1 Jisas i leftemap hed blong hem i lukluk i go long heven, mo i prea se, "Papa naoia i taem. Leftemap glori blong Son blong yu, blong mekem se Son blong yu i save leftemap glori blong yu. 2 Yu bin givim paoa long hem ova long evri samting we i laef, blong mekem hem i save givim laef we i no save finis long evriwan we yu bin givim long hem. 3 Hemia nao laef we i no save finis, se oli save yu we yu wan nomo yu tru God, mo Jisas Kraes we yu bin sendem hem. 4 Mi bin leftemap glori blong yu long wol. Mo mi finisim wok we yu bin givim long mi blong mekem. 5 Papa, naoia leftemap glori blong tru long yu wan, wetem glori we mi bin gat wetem yu bifo we wol i stat. 6 Mi soemaot nem blong yu long ol man we yu bin givim long mi aot long wol ya. Olgeta ya blong yu fastaem, be yu bin givim long mi. Mo oli bin folem tok blong yu. 7 Naoia, oli save se olgeta samting we yu bin givim long mi, oli kamaot long yu. 8 From ol toktok we yu bin givim long mi, mi givim long olgeta, mo oli kasem. Mo oli save-gud se mi kam aot long yu, mo oli biliv se yu bin sendem mi. 9 Mi stap prei from olgeta. Mi no stap prei from wol. Be mi stap prei from olgeta we yu bin givim long mi, from we olgeta nao oli blong yu. 10 Olgeta man blong mi, oli yu; mo ol man blong yu, oli blong mi tu; mo mi kasem glori tru long olgeta. 11 Naoia, bae mi nomo stap long wol, be olgeta ya bae oli stap long wol yet. Mo mi stap kam long yu. Holi Papa, tru long nem blong yu, holemtaet olgeta we yu bin givim long mi, blong oli save kam wan olsem yumitu. 12 Taem mi stap wetem olgeta long wol, mi bin holemtaet olgeta tru long nem blong yu. Mi bin holemtaet olgeta we yu bin givim long mi, mo i nogat wan long olgeta i lus be Pikinini Blong Hel, hem nomo. (Blong skipja I save kamtru.) 13 Mo naoia mi stap kam long yu. Mo long wol, mi talem ol samting ya, blong joy blong mi i save fulap insaed long olgeta. 14 Mi bin givim tok blong yu long olgeta, be wol oli hetem olgeta, from we oli no blong wol olsem we mi no blong wol. 15 Mi no stap prei blong yu tekemaot olgeta long wol, be blong yu blokem olgeta from ol rabis samting. 16 Oli no blong wol olsem we mi mi no blong wol. 17 Makem-Holi olgeta tru long trut blong yu. Tok blong yu i trut. 18 Olsem we yu bin sendem mi mi kam long wol, semak mi mi sendem olgeta i go long wol. 19 Mo mi bin makem-holi mi wan from olgeta, blong mi save makem-holi olgeta tru long trut. 20 Nao mi no stap prei from olgeta ya nomo, be from olgeta tu we bae oli biliv long mi tru long toktok blong olgeta. 21 Blong mekem se oli save kam wan olsem we yu Papa, yu stap insaed long mi, mo mi stap insaed long yu. Blong mekem se olgeta tu oli save kam wan long yumitu, mo wol i save biliv se yu bin sendem mi. 22 Mo glori we yu givim long mi, mi bin givim long olgeta, blong oli save kam wan olsem we yumitu wan nomo. 23 Mi stap insaed long olgeta, mo yu stap insaed long mi; blong oli save kam wan nomo we i stret gud, mo blong wol bae oli save se yu bin sendem mi mo yu lavem olgeta olsem yu lavem mi. 24 Papa, mi wantem se ol man we yu bin givim long mi, bae oli stap wetem mi long ples we mi mi stap. Blong oli save luk glori blong mi we yu bin givim long mi. From we yu lavem mi finis bifo long faondesen blong wol. 25 Holi Papa, wol oli no save yu, be mi mi save yu, mo olgeta ya oli save se yu bin sendem mi. 26 Mi bin talemaot nem blong yu long olgeta. Mo bae mi talemaot yet. Blong mekem se olsem we yu stap lavem mi, lav ya bae i save stap long olgeta, mo tu mi mi save stap insaed long olgeta.