Chapter 2

1 Edo iso betari awa jimbo mi etiri bebetisesa. 2 Jimbo biae da jo da imo atisesa busu mi rawodo pepeta orose isira awodo. Asisi biae mi boroko embo da jo da atiri God beuso era. 3 Ingodena embo mei ainde atisera, biae ari ainda tamonde kotaride awa budo ijegore. Ingodena busu ainda kinapeina berari teta saboari embo nenei mi edera awodo. 4 Ate God awa jo ari mi jo beda ari awa sedo uso dubo bari nembodiba be ami ingodena dubo burisira. 5 Ingodena matu bebetisera ingodenaso jimbo biae mi, awarate unemi etiri indogena berari awa Keriso ga daedo eiririsera, uso sonebari mi indogena jebugurisera. 6 God ingodena awa Keriso ga daedo jigiri eririsera. Edo God mi sisira, ingodena Iesu Keriso ga daedo utuda anubedo era. 7 Awa sedo iji amboda unemi uso sonebari nembodiba tega atae awa Iesu Keriso mi edo gogo edo unjugadira. 8 Sonebari mi imo soregurisira, iso gebe aride tumonda aride mi, eiyawa iso yei bugadira ane God da kando ra. 9 Buro mi ae awa sedo embo amimi gebusadi aera. 10 Ingodena awa God da buro ari embomei Iesu Keriso da yei awodo edo rovi ravi ewamei berari God mi matuda ingodena awa embo siya isira ainda pepeta ore. 11 Awarate kotebe wo matu awa ingo aumo embo awodo isewa tamo pisida dipapa mi. Embo mi ingo awa tamo kotopu andiso diugae sedo isera, nomi etiri siseri, tamo kotopu andiso diugae awa tamo pisidara, amone embo da ingo mi era. 12 Awarate iji ainde imo awa Keriso de da aera edo Isreal da yei embo aera. God da awara ari edo soregari God de daedo busu ainda ataera. 13 Edo boroko Iesu Keriso mi imo God dodo besaun be mambusesa awa uso ororo mi budo God kena asusuburisira. 14 Umo awa ingodenaso begara, unemi etiri etoto awa da isira, puga digido jinenebari awa uso tamo pisi mi etiri usi besi isira, edo uso natopo atari kiki amimi ingodena kataburisira. 15 Oiyawa unemi ago dari awa budo demonda ititisira edo unemi embo da seka uso joda isira edo bega itiri busira. 16 Keriso mi wujegetiri embo mei berari awa God da tamo da ainda totorisera, oregada awodo, Keriso da betari awa natop atari kiki da itiri pepetisira. 17 Iesu budo bega awa minonu sisira, embomei besaun atera edo asusubedo atera ainda yei. 18 Iesu da yei awodo emboro awa Asisi da ami ari mamo da yei awa isaga adira. 19 Awa sedo boroko ingo aumo embo mei awa ingo embo seka ungoda yei aera edo embo ewoga aera. Awarate ingo yei ainda popo edo embo kokotopu God da orobera. 20 Iesu da buro ari embo mei de binga minonu sari embo mei ungo awa tutuvira ate Iesu Keriso umo usuka awa tutuvi sangove dawara. 21 Uso yei awodo oro mando berari jigoro eradira edo bajadira teta Bada da tumonde bain ari mando inge. 22 Ane uso yei awodo ingo berari awa jigero eririsera God da joda Asisi ewamei atira ainda.