¹ ''Mi nao mi tru stamba blong grep, mo Papa blong mi hem i man blong lukaotem garen. ² Evri branj blong grep we oli stap long mi be oli no karem frut,bae hem i katemaot. Be evri branj we oli karem frut, hem i klinim blong oli save karem moa frut. ³ Naoia yufala i klin tru long tok we mi bin talem long yufala. ⁴ Yufala i mas stap insaed long mi mo bae mi mi stap insaed long yufala. Spos wan branj i no joen long stamba, bae hem i no save karem frut. I semak, spos yufala i no joen long mi, bae yufala i no save karem frut. ⁵ Mi mi stampa,mo yufala i ol branj blm. Man we i stap insaed long mi, mo mi mi stap insaed long hem, hem i karem plante frut, from spos i no mi bae yufala i no save mekem wan samting. ⁶ Spos eni man i no joen long mi, God bae i sakemaot hem olsem we oli sakemaot wan branj blong tri mo istap redi blong drae, mo bae olgeta bah oli putum ol branj ya wan ples mo bae oli sakem igo long faea, mo bae faea bae i bonem olgeta evri wan. ⁷ Spos yufala i stap long mi, mo spos ol tok blong mi i stap long yufala, yufala i save askem wanem we yufala i wantem, mo bae wanem we yufala i wantem bae i kam long yufala. ⁸ Papa blong mi i kasem glori tru long ol samting ya, blong yufala i karem frut mo save prufum se yufala i ol disepol blong mi. ⁹ I olsem we Papa blong mi i lavem mi,mo Mi tu mi lavem yufala. Yufala imas stap long lav blong mi oltaem. ¹⁰ Spos yufala i kipim ol komanmen blong mi, bae yufala i stap long lav blong mi, olsem we mi mi kipim ol komanmen blong Papa blong mi mo mi stap long lav blong Hem. ¹¹ Mi bin talem ol samting ya long yufala, blong joy blong mi i save stap long yufala, mo joy blong yufala i save fulap. ¹² Hemia hemi komanmen blong mi se yufala i mas lavem wan wan long yufala. ¹³ I nogat lav we i moa bigwan bitim hemia-we man i givim laef blong hem long biaf blong ol fren blong hem. ¹⁴ Spos yufala i mekem wanem we mi talem long yufala, yufala i ol fren blong mi. ¹⁵ Bae mi nomo singaotem yufala se ol wokman, from wan wokman i no save wanem we masta blong hem i stap mekem. Be mi bin singaotem yufala se ol fren, hemia nao mi soemaot finis long yufala olgeta samting we mi bin harem long Papa blong mi. ¹⁶ Yufala i no bin jusum mi, be mi mi bin jusum yufala mo putum yufala blong yufala ol branj i save go mo karem frut, blong frut blong yufala bae i save stap long taem. Blong eni samting we yufala i askem long Papa God tru long nem blong mi, bae hem i givim long yufala. ¹⁷ Mi givim konammen ya long yufala se yufala i mas lavem yufala wanwan. ¹⁸ Spos wol ya i hetem yufala, yufala i mas save se oli bin hetem mi fastaem bifo we oli hetem yu. ¹⁹ Spos yufala ol man blong wol ya, wol i mas lavem ol man blong hem. Be from we yufala i no blong wol mo from we mi bin jusum yufala aot long wol, from samting ya nao wol i hetem yufala. ²⁰ Yufala i mas tingbaot toktok we mi bin talem long yufala se, 'Wokman i no hae bitim masta blong hem.' Spos oli bin spolem mi, bae oli spolem yufala tu. Spos oli bin folem toktok blong mi, bae oli folem toktok blong yufala tu. ²¹ Bae oli mekem olgeta samting ya long yufala from nem blong mi, from we oli no bin save hem we i sendem mi. ²² Spos mi no bin kam toktok long olgeta, bae oli no save se oli gat sin, be naoia oli no save haedem sin blong olgeta. ²³ Man we i heitem mi i heitem Papa blong mi tu. ²⁴ Spos mi no bin mekem olgeta wok we inogat man i bin mekem long foret blong olgeta, bae oli no save se oli gat sin, be naia oli bin luk, mo oli heitem mi mo Papa blong mi. ²⁵ Be i olsem, blong tok ya i save kamtru we loa blong olgeta i talem se, 'Oli heitem mi from nating nomo.' ²⁶ Taem we bae helpa ikam-we bae mi sendemaot hem long Papa God ikam long yufala, bae hem i givim witnes blong mi. Hemia nao i Spirit blong trut we i stap kam aot long Papa God. ²⁷ Yufala tu i mas wintes, from se yufala i bin stap wetem mi long stat kasem naia.