¹ Edo Iesu mi tumonde bain ari mando, awa mambutiri uso ambojimbi da ami sisira,"Atopatari,gi,ganuma ewagaewa be emimi mando dagarae be itarira." ² Iesu mi mina sisira,"Mando nembo-gambo awa gosesa? Ganuma nei awa nei da tamonda doari atadi aera." ³ Iesu doriri Olives,tumonde bain ari oro demonda atiri ambojimbi,Peter,James,John edo Andrew mi bugudo nganega isera, ⁴ "Se gore iji nonde roviravi eiawa ijejegadiri? Edo roviravi awawa ijejegadera ainda kariva mo ro iteiri?" ⁵ Iesu tuturo edo ungoda yei ge sisira,"Ingo gido gogowo ewo,embo mi ingo ganumbeore. ⁶ Embo jiwae be naso jawo da bugadera edo sadera,'Na Iesu ra sadera,'edo embo ge busari da giti jigadera. ⁷ Ingo isoro arida binga inga dewa awa dubo vevera eowe;roviravi eiawa ijejegadira, ate sangove awa bugaera. ⁸ Busu nembo gambo edo embo gitopo mina ara adera. Didira nembo gambo adira edo baimana ijejegadera. Teta mei engari da memesi bari inge ra. ⁹ Ingo gosise atiwo.Embo mi ingo giti jijigegari da ingoda itadera,edo ingo dedo-gaedo adera. Ingo naso jawo da babojegari mi dadera. ¹⁰ Ate binga ewamei awa giti busu arapuda mambadira. ¹¹ Edo ungo mi ingo bundadera,ate dubo vevera eove. Iji ainde ingo ro sadewa awa itadena,imo aerate Asisi kotopu mi sadira. ¹² Namedi mi namendi awa betari da itadira,edo mamo mei ga adira. Kinapeina awa erido aimamonode isoro edo betarida itadera. ¹³ Ungo awa ujoae edo tini gambari adera naso tamonda. Ate amimi matawa atadira awa sorega ari badira. ¹⁴ Ingo gadewa awa ujo ae,dubo vevera awa ijegadiae yei ainda ijegadira(ajigurira embo awa ge be badira), ungo amimi Judea nati da atera awa doriri da mambadera, ¹⁵ edo embo awe mando inda atera awa wosadi ae edo roviravi joda badi ae. ¹⁶ Edo umo amei tano joda atera awa engenembedo sini-bo badi ae. ¹⁷ Ate,embo-evetu tinide edo kinapeina emi gaiera ainda dubo vevera! ¹⁸ Benunu sewo jajemo ijide ijegadi ae. ¹⁹ Edo dubo memesi kiambu ae be awa ijegadira,tuturo da ijegae edo sekago ijegadi ae. ²⁰ Iesu mi ari iji awa tupokain ae adira,awa tamo pisi jebugari badiae, ate God da buro embobo ainda jawo da diugadira. ²¹ Edo embo amimi iso yei da sadira,'Gosesita,eia Iesu Keriso ra!'Gosesita,awa umo ta!'awa ge be eose. ²² Ge busari embomei mi Iesu Keriso inge edo ge busadera uso jawoda edo ge busari embo mei mi kariwa de aribarari de ami ganumbadera,teta avigari inge adera. ²³ Derido gogowo ewo! Rora amboda ijegadira awa matu sena ²⁴ Edo iji biae awa atae adira ainde, waiko awa tumba adira,edo kariga awa usasa adi ae ra. ²⁵ Edo utu da damana awa sokedo wosadera,edo utu da goroba itido atera awa yakawo yakawo adira. ²⁶ Edo God da mei awa poroga da uso goroba de uso usasa de bugadira. ²⁷ Edo uso anela awa itari budo uso avigari embobo awa budo da-da adera. Utu de busu de awa sangowe adira. ²⁸ Edo ri junga patu ainda igi awa beribari ira awa waiko aikambu ira awa giwo. ²⁹ Awasedo wasiri ijegurira awa gido re, iji awa asusubetira awa giwo. ³⁰ Edo na ge be sena, ewowo eiawa manjadi ae atirari rora awa ijegadira. ³¹ Utude busu de awa manjadira ate naso ge awa natopo atadira. 2 Edo kotewo iji awa, embo da amei gadi ae ra,utu da Anela de,Mei de gae ra,ate Mamo mi da gosira. ³³ Edo gido gogowo ewo! Dombu ewo, edo ingo iji rori awa gae ra. ³⁴ Teta embo uso mando dodo, esega mambuse uso mando simba ari embo dodo ira awodo, embo da-da buro itido, dombu ise atorase edo ira awodo. ³⁵ Awasedo dombu ise atiwo, ainda be awa mando topo awa iji node bugadiri awa imo gaera, ongobo de ta, tumba de ta, sipo atirari ta mo. ³⁶ Buari binga ae buadira awa imo ewo ise atiroso tambadira awodo eose. ³⁷ Na ro iso yei da sena, da awodo embo berari da yei sena: Dombu ise atiwo!"