaia, marni ale ka utuhi na nona leo-matua. ⁴ Ale ate more mo rongo wosai God, ne mo te utuhi na nona leo-matua,nia le korkore. Moiso retiduhua mo te ovi teleia. ⁵ Ale ate hisei mo utuh na nona sorai le red-duhu,ne hinia manihi mboimboia non God ambo ovi teleia. Matan sohena hinia hinda ka rongo wosaia ka re hinda teleia. ⁶ Ate hisei more nia le toho tele God nia hasena manihi le vanovano ale sohen le hase vanovano. ⁷ Le redducu iau ku le mboi ho ku te hahari te leo-matua harambua ata mai teleho,ne leo-matua tuai towon o le rongoa ana hujuna. Leo-matua talom nia sorai muende o le rongoa. ⁸ Hin iau ku hahari na leo-matua harambua teleho, nia kristo,le rediducu le ovi telei ho matan mbongndondo no vantakai, moiso veverama rediducu mo sarasara. ⁹ Muende nia more nia ana rani moiso le tavalu telei na nona worai nia ana mbongndondo le hisi mbualosu ro. ¹⁰ Muende le mboi nona worai nia le ovi ana rani, moiso motete hinau turaturahia le toho telia. ¹¹ Ne muende le tomboi nona worai, nia le ovi ana mbongndondo moiso le vanovano ana mbongndondo, moiso mote matavosai le vano ambea. Matan mbogndondo ri mo lolia mo vuso. ¹² Vauhuranji ku le hahari telei kamim matan nomim hina sasati mo materi hina hasena. ¹³ Kule hahari telei h9 Mama, Matan niho o matawosai muende le ovi ana hujuna, mois ku hahar telei kamim valifohi, matan kamim no liu na sumbuei tanume sasat. Lesohena ku hahar telei kamim vauhranji vosai, matan kamim no matawosai Tamanda. ¹⁴ Ku harhar teleho moiso, Mama matan niho o rongo wosai hisei ana hujuna. Valifoh ku hahar telei kamim, moiso matan kamim no suiha ana sorai non Moli God le toho ana lolomim, mbualos ro kamim no liu na sumbuei tanume sasati. ¹⁵ Moiso vevesai hinau muende nale hinau ana verama, maroto Surina embe, maroto suri na mata, mana mangisia wono matai mauru _ nia mote non tamanda ne nia non verama. ¹⁶ Moiso verama mana marotoanana ambo vano takai. ¹⁷ Ne muende nia a loli na manjigae non God ambo ovi losu. ¹⁸ vahuranji waririhi, maravitu bong hitahu. Asohen ole rongoa nunu wono non Kristo mole mai, balosro nunu wono non Kristo werehi nambo mai, tovon sohena kamatavosaia kare nia bong hitahu. ¹⁹ Nira na vano tiunda, ne nira mote natuanda. Ro ale nira teleinda ambo hinda tolu turuvui. Ne tovon na vano tiuhinda, na hase vanjangira nare nira mote natwanda. ²⁰ Ne kamim muende no lai na andiandihia hin Tanume Tambu, Kamim noisoduhu no matawosai na hinau retiduhu. ²¹ Iau kute hahari telei kamim mote matan kamim note matawosai na retiduhu, ne matan kamim no matawosaia nore motete dandania ana hinau retiduhu. ²² Ise le dadani ne muende mole sinahi Iesu nia Kristo? tamlohi rindi nia nunu wonon Kristo, towon mole sinahi tamana ro mai natuna. ²³ Motete hatea a sinahi Natuna moiso ambo lai Tamana. Muende nia mole kalakalai Natuna ro le lai Tamana lesohena. ²⁴ Moiso ava sorae rindi kamim nole rongoa talom a ovi ana lolomim. Ale sorae rindi kamim nole rongoa talom a ovi ana lolomim le sohena kamim nombo ovi hin Natuna moiso hin Tamana. ²⁵ Nian nia sorae Tauhia mo silea teleinda nia- mauru losu. ²⁶ Iau ku hahari twai moiso hinahinau niran matan muende ambo talomahi kamim no jalio. ²⁷ Ne telei kamim, muende no lai na andiadihia moiso hin Tanume Tambu le ovi ana lolomim, note manjingahi te tamalohi matan ata vanjang kamim. Ne asohen nona andiandihia mole vanjang kamim ana vevesai hinau retinduhu ro nia mote hinau korkore, asohen le vanjang kamim, ro no ovi hinia. ²⁸ Balosuro vahuranji wosai, no ovi hinia mue tovon a avutehi hinda kambo lolomatua mue atete mahanhanua hitahu ambo ta mai. ²⁹ Ale kamim no matawosai mue nia mo mahere, le sohena kamim no matawosaia nore vevesani muende na loli hinau mahere na wora hinia.