Chapter 11

1 Boroko gebe era awa, rora tumonda edera ainda, rora dada gido era awa diti mi gae edera. 2 Awa embo ge eiyawa ingode naso mamo umbogo awa awara ari ititisera. 3 Gebe ari mi ingode jomi gido era utude busude awa God da ge goroba de sineneburisira, awa sedo rora ingae diti mi gido era awa diti mi gosera awa embo sinenebae edeira. 4 Gebe arida derido Abel God da yei rorou ewamei be awa ititisira, Cain da awodo ae, awa etiri umo awa God da dipapa da pepetisira, edo God ge ewamei uso jawoda sisira ainda be awa uso rorou umo kena ititisira awa embo, edo gebe arida derido Abel matawa ge sisira, betisira ate matawa atadira. 5 Enoch awa gebe arida derido utuda vivitisira, ainda be awa uso betari geurase God mi burisira. "Umo awa tambae isera ainda be awa God mi umo burisira awasedo". Ate umo inda kundo vitae gitida awa busuda atise God da dipapa berari isira awa sedo. 6 Boroko gebe ari atae adira ainda joda awa God da yei sago gari kundo purari katogo ae adira. Ainda be awa embo nenei God kena puse umo atima ira awa gebe ise atera awa God mi umo jigari eradira. 7 Gebe arimi Noah, utuda binga burisira rora diti mi gae ainde God de asusu burisira kondade etiri nga gerigurisira edo uso orobe awa soregurisira. Buro eiyedo isira ami busu eiyawa itiri wosetiri God da ewamei arimi edo gebe arida isira. 8 Abraham gebe arida derido God mi jawo sisira awa ingisira, kera edo busu da unemi budo atadira awa uso bayau awodo goisira. Umo nonda mambutira awa gae rate tepo mambusira . 9 Gebe ari mi God da sari garida derido nati embo inge isira. Umo dobo edo Isaac ae Jacob de potari de sari gari ainda atima isera . o Umo awa God mi nati da tutuvi awodo sirigedo dederisira. . 11 Gebe ari da derido Sarah daedo God da sirigada derido mei engadira ainda siriga awa isira . Umo awa ogo rate God mi ro sirigurisira ainda derido gebe isira. 12 Awa embo, embo ainda derido umo betae etirate uso ve amboda ijegadira awa utuda damana da awodo edo ewada kora da awodo ijegadira awa sisira. 13 Embo berari eiyawa bebete gurisera awa God da sirigada aerate ungoda yei nei embo ingege edo uso gajari oroda embo mei awodo goise ategurise busuda atima isera. 14 Embo mei ge egedo sedo isera awa ungoda natopo nati eura ise wasiri eiyawa edo isera. 15 Ungo mi busu awo nei ainda mambadi isera awa sekago engebadera awodo awa isaga isira. 16 Ate boroko atira ainda ane ungo mi busu awo nei da atera awodo aera. Utuda atira awodo awa tambadera. 17 Awa embo God awa ungo mi daedo jawo sadera, ainda be awa unemi ungoda nati nembo diba sia isira awa sedo. Gebe arida derido Abraham, God mi umo bavedo gadi sedo, Isaac awa rorou awodo itarase sisira. 18 Iso yei eiedo sisira, "Isaac da toda awa uso orobe da dega poga awa jawo sadira." 19 Abraham be sisira God mi Isaac betari da jigari erido, edo jiwari mi sira awodo, sekago jigari eradira. 20 Sekago gebe arimi sira awodo, rora ijegadira ainde, Isaac mi Jacob ae Esau awa ewamei adira. 21 Jacob gebe arida derido, betadi ise, uso ketuda derido Joseph da kinapeina etoto awa ewamei isira. 22 Joseph gebe arida derido, uso sangove ari iji asusuburiri, Israel da kinapeina Egypt dodo aradi ise gido Joseph da vetu awa kund erorase sisira. 23 Moses gebe arida derido, imo aimi engisira awodo de, uso ai mamo ga mi unjugeteo kariga tamonde atae isira, ainda be awa ingo goisera awa umo awa mei doga be gido, King oju ae wasiri awa isera. 24 Moses gebe aride derido, umo babujisira ainda amboda awa, Pharoah da gagara mi uso mei seurase ujo ae isira. 25 Ainda konda, awa umo God da embomei awa memesi de atorase edo busuda jimbo ainda durorase isira. 26 umo goisira awa Iesu awa embo adera awa nembodiba be Egypt da ana wayai awodo ae goisira. Ate umo awa uso diti da awa osisa mina badira awa goisira. 27 Moses awa gebe aride derido Egypt doturisira. Tinida tini gambari awa oju ae isira, ainda be awa embo dombumi gae amimi etiri mata ro ira awa adira awa goisira, awa sedo. 28 Gebe arimi setiri jarugari bondo awa jigido ororo pusaki sigari awa goisira, edo awa ari embo amemi buro eiyawa ari uso goroba awa atae adira awa goisira. 29 Gebe arida derido Israel embo mei mi Red Sea awa teta busu omboda sembarago isera. Ate Egypt embomei mi isera awodo adi iserate ewa mi ungo apuregetiri indido bebetegurisera. 30 Gebe arida derido Jericho nati awa iji seven awodo woworegetero puga digari awa wowosisira. 31 Gebe arida derido viro evetu Rahab awa betae jebugurisira ate embo mei beuso isera awa bebetisera, ainda be awa umo onjiga sari embomei awa soregurisira awa embo. 32 Nane mi ge nei mo ro seni? Nane mi Gideon, Barak, Samson, Jephthah, David, edo Samuel, edo binga sari embo mei awa sae etenate iji awa atae ira. 33 Gebe arida toda ungo mi busu einda nati nembo gambo awa detero dudurisira, edo ewamei atari da buro isera ami God mi ro sisira awa be isira. Ungomi isoro wo mane da be awa gajisera, 34 Yawo da vevera awa etiri ambusira, kaia da di awa tengisera, karu amburo da jebugedo isera, isoro da goroba da dederisera, edo nati nei da isoro embo mei awa posegurisera. 35 Embo evetu awa ungoda embomei bebetegurisera awa eririsera. Ate nenei awa deoro memesi tambudo isera, edo jebugari tambae edo isera amimi ungo wasiri de erari da wasiri awa tambae isera. 36 Edo nenei awa gandumbari da edo vejarida okain tambudo isera, edo nenei awa bundari da edo engiregari da budo isera. 37 Ungo awa ganuma mi dedo isera, soropuda busedo isera, okain da wosedo isera, pia pia mi gaioro betedo isera. Ungo awa wo maneda andiso awa ombudo teuma isera, edo indari ambu edo tamo pisida dipapa embo mei awodo edo tumoda ari jajovegedo atima isera edo embo ewamei edo simba ari awa ae edo isera. 38 Busu emimi ungo tega ari katogo ae ira. Ungo awa indari atae yei da edo doririda munenegedo, edo banga toda, edo busu toda atima edo isera. 39 Embo mei berari ujugetena eiyawa ategurena ungoda gebe arida dederisera ate ungoda sari gari awa bae doturisera. 40 God mi matu rora ewamei be awa sirigurisira, awa sedo ingodena atae, wasiri ewamei be awa bari katogo ae isera.