¹ Nao bifo long lafet blong pasova.Jisas i save se taem blong hem i stap kam nao we bae hem i aot long wol ya mo igo bak long Papa blong hem.Hem i lavem ol man blong hem we oli stap long wol ya,mo bae hem i lavem olgeta kasem en. ² Long taem blong kakai i finis,nao setan i putum tingting ya long hat blong boe blong Saemon,Judas Iskariot,blong salemaot Jisas. ³ Jisas i save finis se Papa God i bin givim olgeta samting long han blong hem.Mo ham i bin kamaot long God,mo istap gobak long God. ⁴ -Hem i girap long taem blong kakai mo i karem aot jaket blong hem.Nao hemi karem wan tawel mo i fasem raonem hem. ⁵ Nao hem i stap kapsaedem wota long wan dis mo i stat blong wasem leg blong ol disaepol mo i stap waipem leg blong olgeta wetem tawel we hem i fasem raon bodi blm. ⁶ Hem i kam long Saemon Pita,mo Pita i talem long hem se, ''Masta,bambae yu wasem leg blong mi?'' ⁷ Jisas i ansa se, ''Wanem we mi stap mekem naoia yu yu no andastanem,be bae yu jesta kasem samting ya bihaen.'' ⁸ Pita i talem long hem se, ''Bae yu neva wasem leg blong mi.'' Jisas i ansarem hem se, ''Spos we mi no wasem leg blong yu,yu no save felosip wetem mi.'' ⁹ Saemon Pita i talem long Jisas se, ''Masta,yu no wasem leg blong mi nomo,be han blong mi mo hed blong mi tu.'' ¹⁰ Jisas i talem long hem se, ''Man we mi klinim,ino nidim wan samting,be blong mi wasem leg nomo,from hem i klin finis.Yufala i klin,be ino yufala evriwan.'' ¹¹ (From Jisas i save finis se huia bae i salemaot hem;from samting ya nao, ''Hem i talem se ino evri wan long yufala i klin.'') ¹² Afta we Jisas i wasem leg blong olgeta mo i putum gud klos blong hem mo i sidaon bakegen,nao i talem long olgeta se, ''Yufala i andastanem wanem we mi jesta mekem long yufala? ¹³ Yufala i singaotem mi 'Tija' mo 'Masta',mo yufala i talem i stret,from mi ya nao. ¹⁴ Mi Tija mo Masta,be mi bin wasem leg blong yufala.From samting ya,yufala i sud wasem ol leg blong yufala wanwan. ¹⁵ Mi jes soem wan eksampol long yufala,se yufala i sud mekem olsem we mi jesta mekem long yufala. ¹⁶ I tru, we i tru,Mi talem long yufala,wan wokman i no hae bitim masta blong hem;mo man we i kam i no hae bitim man we i sendem hem. ¹⁷ Spos yufala i save ol samting ya,bae yufala i glad spos we yufala i mekem. ¹⁸ Mi no stap tokbaot yufala evriwan.Mi mi save huia mi bin jusum -be skripja i mas kamtru we i talem se, 'Man we i kakai bred wetem mi hem i pruput long mi.' ¹⁹ Naoia mi talem long yufala bifo we bae i hapen,blong mekem se taem we bae i hapen,bae yufala i save biliv se mi mi Mesaea. ²⁰ I tru, we i tru,mi talem long yufala.Man we i welkamem eni man we mi sendem,hem i welkamem mi.Mo man we i welkamem mi ,i welkamem hem we i bin sendem mi.'' ²¹ Taem we Jisas i talem olsem,hem i harem nogud long spirit blong hem.Mo hem i givim wintes se, ''I tru we i tru mi talem long yufala se wan long yufala bae i salemaot mi.'' ²² Ol disaepol oli stap luk wan wan long olgeta,mo oli gat kwesten se hem i stap tokbaot huia. ²³ Nao i gat wan disaepol we istap lei klosap long jes blong Jisas,we Jisas i lavem hem. ²⁴ Ale,Saemon Pita i mekem wan saen long hem blong askem se huia nao bae i mekem olsem we Jisas i tokbaot. ²⁵ Nao hem i kam klosap moa long Jisas,mo i askem se, ''Masta,huia man ya?'' ²⁶ Nao Jisas i ansa se, ''Bae mi draonem bred mo givim long man ya.''mo hem i draonem bred,mo i givim long Judas Iskarikot,boe blong Saemon. ²⁷ Mo afta long bred ya,setan igo insaed long hem.Jisas i talem long hem se, ''Wanem we yu stap mekem, yu go mekem hariap.'' ²⁸ Nao ino gat wan man long tebol ya i save from wanem hem i talem olsem long Judas. ²⁹ Be from we Judas i holem pes blong mani,nao sam oli ting se Jisas i talem long hem se, ''Yu go pem ol samting we yumi nidim long lafet,'' O bae hem i givim wan samting long ol puaman. ³⁰ Afta we Judas i risivim bred blong hem,hem i aot long semtaem ya nomo.Mo long taem ya hemi tudak finis. ³¹ Afta we Judas i aot,Jisas i talem se, ''Naoia i taem blong oli leftemap glori blong Pikinini blong Man,mo God bae ikasem glori tru long hem. ³² Spos God i karem glori blm tru long hem,God bae i givim glori igo long Pikinini blong hem wan,mo bae hem i jesta glorifaem hem wan. ³³ Ol smol pikinini,mi gat smol taem yet blong stap wetem yufala.Bae yufala i lukaotem mi,mo olsem we mi talem long ol Jiu, 'Wea ples we mi go long hem,bae yufala ino save kam.'Mo naoia mi stap talem sem samtimg ya long yufala. ³⁴ Mi mi givim wan niufala komanmen long yufala,blong yufala i lavem yufala wanwan.Olsem we mi stap lavem yufala,bae yufala i mas lavem yufala wanwan. ³⁵ Tru long samting ya nao evri man bae oli save se yufala ol disaepol blong mi taem yufala igat lav long yufala wanwan.'' ³⁶ Saemon Pita i talem long hem se, ''Masta,bae yu go wea?''Jisas i ansa se, ''Bae mi go wea,yufala inomo save folem mi,be bae yufala i jesta kam bihaen.'' ³⁷ Pita i talem long Jisas se, ''Masta,from wanem nao mi no save folem yu naoia?Bae mi givim laef blong mi from yu.'' ³⁸ Jisas i ansarem hem se, ''bambae yu givim laef blong yu long mi?I tru we i tru,mi talem long yu,bifo we faol bae i singaot,bae yu talemaot tri taem se yu no save mi.''