1 Lai loea Eibalahamu ese lailola koea. Iale la huhuige Eibolahamu aveve keu oleve katealu. 2 Eibalahamu aveve au avale kele DILAVAu avolu koseai loue solilu, au atau dua alau keu kateai louteto Eibalahamu amiga letatavalu isito keu kate solige eu DILAVAu nile amiga letatava solilu. 3 Bukau kotou loui avoe Eibalahamu au uvu vai DILAVA vavulu. Au evievile kateige DILAVAu hoeaseavei avolu loui avoe au ata leleve alau. 4 Ata vadeu hauale keule au ibila agisi au ba au ibila va kavalivelu bele. U kavaito isito au vadeulu loviale kelau ke valu. Ataea aveveabe keu katealu abo olai abobiga letatavei DILAVAu nile nenive olisi. 5 Isito DILAVAu aveve keu kosealu ata vadeu au avevele nenie solige DILAVAule atake evievi ivai loui koseai ata keu nenive ula. DILAVA keule ata hoeaseavege evievia beule nenive olisi nivele. 6 Ataea abo avale kele avevea beu nenie solilu isito kea abo uvu vai DILAVA vavuge aveveabeu DILAVAu nile neniage ea kelu sisilaevelu Deividiu memila kateai loulu. 7 Keu loui avoe DILAVAu ataea aveve toela totoatige ea kelu sisila kitae aevelu. 8 DILAVAule ataea aveveabe toela totoatisi ba ke huhualivelu bele. Ige ataveale sisilai. 9 Au Deividiu louale sisila keule valivelu vudiu vate boiale keu ulaele loi. Be vate boiesoliale ketaeale sisilai keule loi, bukau kotou kateai louge. Da loui kosealu Eibalahamu au uvu vai DILAVA vavulu au evievile kateige DILAVAu hoeaseavage aveve keu duave baua. 10 Memilagau DILAVAu Eibalahamu hoeaseavala aito ba vaoe laviage au veu vate o vudiu vate letulilu. 11 Eibalahamu keu au vate letuliale keu lailo haivege Eibalahamu au vate letulie solisito au uvu vai DILAVA vavuge DILAVAu ke hoeaseavage au avale keu DILAVAu nile nenive ula. Au ale kelate olea abo vudiu vate boiesolisito abo uvu vai DILAVA vavuge, abo avale keule nenive olisi Eibalahamu keu evievi ata ke nenia mama. 12 Isi veu vate boivale ketaea mam isito kea abo vate boivale kele DILAVAu ke hoeaseave soliva isito kea abo mamau avale kelate ai abo uvu vai DILAVA vavula age DILAVAu ke hoeaseavelu. 13 DILAVAu Eibalahamulu koto vaeavai loui avoe aule ai atateali vata ko bahata agige, koto keu kosealu Eibalahamu Mouseseu basuale nona ke eviale kelu DILAVAu avolu koto kateale loue solilu. Isito au uvu vai DILAVA vavuge DILAVAu hoeaseavage au avale keu duai ulu DILAVA nile. 14 Ata volea Mouseseu basuai vaeavale ke evisi olale DILAVAu Eibalahamulu louale ke agievei. Isito keu kate solilu au katealuaga DILAVAu koto loui vaeavale keu leleve olie solilu. 15 Isito lai huhuige DILAVAu koto louale keu baiu ulu lai Mouseseu basuale koto ke ula evisi age DILAVAule lailolai tuvuai. Basu keu ue solige lailole oleveo kateai ke bokoai isito keu uge lailole oleveo kateai ke ai evievi ke ulale. 16 Katealelu lai loea lai loi uvu vai DILAVA vavuge aule au louale ke lailoamei. Keu lai loi avevele lailo vavelivelu bele. Eibalahamu keule kea mama isi lailo ko nenia mama. 17 Bukau kotou kele loui avoe DILAVAu Eibalahamu laviai loui avoe au vatau ata moeaga ko nenia mama. Eibalahamu keu au uvuvai DILAVA vavuale kelugau DILAVAu huhuige Eibalahamu keu lailoi mama late. DILAVA kela vovivale ke isagevege abo kobekavaeviva kela louge uesite valevile kea daia loi atavile uevelu. 18 DILAVAu Eibalahamu laviai avoe ai atate keale moeagai ui vata kole isito koto keu loiesolisege Eibalahamu koto ke huhuai avoe da loi koli ko alu, keule oleve kateai dae loi. Kateaito au uvu bahata vai DILAVA louale kele vaeavalu katealelugau vatau ata koea mama olilu. 19 Eibalahamu uale lahani uani hanideleti vesuge maku olilu. Ige keateve Sela keta mabata olige eseu ulivelu keta malomaloalu isito Eibalahamu ke huhue solisito au evievi kele meliai ulu. 20 DILAVAu avolu au koto loui vaeavale ke homasiava solisi au evievi kaleva solisito DILAVA hoeaseavai uva. 21 Keu huhuige DILAVAu au louale ke neni aule ba au vuvunele ke agei. 22 Eibalahamu au evievi kateleluga DILAVAu avolu loui avoe au di nile duave. 23 Eibalahamu DILAVAu nile dua oliale ke abo memila kisaialu isito abo Eibalahamu ula labo kisaia solilu evievi ata moeagataeala kea ulu. 24 Isito lailotalagau abo kisai ke alu lai loea oleu au uvu vai DILAVA vavuge aule lailolai loui koseai laea di nile duave ula. DILAVA kela voelele lailoi kosi kitae IESU KELISO ke isage kobelalu. 25 IESU keu lailoi toela ibilavelugau loi voelealu ige mamave DILAVAu loi isage kobelelu. Kobelai olale lailo ko neni agigei hoeaseavage lai DILAVA nile nenive olisi ui.