¹ Giti jijigegari de edo embo nenei amei Jerusalem edo bugusera amimi umo jiroroka edo dada isera. ² Ungoi uso ambojimbi ingo segae dongono de ambe indera awa gosisera. ³ Ainda be awa giti jijigegari de Jew embobo de awa indari indae gitida awa ungo ingo segedo era,ko awa ungoda ewowo da agodari ra. ⁴ Edo giti jijigegari buro yei da edo bugudo era awa ungo indari indae gitida,sasaka kain edo era. Edo ungo ungoda ewowo da agodari awa ambo-ambo ise indari ajiregedo era,aga de,ougono de,tewo segari edo indari-indari anumba sirigedo era. ⁵ Giti jijigegari de edo embo nenei de mi Iesu nganega isera,"Ro embo iso ambojimbi ewowo da agodari ambo-ambo ea edo eri,ko ungo ingo segae ambe indera?" ⁶ Ate umo ungo da yei sisira,"Isiah mi ro ijegadira awa isaga sisira awa ingo ge busari embobo.Isaiah mi jiwusira,'embo mei eiawa na tepo be mi sapo edo era,ate ungo da jo awa aike bera. ⁷ Ungo na tumondebain tepo edo era,embo da agodari awa atopaputise'. ⁸ Ingo Mamo da agodari awa jajovegurise edo enbo da agodari awa jigido edo ewa." ⁹ Edo umo ungo da yei sisira," Ingo Mamo da agodari be bejedo ise ingo da ewowo da agodari ambo-ambo edewa! ¹⁰ Ko Moses mi sisira,'Iso mama de aia de awa sapo eio,'edo,'Amimi ge biae uso mamo aia ga da yei sadira amone betadira.' ¹¹ Awarate,ingo eiedo sedo ewa,'Embo amimi uso mamo ai ga da yei sadira," Iso kondade ari naso yeida badesa ane Corban (ainda be awa 'mamo da kando itari')- ¹² Awa ise eowo ungoda aimamono da yei ewamei ro ae etera awa gajedo ewa. ¹³ Ingo ewowo da agodari mi eowo mamo da agodari awa be ae edo ira. Edo awodo tete jiwae edo ewa." ¹⁴ Umo embo berari setiri bugero ungo da yei sisira,'' Ingo berari dengoro edo ge eiawa ingiwo. ¹⁵ Rora ro ponda edo joda torido ira amimi ae embo awa jimbo aera. Ate rora ro joda edo ijegedo ira ami euri jimbo edo era." ¹⁷ Awa edo Iesu embo berari dodo mando joda toriri uso ambojimbi mi inia ge sisira ainda be awa nganega isera. ¹⁸ Iesu mi mina sisira,"Ingo daedo ingae sumba evita? Ingo gadi jarevita,ko rora ro ponda edo joda torido ira amimi ae embo awa jimbo aera, ¹⁹ Ainda be awa rora awa gomonda torae ra,ate tinida torido mambudo je da ijegedo ira?"Ge awa sise isaga isira awa indari berari awa ewamei. ²⁰ Edo sisira,"Ane rora ro embo da jo da edo ijegedo ira amimi euri jimbo edo ira. ²¹ Ainda be awa embo da jo da edo bebegae ijegedo era awa eire-binei da kotari,dita baita,bengono,dari betari, ²² viro-paima,jinaga,binei da wasiri,engega ari,dongono da atari,ji-dumo,yaviri. ²³ Bebegae berari ene jo da edo ijegurise euri embo jimbo edo era." ²⁴ Umo yei awa dodo busu Tyre edo Sidon ainda mambusira. Edo embo mi umo georase ujoae edo mando joda unjugurisira,ate embo umo ainda atira awodo awa gosisera. ²⁵ Awarate evetu da uso gagara kiambu asisi biae mi bundari awa ge ingido Iesu da yei bugusira,edo umo Iesu da dombuda baingo dederi isira. ²⁶ Evetu eiawa nati Greece evetu ra,umo awa ewowo nei ra. Umo binei uso gagara da joda awa Iesu mi ondarase benunu sisira. ²⁷ Iesu mi uso yei sisira,"Ene kinapeina da indari ra. Ko kinapeina da indari awa budo sino da itae edo era." ²⁸ Ate evetu awa mina sisira," Awara Iesu,ate ko gaga juda momono wosuru ne sino mane daedo indido era." ²⁹ Iesu mi uso yei sisira,"Ge emimi imo wujegurena mambuio. Binei iso gagara da joda awa ijegetira." ³⁰ Evetu awa mando da mambudo uso gagara awa ewari besi da pasido atiri gosisira,binei awa ijegedo mambusira. ³¹ Edo Iesu Tyre dodo,Sidon awodo diugedo Galillee papo,busu jawo Decapolis ainda mendo da mambusira. ³² Edo embomei ainda mi embo da- dengoro junjugari,ge sae awa Iesu mi ewamei arase budo bugusera. ³³ Iesu embo awa demonda kundo yiko,kosiwa edo uso ingo mi embo ainda dengoro de be-de ainda itido sisira,"Ephphatha," ainda be awa,"Pirige!" ³⁵ Awa siri embo ainda dengoro piriguriri,aveva wujeguriri umo tuturo edo ge isaga sisira. ³⁶ Iesu mi embo nenei da seorase sisira,ate ungomi setero embo berari ingisera. ³⁷ Embo jiwae be awa kove be edo sisera,"Embo eiawa buro berari ewamei ira. Edo iri embo dengoro junjugari awa ge ingero edo ge sae awa ge sera."