¹ Taem Jisas i talem toktok ya finis, hem i go-aot wetem ol disaepol blong hem, oli krosem Kidron Krik. Hem wetem ol disaepol blong hem oli go long wan Park long ples ya. ² Mo tu Judas, (we bae salemaot Jisas,) i save ples ya. From oltaem, Jisas i stap go spel long ples ya wetem ol disaepol blong hem. ³ Mo Judas i kam long ples ya wetem sam ami mo sam ofisa we ol jif pris mo ol farisi oli bin sendem. Mo oli karem ol stik faea, ol hariken laet, mo ol tul blong faet. ⁴ Naoia Jisas i save finis olgeta samting we bae i hapen long hem. Ale, hem i go askem long olgeta se," Yufala i stap lukaotem huia?" ⁵ Oli ansarem hem se, "Jisas blong Nasaret." Jisas i talem long olgeta se, "Mi Ya." (Mo Judas, we i salemaot hem, i stap stanap wetem olgeta.) ⁶ Stret long taem ya we hem i talem long olgeta se, "Mi Ya," oli fondaon i go bihaen. ⁷ Mo hem i askem olgeta bakegen se, "Yufala i stap lukaotem huia?" Mo oli ansa se, "Jisas blong Nasaret." ⁸ Jisas i talem se, "Mi talem long yufala finis se mi ya nao. Sipos yufala i stap lukaotem mi, letem olgeta ya oli go nomo." ⁹ Hem i talem olsem blong toktok blong hem i save kamtru we hem i bin talem se, "Mi no lusum wan long olgeta we yu bin givim long mi." ¹⁰ Nao, Saemon Pita i gat wan naef blong faet mo i pulumaot, mo i katem wokman blong hae pris, i katemaot raet sora blong hem. Nem blong wokman ya Malkas. ¹¹ Be Jisas i talem long Pita se, "Putumbak naef blong yu long poket blong naef. Yu ting se bae mi no dring long kap we Papa blong mi i givim long mi?" ¹² Afta, kapten mo ol ami mo ol ofisa blong ol Jiu oli tekem Jisas mo oli fasem hem. ¹³ Mo feswan, oli tekem hem i go long Anas, palika blong Kaeafas we i hae pris long yia ya. ¹⁴ Kaeafas ya nao we i bin givim advaes long ol Jiu se i moa gud blong wan man i ded long bihaf blong ol nara man. ¹⁵ Afta, Saemon Pita i folem Jisas, mo tu, wan narafala disaepol. Nao hae pris i save narafala disaepol ya, mo hem i go insaed wetem Jisas long haos blong hae pris. ¹⁶ Be Pita i stanap aotsaed long doa. Ale, narafala disaepol we hae pris i save hem, i go toktok long gel blong wajem doa, mo i tekem Pita i kam insaed. ¹⁷ Ale, gel we i mekem wajman, hem i askem Pita se, "Ating yu yu wan disaepol blong man ya?" Mo hem i ansa se,"Nogat." ¹⁸ Nao i gat sam wokman mo ofisa oli stap stanap we oli bin holemtaet wan faea from ples i kolkol. Mo oli stap wom long faea. Nao Pita i stanap wetem olgeta, mo i womem hem. ¹⁹ Ale, hae pris i kwestinim Jisas from ol disaepol blong hem mo ol tijing blong hem. ²⁰ Jisas i ansarem hem se, "Mi bin talem klia long wol. Oltaem mi bin tij long sinagog mo long tempol we ol Jiu oli stap. Mi no in talem wan samting long sikret. ²¹ From wanem nao yu stap kwestinim mi? Traem askem olgeta we oli bin harem mi, se mi bin talem wanem long olgeta. Yu luk, olgeta oli save wanem we mi bin talem long olgeta." ²² Mo taem hem i talem olsem finis, wan ofisa we i stap klosap, i slapem Jisas mo i talem se, "Yu no tok long hae pris olsem." ²³ Jisas i ansarem hem se, "Sipos yu luk se mi bin talem nogud, yu mas givim witnes blong nogud ya. Be mi bin talem tru, from wanem nao yu kilim mi?" ²⁴ Nao rop i holemtaet hem yet, mo Anas i sendem hem i go long Kaeafas hae pris ya. ²⁵ Ale, Saemon Pita i stanap i stap womem hem long faea, mo olgeta oli askem long hem se, "Yu wan disaepol blong tu, ah?" Be hem i giaman se, No." ²⁶ Nao wan wokman blong hae pris (we hem i wan famli blong man we Pita i bin katemaot sora blong hem), hem i askem se, "I no yu we mi bin luk long park wetem hem?" ²⁷ Be Pita i giaman bakegen, mo stret long taem ya faol i singaot. ²⁸ Long eli moning, oli tekem Jisas, oli aot long Kaeafas, oli go long Kot-Haos. Be olgeta oli no go insaed long Kot-Haos (blong oli stap klin blong oli save kakae pasova). ²⁹ Ale, Paelat i kam long olgeta, mo i askem se, ''Yufala i talemaot wanem agensem man ya?'' ³⁰ Oli ansarem hem se,''Sipos hem i no wan rabis man, mifala i no save karem hem i kam long yu.'' ³¹ Ale, paelat i talem long olgeta se, ''Yufala i tekem hem, mo go jajem hem long loa blong yufala.'' Be ol Jiu oli ansa long hem se, ''I tabu blong mifala i kilimded man.'' ³² (Blong mekem se toktok blong Jisas i save kamtru we i bin talemaot long wanem fasin bae hem i ded.) ³³ Naoia, Paelat i kam insaed long Kot-Haos bakegen, i singaot Jisas, mo i askem hem se, ''Yu yu King blong ol Jiu?'' ³⁴ Jisas i ansarem hem se, ''Yu stap askem blong yu wan? O sam narafala man oli bin tokbaot mi long yu?'' ³⁵ Paelat i askem se, ''Yu ting se mi wan Jiu?'' Ol man ples blong yu mo ol Jif pris oli bin putum yu long han blong mi. Be yu bin mekem wanem?'' ³⁶ Jisas i ansa se, ''Kingdom blong mi i no stap long wol ya. Sipos kingdom blong mi i bin stap long wol ya, ol wokman blong mi oli mas faet blong blokem ol Jiu blong tekem mi. Be naoia kingdom blong mi i no stap long ples ya.'' ³⁷ Ale, paelat i askem hem se, ''Yu yu wan king?'' Be Jisas i ansa se, ''Yu nao yu talem se mi wan king. Mi bin bon blong givim witnes long tru. From samting ya nao mi bin kam long wol ya. Evri man blong trut, oli harem save voes blong mi.'' ³⁸ Paelat i askem hem se, ''Wanem nao trut?'' Mo afta we i bin talem olsem, hem i go-aot long ol Jiu bekegen mo i talem long olgeta se, ''Mi no faenem wan rong long hem nating. ³⁹ Be yufala i gat wan kastom long Pasova we mi sud lego wan man i kam long yufala. Yufala i wantem se mi lego King Blong Ol Jiu i kam long yufala?'' ⁴⁰ Olgeta man oli singaot strong se,''Mifala i no wantem man ya, be Barabas!'' Be Barabas hem i wan stilman.