¹ Wakazwa ooko akubweeda ku cisi cakwabo, alimwi basikwiya bakatobela. ² Buzuba bwa Nsabata nibwasika, wakayisya musinagogo. Bunji bwabantu bakamuvwa akugambwa. Bakati, ''Wakazijana kuli njiisyo eeyi? Mbusongo nzi oobu mbwa kapegwa? Maleele nzi aaya ngacita amanza akwe? ³ Sena tali sikubeza, mwanaa Maliya mwanike a Jemusi a Josefa, Judasi a Saimoni? Sena bacizyi tatuli limwi?'' Wakaba tyopya Jesu. ⁴ Ino Jesu wakati kuli mbabo, ''Musinsimi takwe bulemu, mucisi cakwabo akati kamukowa amukwasyi wakwe,'' ⁵ Takwe mulimo mupati ngwakacita, pele biyo kutandabika maanza aakwe abantu basyoonto bakacisidwe akubaponya. ⁶ Wakagambwa mukutazumina kwabo. Eelyo wakazinguluka muminzi kuyabuyisya. ⁷ Eelyo wakaita bali kkumi ababili akutalika kubatuma bobilo-bobilo, akubapa nguzu zyakutanda myuuya isofwede, ⁸ akubalailila kuti babule ancibabweza mulwendo lwabo, nociba cinkwa, bbeeke, alimwi naaba mali azikwama zyabo, ccita buyo musako, ⁹ eelyo musame biyo mpato alimwi mutasami zisani zyobilo. ¹⁰ Wakabambila wakati, ''Kufwumbwa ng'anda njimuya kunjila, mukakkalilile kusikila mukazwe ooko. ¹¹ Kufwumbwa munzi utakamutambuli akumuswiilila, mukakunkumune kasuko kamatende aanu kutegwa cikabe cicenjezyo kuli mbabo.'' ¹² Bakaunka akukambauka kuti bantu basanduke. ¹³ Bakatanda myuuya mibi akunanika mafuta kubantu baciswa banji akubaponya. ¹⁴ Mwami Helodi wakavwa eeci, izina lya Jesu lyakaba aampuwo kapati. Bamwi bakali kuti, ''Johani mubbizi wakabuka muli bafwide, nkankaako maleele anguzu zilabeleka anguwe,'' ¹⁵ Bamwi bakali kuti, ''Ngu Elija,'' Mbumunya bamwi bakali kuti, ''Musinsimi, mbuli umwi musinsimi wakaindi.'' ¹⁶ Pele Helodi nakavwa ceeci wakati, ''Johani, ngundakakosola mutwe, wabuka.'' ¹⁷ Eelyo Helodi wakatuma kuti Johani ajatwe abikkwe muntolongo mukaambo ka Helodiyasi (muka mwanikaakwe Filipo), nkaambo wakali mukwete ¹⁸ Mbuli Johani mbwakambila Helodi, ''Tacili mumulawo kukwata muka mwanikaako.'' ¹⁹ Pele Helodiyasi wakanyema akumujanina kaambo kuti amujaye, pele ticakali kukonzeka, ²⁰ nkaambo Helodi wakali kumuyoowa Johani; wakalizi kuti wakali muntu ululeme uulasalala, nkaambo kaako wakamukwabilila. Nikuba kuti wakali kupenzegwa mumoyo nakamuvwa, wakali kuyandisisya kumu swiilila cakukondwa. ²¹ Wakazikuba acoolwe nibwakasika buzuba bwakuzyalwa kwa Helodi, eelyo wakabamba cilalilo ca balemekwa babulelo bwakwe, bapati balumamba abeendelezi baku Galileya. ²² Mwanaa Helodiyasi musimbi wakanjila mukati akubazyanina, eelyo Helodi wakakondwa antoomwe a beenzu bakwe. Mwami Helodi wakati kumwana musimbi, ''Ndilombe kufwumbwa cintu ncuyanda ndilakupa.'' ²³ Wakalumbila mukwamba kwakwe kati, ''Kufwumbwa ncutindilombe, kusikila kucisela canyika yangu, ndilakupa.'' ²⁴ Wakazwa anze akwambila banyina kuti, ''Ino ndilalomba nzi?'' Bakavwila bakati, ''Mutwe wa Johani mubbizi.'' ²⁵ Cakufwambaana wakapiluka ku mwami Helodi, akulomba, kati, ''Ndiyanda kuti ndimunya ino , mundipe mutwe wa Johani mubbizi mumutiba.'' ²⁶ Nikuba kuti eeci cakamuusisya kapati mwami, takwe mbakali kukaka nkaambo kakuti wakalicikonkezezye akumpela lyabeenzu bakazide kupobwe. ²⁷ Eelyo mwami wakatuma umwi sikalumamba kuzwa kuli baabo bamulinda akumutuma kuti akamwetele mutwe