1 Awarate ingode naso gari susu awa poroga nembodiba mi ingodena jineneburisira awa sedo ingodenaso jimbo bebegae edo ejopa edo eiedo bundedo ari demonda itore. Ingode gere gere sumbore, ingodenaso tamode Asisi de atera tega da ainda, yei ititisira atira ainda. 2 Ingo dombu dagaia Iesu da ore, umo awa dongono gambae, gebe aride tumonde aride da. Uso jo yaviri ari awa umo embo ititisira atira. Umo kera edo orega burisira, me gari dodo, edo God da ingo beda ainda anumburisira. 3 Awa sedo umo kotebore, umo da amimi kera isira. Edo jimbo bebegae embo mei awa umonde tini gambari isera, awa embo jo doaso durure edo iso buro awa doadi kotose. 4 Imo Iesu da ororo awa doadi kotaerate buro okain edo jimbode jujuno esa. 5 Edo imo embo nei da ge mi imo kondade edo sisira imo awa mei awodo awa ruvegetesa, " Naso mei Bada da dedegari awa ejopa beose, edo jo iso dongono awa unemi wujegedo sari dumo eose". 6 Awarate Bada da dedegari embo berari da yei awa dubo bari mi ira, edo uso riroga awa uso kinapeina berari unemi burira ainda yei. 7 Kera ari de mamaso de dedegaride God mi iso yei ititira amone uso mei da yei edo butira. Ate mei da yei uso mamo mi dedegari itae adira mo? 8 Ate imo dedegari atae edo embo berari ainda joda atadera amone ungo uso memei aera. 9 Ate neida be ingodenaso embode evetude da mama mane mi ingodena dedegadera awa ingo kotopu adera. Ingode be inakade mamo da yei Asisi mi itido aterita? 10 Gebe ra, ingodenaso mama mane ingodena iji tupo dedegurisera amone ungo gosero ewamei ira awa era. Ate God ungodena dedegurira amone ingodenaso ewamei awa embo. Awa sedo ingode God da kotopu awa kando kataba ore. 11 Boroko be dedegari mana jo yaviri iji jaige da bugadira ate memesi de daedo. Ate amboda begada be jojede ewamei be adira ungoda atopatari mi. 12 Awa sedo iso ingo wosetira awa jigio dagaia are, edo iso baingo goroba ae ira awa eio goroba are. 13 Emboro eio dagaia are, awa ari tei ambari doaso ambudo ature, ate eio ewamei are. 14 Eiedo da rora bega embo berari da yeida edo kotopu ari atae gido embo da ami Bada gadi ae. 15 Giwo embo da ami God da sonebarida enjebu adi ae. Edo indari biae da besisi bajadira awa buria kundo bugadira. Edo emimi ari embo jiwae be awa bebegae adera. 16 Gio ipuda ari God da asusubari embo iso unemi indari mi uso awara ari mei bugoda awodo awa ititisira. 17 Imo gari awa sedo amboda umo uso ewamei ari kiambu badi dipapa isira ate umo ujo ae isira ainda be awa umo usuka tambusira awa iji nonde imo kaveregadira edo uso jijiu mi ari badira awa ae isira. 18 Ate imo rovi ravi berari budo jiwae atise yawoda vevera da, tumbada, dombude okain edo ga de binga tarara de, 19 edo puin da javide be opu de sadira ge awa, ge ingari embo mei ungo ge awa sekago ingorase sisera. 20 Ate ungo kera edo ro orase awa ari dipapa aera, ate wo mane mambudo doriri da tu jigadira awa ungo ganuma mi daro bebetegadera. 21 Awa sedo jegigi ari awa jinjibadera, awodo sisira. Na oju mi jo beda iri dudu gasena. 22 Awarate imo pedi Zion da bugaso God natopo atari da nati, utuda Jerusalem edo tendebari anela thousands mi divedo pusedo adera. 23 God da mei bugo awa atega butega edo uso jawo utuda God da yei jiwusera edo umo awa embo berari kasari embo. Edo embo da Asisi ewamei ami edo umo awa ewami be isira. 24 Edo Iesu awa embo soropu da edo aware ari seka amone ororo pusaki amimi isira awa ewamei be, ate Abel da ororo awodo ae. 25 Gio gaegae edo embo da ge sira ujo ae eose edo ungo ijegedo mana eore. Edo ujae edo busuda ro orose sira. Nembo be awa ingodena enumbae ijegadera ingodena dodo warere gadera embo da ro sera umo utuda atise. 26 iji da de uso be opu mi busu awa didira adira ate boroko umo awa sari gadira. Iji ainde nanemi busu awa jipo, jipo adena ate utude daedo adena. 27 Ate Sekago sera ainda be awa ro jipetira awa gigisebadira rora unemi etiri siroro isira awa awarate, ate ro jipae dotira awa awodo atadira. 28 Awa sedo ingodena God giti jigari yei jipae dotira awa badera, amone ingode na berari jo yawa yaviri de ingode jasiga borega arida emboro ro edo God kori adira ewamei be mi. 29 Ingode naso God awa berari avedo bari yawo da awodo ra.