¹ "Ol samting ya we mi stap talem long yufala, i blong mekem se yufala i no ronwe. ² Bae oli aotem yufala long sinagog, mo taem i stap kam we, man we i kilimded yufala, bae hem i ting se hem i stap mekem wok blong God. ³ Mo bae oli mekem ol samting ya long yufala from we oli no save Papa God mo mi. ⁴ Be mi mi bin talem ol samting ya long yufala, blong mekem se long taem we i hapen, bae yufala i save tingbaot we mi bin talem olsem long yufala. Bifo, mi no bin talem ol samting ya long yufala from we mi bin stap wetem yufala. ⁵ Naoia mi stap go long hem we i bin sendem mi, mo i nogat wan long yufala i askem mi se,'Yu stap go wea?' ⁶ Be from we mi bin talem olsem long yufala, i mekem se hat blong yufala i fulap long sori. ⁷ Be naoia mi talem trut long yufala. I gud long yufala blong mi aot. From sipos mi no aot, Helpa bae i no kam long yufala. Be sipos mi mi aot, bae mi sendem hem i kam long yufala. ⁸ Mo taem hem i kam, bae hem i poentem-aot ol sin mo stret fasin mo jajmen long wol. ⁹ Long saed blong sin from we oli no biliv long mi. ¹⁰ Long saed blong stret fasin from we bae mi go long Papa blong mi, mo bae yufala i nomo luk mi. ¹¹ Long saed blong jajmen from we rula blong wol ya bae i pas long jajmen. ¹² Mi gat fulap samting yet blong talem long yufala. Be i had tumas blong yufala i kasem naoia. ¹³ Be taem Spirit blong Trut i kam, bae hem i lidim yufala long olgeta trut. From bae hem i no talemaot tingting blong hem wan, be wanem we hem i harem, bae hem i talem. Mo bae hem i soemaot long yufala ol samting we bae oli kamtru. ¹⁴ Bae hem i leftemap glori blong mi. From bae hem i risivim ol samting blong mi, mo bae hem i soemaot long yufala. ¹⁵ Olgeta samting blong Papa God oli blong mi tu. From hemia, mi talem se,'Bae hem i kasem ol samting blong mi, mo bae hem i soemaot long yufala.' ¹⁶ I no longtaem, bae yufala i nomo luk mi. Mo smoltaem bakegen bae yufala i luk mi from mi stap go long Papa God." ¹⁷ Afta, samfala disaepol blong hem oli stori tugeta se,"Olsem wanem hem i stap talem long yumi se, I no longtaem, bae yufala i nomo luk mi. Mo smoltaem bakegen bae yufala i luk mi,' mo i talem se,'From mi Stap go long Papa God'?" ¹⁸ Ale, oli askem se, "Hem i stap talem wanem ya se 'I no longtaem'? Yumi no save se hem i talem wanem." ¹⁹ Naoia Jisas i save se oli wantem kwestinim hem, mo i askem olgeta se, "Yufala i stap kwestinim yufala we mi bin talem se, 'I no longtaem, bae yufala i nomo luk mi. Mo smoltaem bakegen bae yufala i luk mi'? ²⁰ I tru we i tru, mi talem long yufala. Bae yufala i krae mo singaot, be wol bae oli glad. Mo bae yufala i sori, be sori blong yufala bae i kam joy. ²¹ Taem wan woman i stap bonem bebi, hem i harem nogud from taem blong hem i kam, be taem hem i bonem bebi finis, hem i nomo tingbaot hadtaem ya, from hem i glad we wan pikinini i bon long wol. ²² Naoia yufala i sori, be bae mi luk yufala bakegen, mo bae hat blong yufala i glad, mo i nogat wan man i save tekemaot joy blong yufala. ²³ Long taem ya nao, bae yufala i no askem wan samting long mi. Be i tru we i tru, mi talem long yufala; eni samting we yufala i askem long Papa God tru long nem blong mi, bae hem i givim long yufala. ²⁴ Kasem naoia, yufala i no bin askem wan samting tru long nem blong mi. Askem mo bae yufala i kasem, blong mekem se joy blong yufala i fulap. ²⁵ 25 Mi bin toktok olsem long yufala. Be taem i stap kam we bae mi nomo toktok long parabol long yufala, be bae mi soemaot klia ol samting tru long nem blong Papa God long yufala. ²⁶ Long taem ya, bae yufala i askem ol samting tru long nem blong mi. Mo mi no stap talem long yufala se mi mas go askem long Papa God long bihaf blong yufala. ²⁷ Papa God i stap lavem yufala,from we yufala i lavem mi, mo from we yufala i biliv se mi kamaot long God. ²⁸ Mi bin kamaot long Papa God, mo mi bin kam long wol. Naoia, bae mi aot long wol, mo bae mi gobak long Papa God." ²⁹ Ol disaepol blong hem oli talem long hem se," Be naoia yu stap talem klia finis, yu no stap toktok long parabol. ³⁰ Mifala i sua finis se yu yu save olgeta samting. Mo yu no nidim blong eni man i askem yu. From samting ya nao, mifala i biliv se yu kamaot long God." ³¹ Jisas i askem long olgeta se, "Naoia yufala i biliv? ³² Yu luk, taem i stap kam naoia blong yufala i seraot, evri man oli go wanwan. Mo bae yufala i lego mi, mi stap mi wan. Be yet bae mi no stap mi wan nomo from Papa God i stap wetem mi. ³³ Mi bin talem ol samting ya long yufala blong mekem yufala i save gat pis tru long mi. Long wol, bae yufala i gat hadtaem, be yufala i mas glad. Mi bin winim wol ya finis."