¹ Namu mui, mui gowaregao gemi thoa awa awai e galamai. ² E thoa awa awa e galamai mui go mauliwai alimapara thalewanai. Mui thagila velena gena iavuai gomauliwai, karoverave auri nauri elerai na temoni eulavunu nia. ³ Eaunilimalima veairi thaorai ia mai amuilio, galama maulina aririwa magiawai, e aunipara gena ririwa avakamu ra wai. Ia alimaparai iavu vua melori, aunilimalima maparari veairi. ⁴ Namu Palau venuavi ai rinaa vagi repana gena ulamagi pakunai gaurai ia eulamagi rana. ⁵ Thoa awa awai awaregao thaonai, eva mauli wai rao Keriso thaonai-veuga thaona na vevamauli go rawaliao. ⁶ Palauna ia eva laai koukourao Keriso ria,e Palauna ia eva alu koukourao kupa vanuanai Keriso Iesu thaonai, ⁷ pe rigolo geve kapi maini rigolo rai, oru ava oru ava rinaa ri pene varipari gena veuga evamagaiao ia elerai Keriso Iesu thaonai. ⁸ Veuga thaona na mui veva mauli gorawaliao, veva aunaauna thaona na, enori mui elemuina evamaio,e wara Palau gena veveni, ⁹ nori ulavunu na, pe auapua peene vevaoloa. ¹⁰ Repana ia Palau gena ulavunu auri, Keriso thalewana e gegelanai emanerao ulavunu nanamari pevawalari Palauna rauvagi vega euamagiao ia gera, pe maulinai pe thoa. ¹¹ Gaurai pigo uamagi thao mui vevaavua auniparai. Mui wara ''nori peritome'' aunilimalima na imarana geulavunu agiani geilagiani ''peritome. '' ¹² Wa ora rai mui Keriso ria mavepaamui, vanua polu Israela aunilimalimari elerai, aupolu ilagavu mauana elenai, noai gemi veraramani e noai gemi Palau ealimaparai. ¹³ Namu evana Iesu Keriso lalana na pemi vathoa avimui Palau elenai. ¹⁴ Repana ia iagera maino. Lualua eva apunao. Ia auniparana na ia ewarerawai kanana elovoao. ¹⁵ Gauna wara rova ealavagirao pe, iana aunilimalima valivuna apua ia thaonai pene vamagaia, gaurai maino evawalao. ¹⁶ Keriso na aunilimalima ekapa waiani aunipara apunai Palau elenai satauro thaona na, mauli ravaravana eva waregani. ¹⁷ Iesu na maino eveamai agiao paa rarau auri e eleveavi auri elemuiai. ¹⁸ Iesu thaona na Veaa Palauna apunai ia gera avagaama eveala pa ni amana elenai. ¹⁹ Gaurai,mui vevaavua aumui evana mui nori aupolu pa vanua polu. Namu mui vanua ava Palau gena veaa aunilimalima ri e Palau gena numa auri. ²⁰ Mui Palau gena veunagi auri e peroveta auri geria iligai goruao, e Iesu Keriso mui gemi mauli vauna. ²¹ Ia thaonai numa maparana erua koukouni e ekalani Velegaua thaonai. ²² Ia thaonai mui mai gove olekoukouni ala laiwalaiwa avana Palau gena Veaa Palauna thaonai.