¹ Nikwainda mazuba masyoonto Jesu wakasika kuzwa ku Kapenaum, wakavwigwa kuti wasika. ² Bantu banji bakabungana ooko cakuti tikwakacili mwenya wakaceede, nikuba amulyango, eelyo wakabakambaukila. ³ Mpamunya kwasika baalumi kuli nguwe bakaleta mulema; bantu bone mbibakamujisi. ⁴ Akaambo kakuvwula kwabantu, tibaacikonzya kusika munsi lyakwe, pele bakavwumbula ciluli kululamika akaivwi Jesu, nibakamana kuvwumbula bakayala lusasa akalede mwalumi mulema. ⁵ Nakabona lusyomo lwabo, Jesu wakati kumulema, ''Mwanaangu, zinyonyoono zyako zyalekelelwa.'' ⁶ Ino bamwi babalembi bakakkede munsi, bakayeya mumyoyo yabo, ⁷ ''Nkaambo nzi ooyu muntu ncakambwida bobu? Usampula biya! Nguni ukonzya kulekelela milandu kunze kwa Leza alike?'' ⁸ Mpamunya-mpamunya Jesu wakazyiba mumuuya wakwe eeco ncibakali kuyeya mumyoyo yabo. wakati kuli mbambo, ''Nkaambo nzi ncimuyeya ceeci mumyoyo yanu? ⁹ Ncili citeteete, kwamba ku muntu ooyu mulema, 'Zinyonyoono zyako zyalekelelwa,' naa kuti, 'Nyamuka, bweza lusasa lwako enda'? ¹⁰ Pele kuti muzyibe kuti mwanaa muntu ulijisi nguzu zyakulekelela milandu,'' wakati kumulema. ¹¹ ''Ndakwambila, nyamuka, bweza lusasa lwako,kuya kung'anda yako. ¹² ''Wakanyamuka mpamunya-mpamunya wakabweza lusasa lwakwe, wakazwa mung'anda kumesyo abantu boonse, eelyo bakakankamana akupa kulumbaizya kuli Leza, bakati, ''Tatuna cibwenye cili boobu.'' ¹³ Wakaunka alimwi kunkomwe yalwizi, bantu banji bakasi kuli nguwe, wakabayisya. ¹⁴ Nakali kuya bwendeenda, wakabona Levi simutelo mwanaa Alufasi kakkede amulimo wakwe, wakati kuli nguwe, ''Nditobele,'' Eelyo Levi wakanyamuka akumutobela. ¹⁵ Eelyo Jesu bakakkala kulya mung'anda ya Levi antoomwe abasimutelo banji, abasizinyonyoono, alimwi abasikwiya, nkaambo bakali banji alimwi bakamutobela. ¹⁶ Lino balembi, bankamu yabafalisi, nibakabona kuti Jesu wakali kulya antoomwe abasizinyoono abasimutelo, bakati kuli basikwiiya, ''Nkaambo nzi ncalya antomwe abasimutelo alimwi abasizinyonyoono?'' ¹⁷ Lino Jesu nakavwa ceeci , wakati kuli mbabo, ''Bantu bayumu mumubili tabayandiki musilisi; balikke aabo baciswa. Tindakalonda baluleme, pele ndakalonda basizinyonyoono.'' ¹⁸ Lino basikwiya ba Johani abafalisi bakali kulyimya kulya. Kwakasika bamwi bantu kuli nguwe akuti, ''Nkaambo nzi basikwiya ba Johani abasikwiya babafalisi balalyimya kulya, pele basikwiya bako tabalyimyi?'' ¹⁹ Jesu wakati kuli mbabo, ''Sena basikulangilizya mucado inga balyimya sibwiinga kacili aambabo? Kuti kabacili asibwinga, takozyi kulyimya pe. ²⁰ Pele mazuba ayakusika ciindi sibwinga nayakubwezegwa kuzwa kuli mbabo, mumazuba aayo baya kulyimya. ²¹ Takwe ukonzya kusuma kasani kanyowana kucisani cakaindi. Nkaambo inga cigamba ciyakundeukila limwi, eelyo cibbonkwi ciyakwindilila. ²² Kunyina naba omwe ukonzya kubika waini mupya munkomwe yacikutu cawaini cakabeleka kale. Nkaambo waini yakubboloka mpamunya zyoonse waini acikutu ziyakutakanika. Kuli ceeco waini mupyaa ubikwa muciyobwedo cipya.'' ²³ Mubuzuba bwa Nsabata Jesu wakainda akati kamyuunda yamaila, oomo basikwiya bakwe bakatalika kugomena zyuumbu zyamaila nibakali kuyaabwenda. ²⁴ Bafalisi bakati kuli nguwe, ''Langa, nkaambo nzi ncibacita citali mumulawu mubuzuba bwa Nsabata?'' ²⁵ Wakaamba kuli mbabo, ''Sena tamuna bala ncakacita Davidi ciindi nibakali kuyanda lugwasyo a nzala (Ilwakwe abantu mbakali limwi), ²⁶ bakanjila mung'anda ya Leza ciindi Abiyata nakali mupaizi mupati, akulya cinkwa cacitulo, citali mulawo kuli umwi aumwi kuti alye cita bapaizi balikke mbuba zumizidwe kulya cinkwa eeci, pele walo wakapa abaabo mbakali limwi.'' ²⁷ Jesu wakati, ''Nsabata yakabambilwa muntu, kutali muntu kubambilwa Nsabata. ²⁸ Aboobo, mwanaa muntu ngo Mwami, nibuba buzuba bwa Nsabata.''