¹ Paulo, Keriso Iesu gena veunagi auna Palau gena ririwai, Palau gena aunilimalima veaa mui Epesoai, Iesu Keriso elenai gemi veva auna auna kamu vagi. ² Vewaa e Maino mui gemi ia gera Palau ia amari e Velegaua Iesu Keriso elerana. ³ Palau ia gera velegau Iesu Keriso amana pe varagea, repana ia eva namathao, palaua vevanamarai kupai Keriso thaonai. ⁴ Alimapara gena ma mai Palauna ia evirigithao, pe ia pe veaa e noai kepikepiri pealu ia vilanai ulamagiai. ⁵ Kapi ia pene nau vanagi ri ia evirithao, ia nauna Iesu Keriso thaonai gena ririwa gelegele nai. ⁶ Ia gena venau vanagi ia elerai ganina emi magainia, gena veuga vewaa vewaana thaona na iana eulamagi iwa vagiao auna ia evenirao noai voina. ⁷ Iesu Keriso thaonai iana vevamauli arawaliao, ia lalana thaona na e galama veilagiwai ewalao, ia gena rinaa vewa vewaari thaorana. ⁸ Ia gena vewaa ia thaarai ethava aliao, uamagi ripai e thaonekai. ⁹ Palau gena ririwa ganina vevunina, ia elerai eva magaiao repana iana eiathao ia vereleo, gauna Keriso ai evamagaiao, ¹⁰ Eia thao ao e evalavuao ora pene vegugulu, oranai gau maparari pene gapi koukouri, kupai e alimaparai repa apunamo kapulenai pige vemia, Keriso mai. ¹¹ Keriso thaonai ia egapi laairao vele. Ia euamagi reparepa vagirao, maa auna gena valavuai, repana egau maparari ia gena ririwai eulavunu agirana. ¹² Palauna ia egapi laairao ia pe veleava pe, ia reparepa auri Keriso elenai peveraramani, gena vewaa vevaragenai. ¹³ Auna auna thorina goamonagiao, mui mai Keriso thaonai gemi nama valina e Veaa Palauna thaonai eole oamuio, ¹⁴ nama pevevaia thori gavu auna wara ia, pene thao pe vevai gugulua gena vewaa vevaragenai. ¹⁵ Egauri pakurai, gemi veva auna auna aamonagiao Iesu Velegaua thaonai e gemi ulamagi Palau gena aunilimalima veaa ri elerai, ¹⁶ Palau avanama vanagi vanagiani, mui pakumuiai geku veni vuavua thaorai. ¹⁷ Thau geku veni vuavua thaorai, ia gera vele Iesu Keriso, vewaa amari, iana thaoneka palauna e thaonekana maavanagina pene veni mui. ¹⁸ Thau geku veni vuavuai naini thaomui maari pene vathaliri, pe wa veraramani pigo ripatha raagauna egogomuio e ia gena rinaa vewaa vewaari pigo rawaliri Palau gena veaa aunilimalima ri aravarai. ¹⁹ Geku veni vuavua thaorai anogini pe noai vagelegelena iavuna pogoro ripatha ia riari ave vauna auna ni elerai, ia gena ulavunu iliga iwavagi ai. ²⁰ E iavu wara iavunamo Palauna Keriso thaonai eulavunu agiao, waregana evalaiao e kupa vanuanai ripana gena avanai eva alu aliao. ²¹ Keriso eva aluao gauunai vagi, raa vele iwari e vevai rakiri e iavu iwa vagi auri thaarai iana pene vele agiri, thara irau irau pige ilagiri, Keriso ia pene vele, nori e uluai mo, namu rigolo rogeve kapi mainia mai. ²² Palauna gau maparari Keriso gaena kapulenai eolerao e rupu eveniao gau maparari erepathao. ²³ Rupu ia auniparana, ia maguguluna nori avana.