1 La oleu au kakolou toela ivai louge keu DILAVAu nile toelalu lale lai aveve toela sekiai bavuito lai kakolo vile louale keu avoeletagau ke louva, iale keu laele toelalu. 2 Lai ivage DILAVAu aveveabe toela ke louge duave. 3 Isito la oleu au toelate ke bavuito au kakolou toelate kele koto louito avoele bavui, ai otigei. DILAVAu ba aveveve toela ke momaeavalivelu bele isito aule ba kele koto loui. 4 Isoho DILAVAu la agisi toelatie solige eu lalai uvuai la dulugevale ke la momaeavalu. Isito avola keu la malihei uva olale la laea kuiakavai avoe loi. 5 Isito la oleu au avale toela ke kalei kuialai DILAVA vileo loiesolisito au toela kele ui tige DILAVAu tuvule avolu loi kotavale vai ke nile. Eu ke ai isu kitae vai amigatisi otiva ilogoto ba isu kitae vai voeleai. 6 Vali kela DILAVAule ata igaligaliai aveveabe ke ibilave vavei, lu o voele vai. 7 Ata volea vali bahata aveve dua ai DILAVAu ivi letatavale keale DILAVAu ukolikolilu vavei. 8 Isito ata volea aveve dua homasiavai aveve toela lovai ai tivale kelai DILAVAule abolai tuvuai. 9 Ige vali kela aveve toela avale ata bahata keale vateu tuvu kitae agisi Diuiale luta abo toela avale ke ibilave agigeto ba vaoe lai loea agievei lailoi aveve toela ke ibilave. 10 Isito aveve dua avale keale bahata DILAVAule iviabe ke letatavagei, hoeaseavagei, uveve dua vavei. Aule luta Diuia ata ke hoeaseavei isito vaoe Diu ata olie soliale keta hoeaseavei. 11 DILAVAule ba voleu toela kaoaito ba voleu toelate kalevalivelu bele. Isito aule ata bahata kea toela kaoaito ba kele koto loui ibilaeabe vavei ukolikolilu o voele. 12 Diu ata oliesoliale kea Mouseseu basuale ke huhua savalu. Keale aveve vole toela age DILAVAule aveveabe toela Mouseseu basuale kele ke kaoai nonalivelu bele kea toela avale kelu abole vovoi vesui. Isege olea Mousese basuale ke ivaito lehosivale kea DILAVAu agigei nonale otovei. 13 Ataea Mouseseu basu huhuai lovale keu DILAVAu nile nenialivelu bele isito basu nona evisi lovale keule DILAVAu nile neniai. 14 Diuia ata olie soliale kea Mouseseu basuale ke huhui vasolilu. Isito abo huhuile basu louale ke nenile ai otiva abo uvu huhui kele. 15 Katealelu lai huhuige DILAVAu basuale ke neni vai uvuiabele vaeavalu. Ialelu ea abo uvule huhuige oleveo aveve keu toelalu isege oleveo avevete keu duave. Abole aveve dua age uvuiabele sisilai isito toela age keu aboele toelalu. 16 Katealelu da kotou dua loui ata haivei loui koseiva vali vole nila DILAVAule IESU KELISO laviage aule ataea vadeu ai vai mahogovale ke loui daiai. 17 Da koto vole louge evive la volea Diu ataea la lamiga letatavai loui koseiva loea DILAVAu ataea keu au basu loamege lo ele udua ava. 18 La DILAVAu ola huhualu ige oleveo keu duasege oleveo keu toelave. 19 La huhuige DILAVAu kuva iva soliale ke lale lohomegei DILAVAu kuva haiveva lale huhuige lai ataga keu vaviu aveve ai ele uvale kele kalui atagalu. 20 Lale ivage talavatu kele lulele baata isi koto leleve kea ulu. Katealelu lale lulele solivale ke haiveve isi eseu ese late avale keta haiveve. 21 Laeale ata vole haivei isito au amiga haivue soliva. La ata haivei loui koseiva vavolo avale isito au ui vavoloiva kelu amiga haivu. 22 La ata haivei loui koseiva momai ai kakolou keateti tebalive. Isito laea aveve toela kateale ava. La ata haivei loui koseiva seleivale silava ke hoeaseavalive. Isito laea DILAVA seleavai dubuvele vavoloea avale late aeviva dubu uvula. 23 Laea DILAVAu basuve kele lamiga letatavageva isito la basuale ke kosai DILAVA vai toelativa. 24 Bukau kotou kelu loui avoe Diuia ata laea aveve kateale avale kele Diuia ata oliesoliale kea DILAVAu ivi loui vai toelatisi kotou toela loui dubitoiva isi budiava. 25 Laea lai veu vate boisi loui kosealu aveve kole loea Diuia ata leleve olilu. Lale kateaito DILAVAu basuale ke evisi lovai louale ke age keu duave.Iito la kate solige lai vudi boivale keu lai ola ulala lake ava. 26 Katealelu Diuia ata olie soliale kea abo budiu vate boie solisito DILAVAu basuale evisi lovai ale kela huhuige DILAVAule aveveabe ke ivai loui koseai kea di ataeala kea, mana aule kateai loui. 27 Diuia ata laea lai vudiu vate letulisi DILAVAu basu kele lulelealu isito la basuve ke huhuai lova soliva. Isito Diu ata olie soliale kea abo veu vate ke boie solilu isito ea DILAVAu basuale ke huhuai lovai tiva, kelega ea lai evievi ke leiviai tievelu. 28 Katealelu ata oleve kea DILAVAu nile Diu ata leleve olilu la huhuige ataeau abo vudiu vate boivale keale Diu ata olisi. 29 Ba ata kea Diuia ata leleve olie solilu isito DILAVAu munanau tuvu ata olea uvu hoeaseaveavale ata kea Diu ata oliale la keu. Ataea ba ke ivei hoeaseavelivelu bele. Isito DILAVAu uvuiabe ivale kelu aule hoeaseavei.