¹ Afta, paelat i tekem Jisas mo oli wipim hem. ² Nao ol soldia oli wokem wan giaman hat blong king long ropnil, oli putum long hed blong hem, mo oli putum wan pepol rob long hem. ³ Mo oli jikim hem se, ''Hona long King blong ol Jiu!'' Mo oli stap slapem hem. ⁴ Ale, paelat i go-aot bakegen mo i talem long olgeta se, ''Yu luk, bae mi karem hem i kamaot, blong yufala i save se mi no faenem wan rong long hem.'' ⁵ Afta, Jisas i kamaot, mo i stap werem pepol rob wetem hat blong robnil. Mo paelat i talem long olgeta se, ''Traem luk man ya.'' ⁶ Taem ol jif pris mo ol ofisa oli luk hem, oli singaot strong se,''Nilim hem long kros. Be mi no faenem wan rong long hem.'' ⁷ Ol Jiu oli ansa long hem se, ''Mifala i gat wan loa, mo loa i talem se hem i mas ded, from hem i talem se hem i Son Blong God.'' ⁸ Taem paelat i harem olsem, hem i stap fraet moa. ⁹ Mo hem i gobak insaed long Kot-Haos, Be Jisas i no ansarem hem nating. ¹⁰ Afta, Paelat i askem hem se, ''Yu no wantem toktok long mi? Yu no save se mi gat paoa blong nilim yu long kros mo mi gat paoa blong letem yu yu fri?'' ¹¹ Jisas i ansa se, ''Sipos God i no bin givim long yu fastaem, bae yu no save gat paoa agensem mi. Mekem se, man we i bin tekem mi mi kam long yu, hem nao i gat sin we i moa bigwan.'' ¹² Stat long taem ya, Paelat i traehad blong lego Jisas, be ol Jiu oli singaot se, ''Sipos yu lego man ya, yu no fren blong Sisa. From man we i talem se hem i king, hem i stap tok agensem Sisa.'' ¹³ Naoia taem Paelat i harem tok ya, hem i karemaot Jisas, mo hem i sitdaon long jea blong jajmen long wan ples we oli singaotem Flo We I Gat Disaen, be long Hibru: Gabata. ¹⁴ Mo i dei blong mekem redi blong pasova. Naoia i klosap namba-sikis aoa, mo hem i talem long ol Jiu se, ''Traem luk King blong yufala!'' ¹⁵ Be oli singaot se, ''Aotem hem!''Aotem hem! Nilim hem long kros!'' Paelat i askem olgeta se, ''Be bae mi nilim King blong yufala long kros?'' Ol jif pris oli ansa se, ''Mifala i nogat narafala king, be Sisa nomo.'' ¹⁶ Mekem se paelat i givim Jisas long olgeta, blong oli save nilim hem long kros. Mo oli karem Jisas i go. ¹⁷ Mo hem i karem kros blong hem mo oli kam long ples we oli singaotemBun Blong Hed, be long Hibru: Golgota. ¹⁸ Long ples ya, oli nilim hem long kros wetem tu narafala man long saed saed long hem, mo Jisas long medel. ¹⁹ Mo Paelat i raetem wan wan notis se, ''Jisas blong Nasaret, King blong ol Jiu,'' mo i putum long kros. ²⁰ Ale, fulap Jiu oli ridim notis ya from ples we oli nilim Jisas i klosap long taon, mo notis ya i stap long tri lanwij, Hibru mo Grik mo Latin. ²¹ Nao ol jif pris blong ol Jiu oli talem long Paelat se, "Yu no raetem se 'King blong ol Jiu,' be yu raetem se 'Hem i talem se, Mi mi King blong ol Jiu.'" ²² Paelat i ansa se, "Wanem we mi raetem finis, i stap." ²³ Afta we ol soldia oli bin nilim Jisas long kros, oli karem ol klos blong hem mo oli terem long fo pis, wanwan long evri soldia. Mo tunik tu i stap. Be tunik blong hem, i wan pis nomo, i nogat mak blong tred, from oli bin wokem long wan pis nomo. ²⁴ Mo olgeta oli stap toktok se, "Bae yumi no terem, be yumi sakem das, mo wina bae i karem." Blong skipja i save kamtru we oli talem se, "Oli seraotem klos blong mi long olgeta, mo oli sakem das from tunik blong mi." Mekem se ol soldia oli mekem ol samting ya. ²⁵ Naoia mama blong Jisas i stap klosap long kros ya, wetem sista blong mama blong Jisas, mo Meri woman blong kleopas, mo meri blong magdala. ²⁶ Jisas i luk mama blong hem mo disaepol we hem i lavem, tufala i stap klosap. Hem i talem long mama blong hem se, "Woman, yu luk, hemia boe blong yu nao." ²⁷ Ale, i talem long disaepol ya se, "Yu luk, hemia mama blong yu nao." Stat long taem ya, disaepol ya i tekem mama ya i kam stap long haos blong hem ²⁸ Afta long samting ya from we jisas i save se olgeta samting i komplit, hem i talem se, "Mi tosta." Blong skripja i kamtru. ²⁹ Nao long ples ya i gat wan jag we i fulap long vinega. Ale, oli fulumap wan spanj wetem vinega, oli putum long branj blong hisop mo oli pusum long maot blong hem. ³⁰ Taem jisas i kasem vinega ya, hem i talem se, "I finis!" Mo hemi benem hed, i lego Spirit blong hem. ³¹ Nao, from we i dei blong mekem redi blong pasova, ol jiu oli no save lego ol ded bodi oli stap long kros long sabat dei (from hemia wan hae sabat dei), oli askem paelat se oli save brekem leg blong trifala blong oli save karem trifala i go. ³² Ale, ol soldia oli kam brekem leg blong feswan, mo narawan we i stap wetem hem. ³³ Be taem oli kam long jisas, oli luk se hem i ded finis, oli no brekem leg blong hem. ³⁴ Mo wan long ol soldia i stikim saed blong jisas wetem spia. Ale, blad wetem wota i ronaot. ³⁵ Nao man we i luk, hem i givim witnes blong hem i tru, mo hemi save se i stap talemaot, blong yufala i save biliv. ³⁶ Ol samting ya oli hapen blong skripja i save kamtru we i talem se, "I nogat wan bun blong hem i brok." ³⁷ Mo bageken wan narafala ples long skripja i talem se, "Bae oli lukluk long hem we oli bin stikim hem." ³⁸ Afta, josef blong Arimatea we hemi wan sikret disaepol blong jisas (From we i fraet long ol jiu), hemi askem long paelat blong i save karem bodi blong jisas. Mo paelat i letem hem. Ale, josef i kam tekem bodi blong jisas. ³⁹ Mo Nikodimas we i bin kam luk jisas fastaem long naet, hem tu i kam mo i karem wan senta blong oel mur wetem alo, we i olsem teti fo kilo. ⁴⁰ Ale, oli karem bodi blong jisas, oli fasem long line kaliko wetem ol senta, folem kastom blong ol jiu blong bered. ⁴¹ Naoia long ples we hemi ded long kros, i gat wan park, mo long park ya i gat wan niu hol blong ston we oli no bin putum dedman long hem yet. ⁴² Nao oli putum Jisas long gref ya from we i stap klosap, mo from hemia dei blong ol jiu oli mekem redi blong pasova.