1 Lailoea lailoi uvu, lai lutiu bai vai lailoi kosi kitae IESU KELISO vavuale kelu DILAVAu lailolai loui avoe lae di nile duave katealelu lai DILAVA luita igalitoai uveve dua ava. 2 Lai lailoi uvu vai IESU vavuge eu lailo agige DILAVAu au uvu lailoamei lai lo hoeaseveale kelega lai uitiva. Ige lai DILAVAu ataga ivalivelu huhuale kele lai uvu vaeavai sisilaevelu. 3 Isi lai vali bahata vateutuvu agivale kele homasiava solisito kele sisilaevelu. Kosealelu lai luleleige vate tuvu agivale kele lai lole melitavai ui tigei. 4 Lai kateige DILAVAu lailolai sisilalu keu kateige lailoeale vaoe avevete ke huhuaevei kele melitavai. 5 Ige DILAVAu vaoe avevete kele ba lailo seleavelive bele isito keu au munana tuvu hanavege lailoi uvue loige lai kele luleleige DILAVAu au uvu bahata lailoamelu. 6 Lai loea nenie solige DILAVAu IESU KELISOlu valini vaeavale kele loi lai loi toela ibilalu voele alu. 7 Ata voleu ata voleu dualu voeleale keu toloalu isoho ata vole melite ata vole duavelu voeleai isito atabeu ba ata vole toelalu voelealivelu bele atau aveve keu katealu. 8 Isito lai luleleige DILAVAu au uvu bahata vai lai loamelu lai aveve toela ai usege keu au vo IESU KELISO hanavage loi lai loi toela ibilalu voelealu. 9 Au voeleale kele DILAVAu lailolai loui avoe laea di nile duave. Katealelu la huhuige aule lailo agigei DILAVAu tuvu loale ke gogoniai ogeta lavisi. 10 Lai loea memila DILAVA vai toelativale ataea isito voveu voeleige lai DILAVAu ata olisi avoluvita igali toalu. Katealelu lai huhuige lai loeale IESU KELISOu kobelale kele mauli agisi. 11 Kele kotovoleu ulu koto keu lai loi kosi kitae IESU KELISO keu aike lailo agigege lai aike mama DILAVA ata olisi avoluvita igali toalelu lai lole ukolikoli mama DILAVA kelu vali bahata sisilave ai ugei. 12 Aveve toelau oleveo kateai vatae lolu, la luleleige ata igali Adamu keu aveve vole toela age kele voeleu lolu. Ige ataea aveve toela avale keu ibilavela voele keu ata bahata bavugelu. 13 Memila Mouseseu basuale keu ue solisege ataea aveve toela ava isito basuale keu ue solisege DILAVAu ataea aveve toela ibilave vave soliva. 14 Kateigeto Adamu valite ni kela voele keu ui loaleu Mouseseu valite ni kela vevalu vali kele, Adamu DILAVAu koto evie solisi bokoale kelate ataeau ae soliva isito Adamu ale kele voeleu velevai lolu aa bahataele. Adamu loi umuka vole olisege IESU loi umuka vole olilu. 15 Adamu keu aveve toela umukave isege IESU KELISO keu loi aveve duau umukate. Adamu aveve toela ale kele ata moeagaea vovolu isito IESU KELISOu ale kele DILAVAu au olale ata moeaga hoeaseavelu. 16 Adamu avevete kele ibilave voleu ulu ige IESU KELISOu avevete keve ibilave voleu ulu. Adamu aveve toela ale kelu DILAVAu ibila toela ata vavelu isito IESU avevete dua kelu DILAVAu au isivi toela ke totoige aveveabe keu nivele nenive olilu. 17 Ata igali adamu aveve toela aga voeleu ata bahata agigelu ige ata igali IESU KELISOu aveve dua age DILAVAu au isivile au uvu bahata vai ata vavei hoeaseavege aveveabeu nenive ula olisi IESU vileo uveve dua agievelu. 18 Toela ke igalile ata bahata kea toela ke ibila agiva aveve dua ke igalile ataeale nenive olisi ukolikoli agisi. 19 Ata ke igaliu DILAVAu nona evie solige ata bahata aveve toela aeviva isito ata vole igali DILAVAu koto evialelu ata moeagaeale DILAVAu nile duave olisi ui. 20 Memila ataea aveve toela avaga DILAVAu au basu vai vavege abo basuale ke ivage aveveabe keu toelalu. Ige DILAVAu ata huhugei toelaeabele agigei loiveve keu huhui kitae. 21 Memila ataea aveve toela age voeleu ke agigelu memila aveve toelau ataele ui loale kelega ataeau toela ibilalu vovova. Isito aike DILAVAu lai lo huhugei lailo dulugei lailolai loui kosealu laea di nile duave. Katealelu lailole lai loi kosi kitae IESU KELISO vileo ukolikoli agisi, u kolikoliai ui tigei.