Sabta 3

1 Da louale kele la huhuige Diuia ata olisi veuivale vate boiale au keu duave bela toelalu. 2 Da huhuige keu duave kosealelu DILAVAu memila au koto vai Diu ata vavelu. 3 Ige ata ke volea abo evievile meelitava solisi abo evievile otolovage la huhuige DILAVAule avota au koto louale ke a solisi. 4 Ba aule ke ai DILAVAu koto keu leleve ula ata bahata ke neniale huhui sele asege DILAVAu kotoule leleve olisi. Katealelu Deividi Bukau kotole kisaiai loui avoe isoho ataeale ai nona kovai kotoivale kelate age ai koto kou ba selealivelu bele leguvalivelu bele. 5 Koto kele ata volea loui avoe lo toela avale kele DILAVAu lo agigei toelatige lo tuvu kitae agisi toela kitaele tievelu. Kosealelu lo toela ke age DILAVAu ke ibilave loame solige ataeale ivai loui koseai DILAVA keu leleve ula toelaeabe ibilavelau ke vavelu. 6 Ata kea huhui kateale ale keu toelalu DILAVA keu aveve toela ke ivai ba kalevalivelu bele isito aule ata bahata abo vadeu avale ke kaoai avoele koto loui ibilaeabe vaveilu o voele. 7 Ata volea loui avoe lo sele nona loui ata haivege abo kele nona leleve huhuai DILAVA hoeaseavage vadeuluga DILAVA loi aveve toela ke ibilave loameva. 8 Ata kea loui avoe Bolo keta koto kateale louva isito dau koto kateale louesoliva abo koto kateale loui olavale lai aveve toela vole age kele aveve vole duau loi. Koto katealelu ata kea davai toelati kitaeava iale DILAVAule ata kateivale agisi toelale otovei ibila toela vavei. 9 Katealelu la huhuige Diu ata lailoea DILAVA nile Diu ata olie soliale ke leivigelu ba da louale kele la huhuige Diu ata isi KDiu ata olie soliale lailoea bahata aveve toela avale ata lailola koea. 10 Bukau kotou kele loui avoe atabeu DILAVAu nile lilikata ue solilu. 11 Atabeu DILAVAu avevele kele luleleai DILAVA kaoa solilu. 12 Ata bahataea DILAVAu kuva kalevai kuiakavalu isi ui aveve toela ava katealelu atabeu aveve be dua a solilu. 13 Ataea abo aile kotou toela louvale keu vovoale abata abo alavage kisiveu soale kelate keale abo nemele sele nona lougei. Uteu toelau au aile voele mesulu vaeavale kelate ata kea kotou toela loui ata agigei toelatigeva. 14 Kea abo aile dubitou toela loui ata agisi tuvutigeva. 15 Tuvu kele abole solekata ata vole kavege vovoi. 16 Abole oleve keveo tiluaga atalai loui kavegei. 17 Aveve kateale avale kea uveve dua kuva kele lulele solilu. 18 Kea DILAVA vabuiava solilu. 19 Bukau koto kelega lai luleleige DILAVAu memila au basale kevai Mousese vavui olale ata bahataea huhuige DILAVAule aveveabe toela kaoai kele koto louge kea ba DILAVAu basuale kele koto loui kotove ke kaoalivelu bele. 20 Katealelu lai huhuige ataea meliai olale Mouseseu basute ke lovage aveveabeule DILAVAu nile neniai ui. Isito keu malomaloalu, Mouseseu basute kele ataea abo aveve toelake ivai huhualu. 21 Isito DILAVAu aike kuvau doga alavage ataeale DILAVAu nile nenive olisi Mouseseu basu koto isi mouke Belovetaea nona kea kuvau dogave alavalivelu kele koto loulu isito DILAVAu memila nonate kele kuva alava solilu. 22 Keu kuvau doga alavale kele ata olea abo uvu vai IESU KELISO vileo vaeavage DILAVAule ke hoeaseavege aveveabeule DILAVAu nile duai ui ige ata bahata kea vole late. 23 Lailoea bahata aveve toela avale ata lailola koea kelega lai DILAVAu atagale vuguai va savalu kelu lai eue tiluaga DILAVAu ataga ivalivelu bele. 24 Isito DILAVAu au olale lailolai uvuai au vo IESU KELISO hanavage lailoi toela ibilalu voeleige laikele DILAVAu nile duai ulu. Lai lailoi olale louge au ke hanava solilu isito au olalega ke hanalu. 25 Iale kele DILAVAu IESU hanavage loaleu voelealu ige ataea ke ivai abo uvu vai IESU vavuge DILAVAu ke ivai aveveabe toela ke totoalu. DILAVAu aveve keu lai lo haivege lai aveve ke ivalu, ke nenive ula kosealu DILAVAu luta ataea aveve ke ivaito ibilave vave solilu. 26 Isito ave vali kole ataea toela bahata vai IESU vavuge au loi voelealu lailoi toela ibilalu. Katealelu ataeale abo uvu vai IESU vavuge DILAVAule ke hoeaseavei. 27 DILAVAu au olale lai lolai uvuai lai lo agigeale kelu lai lailomiga letatavale ke kalevai Mouseseu basuale ke evisi ai lovivale kele laiba DILAVAu nile nenialivelu bele. Isito lai lailoi uvu vai IESU vavui lovai tige DILAVAu nile keule duave ula olisi ui. 28 Lai ivage Mouseseu basuale kele ataea neniai DILAVAu nile dua solilu. Isito ataea abo uvu vai IESU vileo vaeavage keule DILAVAu nile neniai olisi. 29 Lale huhuige DILAVA keu Diuia DILAVA igalila keu ba DILAVA keu lailo ko nenia DILAVA igalila keu. 30 DILAVA leleve, igali ulu ige Diuia ata kea abo uvu vai vavuge aveveabe keu nivele duai ulu. Ige Diu ata olie soliale kea abota abo uvu vai vavuge aveveabe keu nivele neniai ulu. 31 Lai lailo uvu vai IESU vavuge kele la huhuige lai lole Mouseseu basuale ke vai toelatisi. Ba lailoi evievi kele basuale keta lai vai leleve tilu.