¹ Ke ta tho eha nango era re emara. Nango ta pure siro embo arumba hansa mamo ta ingere pe ai arumbena. ² Nimore oro otofu ta akifo ra eto embo ka tapa ai mohoija ue, aja, embo miaera. Bada mi arira. ³ O pa overe te i ai fukari evekari te evire, pure siro, embore tapa-tapa avikari angato evire atuja. ⁴ Jesu enda ei mihija kito pure siro embo re mane aehija, amita pe re pure siro embo re maha hambaru jo ai amiha avo eto . ⁵ Embo enana re ungai amutu sirikari amiha avo thamo ai arire eto ari ra. Samuna ohuja ue God mi Moses ta thurukari oro avo hijae kithi ta. Mine Mama God mi ena. Kijo, tonda petapata atoa avo tiri ai koa ue jingato kutha ne kia nangota orereto ejo. ⁶ Rate eha re Jesu mi ari petapata avo oneto humbuna eto orei ai oketo ujiji te ke akakari aufa avo kore. ⁷ Mine ke kithi ta avo akari kito re ke ambo ta arire mane vuvurae ehija. ⁸ Rate God mi kiaja avo enda embo-meni mi puriore kito engato aja, "Iji vuvuto aufa kivo Israel ta orope te, eto Judah ta orope. Nau ke eha re engato ra." Bada mi ija. ⁹ Nane mi enata ta aku thavo ta ingere avo ijikito Egypt toto ufahai vuvuhara angato manera. Ke nau evire enana mi jikae ara avo eto ku vuthekurana. ¹⁰ Bada ke ingato ija, " Ke evire Israel ta oro pe amika ationa iji ambo ai." Bada mi ija, "Hambaru jo ta ke re siro ai hijono mehetuja eto jo enana tai kajatona. Namo enana ta God atona, eto enana avo embo-meni nau atora. ¹¹ Eto enana ami embo ingithi ta, eto amita nameni ta, "Bada ke mane atuja. Amita pe re namore petapata ami kora, isoho eto pambuto embo pemi. ¹² Enana ta sasamuna avo othembeto toatona eto ting eto mane ji keti ona." ¹³ "Ke eha evi" ie God mi ena, ke kithi ta avire mihae pe mihae atuja.