¹ ''Yufala ino letem hat blong yufala i trabol.Yufala i biliv long God;yufala i mas biliv long mi tu. ² Igat fulap naesfala ples long haos blong Papa blong mi.Spos no,mi bin talemaot long yufala finis.Be mi stap go blong mekem redi wan ples blong yufala. ³ Mo spos mi go blong mekem redi wan ples blong yufala,bae mi kam bak mo karem yufala ikam long mi,blong mekem se long weaples mi stap ,bae yufala i stap tu. ⁴ Yufala i save wea ples nao mi mi stap go lem.'' ⁵ Tomas i talem long Jisas se, ''Masta,mifala ino save wea ples nao yu stap go long hem;hao nao bae mifala i save rod?'' ⁶ Jisas i talem long hem se, ''Mi mi rod,mi mi trut,mo mi mi stamba blong laef;spos wan man ino pass tru long mi,hem bae i no save kam long Papa God. ⁷ Spos yufala i bin save mi,yufala i mas save Papa blong mi tu.Mo stat naoia ,yufala i save hem mo yufala i bin luk hem.'' ⁸ Filip i talem long Jisas se, ''Masta,soemaot Papa God long mifala,mo bae hemia hemi inaf long mifala.'' ⁹ Jisas i talem long hem se, ''Filip,mi bin stap long taem wetem yufala,be yu no save gud mi?Man we i bin luk mi,i bin luk Papa God.From wanem nao yu talem se, 'Soemaot Papa God long mifala'? ¹⁰ Yu no biliv se mi stap insaed long Papa God mo tu Papa God istap long mi?Ol toktok we mi stap talem long yufala,mi no talem mi wan.Be Papa God we i stap insaed long mi,hem nao i mekem wok ya. ¹¹ Yufala i mas bilivm mi se mi mi stap long Papa God mo Papa God i stap long mi.Spos no,yufala imas bilivim mi from ol wok nomo. ¹² I tru we,i tru,mi talem long yufala,man we i biliv long mi bae hem i mekem ol wok we mi stap mekem,be ol wok blong hem bae oli moa bigwan bitim olgeta,from we mi stap go long Papa blong mi. ¹³ Eni samting we yufala i askem tru long nem blong mi,bae mi mekem,blong Papa God i save kasem glori tru long Pikinini blong hem. ¹⁴ Spos yufala i askem eni samting tru long nem blong mi,bae mi mekem. ¹⁵ Spos yufala i lavem mi, kipim ol komanmen blong mi, ¹⁶ mo bae mi prea mo askem Papa God,mo bae hemi givim wan narafala helpa long yufala,we bae hem i save stap wetem yufala oltaem- ¹⁷ Hemi Spirit blong trut.We wol ya oli no save risivim hem,from we oli no luk hem mo oli no save hem.Be yufala i save hem,from hem i stap wetem yufala,mo bae i stap insaed long yufala. ¹⁸ Bae mi no save lego yufala i stap yufala nomo;Bae mi kam bak long yufala. ¹⁹ Bae ino long taem bambae wol ya bae inomo luk mi,be yufala i luk mi.From we mi laef,bae yufala i laef tu. ²⁰ Long dei ya bae yufala i save se mi stap insaed long Papa blong mi,mo yufala i stap insaed long mi,mo mi mi stap long yufala. ²¹ Man we i save ol komanmen blong mi mo i stap kipim olgeta hemi man we hem nao i lavem mi,mo man we i lavem mi Papa blong mi bae i lavem hem,mo bae mi lavem hem,mo ba mi soemaot mi wan long hem.'' ²² Judas (ino Judas Iskariot) i talem long Jisas se,Masta,hao nao bae yu save soemaot yu wan long mifala be i no long wol?'' ²³ Jisas i ansarem hem se, ''Spos eni man i lavem mi,bae hemi folem tok blong mi.Papa blong mi bae i lavem hem,mo bae mifala ikam long hem mo mekem ples blong stap wetem hem. ²⁴ Man we i no lavem mi hem i no folem ol tok blong mi.Tok we yufala i harem,ino blong mi,be blong Papa God we i sendem mi. ²⁵ Mi talem ol samting ya long yufala naoia,taem we mi stap yet wetem yufala. ²⁶ Be, Helpa ya we - hem i Holi Spirit,we Papa God bae i sendem long nem blong mi-bae hemi tijim olgeta samting long yufala,mo bae i mekem yufala i tingbaot evri samting we mi bin talem long yufala. ²⁷ Mi livim Pis i stap wetem yufala,mo mi givim Pis blong mi i kam long yufala.Mi no givim long yufala olsem we wol i stap givim.Yufala i no letem hat blong yufala i trabol.Mo yufala i no fraet. ²⁸ Yufala i bin harem we mi talem long yufala se, 'Mi stap go,be bae mi kambak long yufala,' Spos yufala i lavem mi,bae yufala i glad from we mi talem se, 'Mi go long Papa God.'From Papa blong mi i hae bitim mi. ²⁹ Naoia Mi talem long yufala bifo we i hapen,blong mekem se long taem we bae i kamtru,yufala i save biliv. ³⁰ Afta long taem ya,bae mi no stori fulap wetem yufala.From rula blong wol ya istap kam,be hem i no faenem wan rong agensem mi. ³¹ Be,mi stap mekem ol komanmen we Papa God i bin givim long mi,blong mekem se wol oli save se mi lavem Papa God.Ale,yufala i girap yumi go aot.''