wa Johani. Mulindizi wakainka akuyakumu kukosola mutwe muntolongo. ²⁸ Wakaweta mutwe wa Johani mumutiba akuupa kumwana musimbi, walo wakapa banyina. ²⁹ Lino basikwiya bavwe boobo , akubweza mutumba bakauzika mucuumbwe. ³⁰ Baapositolo bakasika antoomwe aJesu, bakamwambila zyoonse nzibakacita akuyisya. ³¹ Eelyo wakati kuli mbabo, ''Amweende nywebo lwanu kubusena kumwine mukapumune mukaindi kasyoonto.'' Nkaambo mbanji bakali kuboola akweenda, alimwi tibakalijisi ciindi cakulya. ³² Lino bakazwa bwaato bakeenda kuya kubusena bumwinye balikke. ³³ Pele bakababona nibakazwa alimwi banji bakabaziba kuti mbabo, eelyo bantu bakeenda kuzwa kumasi oonse kuyabulunduka amaulu kucilizya mbabo, bakasika kubusena ooko basikwiya a Jesu kabatanasika. ³⁴ Nibakasika kunkomwe , Jesu wakabona bantu banji alimwi wakeetezegwa nkaambo bakali mbuli mbelele zitako mweembezi. lino wakatalika kubayisya zintu zinji. ³⁵ Nilyakayanda kubbila zuba, basikwiya bakwe basika kuli nguwe akuti, ''Awa mpacimpayuma alimwi ciindi camana. ³⁶ Batume bainke muzisi zili minsi-munsi alimwi amuminzi kutegwa bakalyulile zyakulya.'' ³⁷ Pele wakabavwiila wakati, '' Kamubapa cakulya.'' Bakati kuli nguwe, ''Sena tweende tukaule zinkwa zyamiyanda yobilo ya mali tubape balye?'' ³⁸ Wakati kuli mbabo, ''Mujisi zinkwa zyongaye? mweende mukalange.'' Ino nibakalanga, bakati, '' Twajana zinkwa zili musanu answi zyobilo.'' ³⁹ Wakabambila bantu kuti bakkale mutubunga, atala abwizu. ⁴⁰ Bakakkala ansi mumabunga amiyanda amabunga amakumi musanu. ⁴¹ Wakabweza zinkwa musanu answi zyobilo, alimwi wakalungumana kujulu, wakazileleka akuzikomona zinkwa akubapa basikwiya bakwe kuti babaabanye bantu. Azyalo nswi zyobilo wakazyabanya kubantu boonse. ⁴² Boonse bakalya kusikila bakkuta. ⁴³ Bakabwezelela bunkumu-nkumu bwazinkwa, yakavwula mitaanga ilikkumi ayobilo alimwi abunkumu-nkumu bwanswi. ⁴⁴ Bantu bakali zyuulu musanu bakalya zinkwa. ⁴⁵ Mpamunya wakambila basikwiya kuti banjile mubwato basolwede kuya mutalaa lwizi, ku Bbetisaida, nakacili kulayana abantu. ⁴⁶ Nibakamana kweenda boonse, wakunka atala amulundu kukupaila. ⁴⁷ Nikwakaba kumazuba, abwalo bwato bwakali akati kalwizi, walo wakali alikke kutala. ⁴⁸ Wakabona kuti bapengaana kukwasula bwato, nkaambo kamuwo wakali kupunga kulanga mbabo. Kubucedo kakucisiya-siya wakasika kuli mbabo, keenda atalaa lwizi alimwi kayanda kubaindilila. ⁴⁹ Pele nibakamubona keenda atalaa lwizi, bakalila, bakali kuyeeya kuti musangu, ⁵⁰ nkaambo nibakamubona bakayoowa. Mpamunya biyo wakaamba kuli mbabo, wakati, ''Amukkazike myoyo! Ndime! Mutayoowi!'' ⁵¹ Wakanjila mubwato ambabo , amuwo wakaleka kupunga. Bakagambwa cakumaninina. ⁵² Akaambo kakutavwisisya maleele azinkwa ncakali kwamba. Myoyo yabo yakayumisigwa. ⁵³ Nibakalunduka lwizi, bakasika kunyika ya Genesaleti akubwaanga bwato. ⁵⁴ Nibakazwa mubwato, bantu bakamuziba mpamunya biyo, ⁵⁵ bakalunduka cisi coonse akweeta bacisidwe amasasa aabo kufwuumbwa nkubamuvwa kuti nkwabede. ⁵⁶ Kufwumbwa minzi njakanjila, niiba minzi, nokuba mukati mumadolopo, bakali kunga babikkwa baciswa kumisyika. Bakali kumulomba kuti abazumizye bacikonzye kuguma biyo kumamanino acisani cakwe, eelyo bantu banji bakamuguma bakapona.