1 IESU KELISO vo vole Bolo, dala kou DILAVAu da toiavai da vage dau Abositolove ata olisi kotove dua loui ata haiveva. 2 DILAVAu memila au kotou dua ke loui vai au ata vavelivelu loui au Beloveta ata haivege abo Bukau koto kisaialu. 3 Koto keu DILAVAu vou loiveve kotola keu lolu. Lailoi Kosive IESU KELISO keule loi vatae ui ataea vatete olisive Deividi atate olisi ui. 4 Ige vali voleo DILAVAu au vuvunele isage au voeleale keu kobelalu. Ige kelega lai luleleige keu ata tuvute isi keu DILAVAu vo melite. 5 IESU kelega DILAVAu au uvu damui da letatavage Abositolo olisi IESU KELISOu ivile vatau ata ko neni haivege abo koto ke evisi evievi ata olievei. 6 Ige DILAVAu Lomenia o kitaeo uvale ata keta toiavege la IESU keu ata olilu. 7 Kateage da lalai kisai ko hanaviva DILAVAu au uvu lamei la hoeaseavege laea atave olilu. Keluga da olale lai loi mama DILAVA isi lailoi kosive IESU KELISO keu la huhugei la hoeaseavege u dua ave. 8 Da kotou gala louge evive dai IESU KELISOu ivile guliguliai lalai sisila kitae avale ke loui DILAVA laviava. Kosealelu da evige vata bahata ataeau loui avoe Lomenia ata kea evievi ataea. 9 DILAVAu ivage di koto kou leleve da di uvu bahata vavui vove kotou dua ke loui ata haiveva. Keu ivage dale vali bahata la huhugei lalai guliguliava. 10 Guliguli kele da olale DILAVA laviage aule au olale o isiviai kuva alavage dale deiai laeo loi. 11 Di ola kitae laeo loi la ivei munanau tuvu au vuvune damui da hoeaseavale kelate datea la agisi melige lale meliave. 12 Da louale keu kosealu lale di evievi ke ivai kele lata meliai uve. Ige dale data lai evievi ke ivai kele meliai ui, ige lai kele vole hoeaseavei ui. 13 Di kakoluvuia da memila olai deia loi la ivegei isito kuvau ue solilu da vatava moeagae tai ata haivege ea nona valu. Iale kelate da olai loi la haivege lata nona evive. 14 DILAVAu au lovi o haukala vai damuale ko da ba kalevalivelu bele. Isito dale ke ai ata bahata haivei o kitaele uale isi botoe uvale ke haivei isi lulelete soliale keta haivei. 15 Katealelu da ola kitae Lomenia o kitaele uvale kea da loi la haivei kotou dua ko louive. 16 Da DILAVAu kotou dua ko loulivelu matie solilu, kosealelu DILAVAu koto keu vuvunete. Diuia ata kea luta koto ko evilu ige ke iae mulimuli ata kea abota nona ko evilu, igeto ba nonau vata ko nenile tilu. 17 Kotou dua keu lailo haivege lai luleleige DILAVAu nile lilikata leleisi ulu. Toela solilu bukau nonau kele loui avoe olea abo uvu vai DILAVA vavuale keale ui tigei. 18 Ata olea aveve toela ai koto leleve homasiavai abo olate avale ke Otogou DILAVAle ke kavegabole vovoi. 19 Kosealelu DILAVAu au hau ko neni ai otovege ataea ivage biageve DILAVAla keu ulu. 20 Ataea abo nita DILAVA iva solilu isito DILAVAu memila vata ai Otogo ale ke ataea ivai huhuige DILAVAu vali bahata au vuvunele ui loiva. Kelegau au olobe lobe ke ai otovelu DILAVA keu ata bahata leivigelu. Iale kelega ata volea vovohoi loui avoe loea DILAVA ke dibae solilu isito keu sele ula. 21 Ata kea dibage DILAVAu ulu isito homasialu hoeaseavalivelu isi ivive letatavalivelu isi kea DILAVAlu sisila a soliva. Katealeluga huhui huhuiabeu toelage luleleabeu ue solige kea momahamage uvuiabea ataga solilu. 22 Kea loui avoe loea lulelete ataea isito tilogote ata latea. 23 Kea gibosone DILAVA ke ataga kalevai vatau vale vile ke ula hoeaseaveva atau munana ugu munana ovou munana uteu munana ke ula hoeaseavaeviva. 24 Katealelu DILAVAu ata ke kalevege uvuiabele vadeu uale ke ai volea vavala toela ke agei. 25 Kea DILAVAu koto vai sele nona toai DILAVA hoeaseava solisito DILAVAu ale ke hoeaseavai guliguli vavueviva. Isito kea kate solilu koto lelevela da ko louva. 26 Ata kea aveve kateale age DILAVAu kalevege keale abo voletea vavae aveve toela agei keate keale malahaeali navalivelu homasiai tai keate voleti navai aveve toela agei. 27 Kelate malahaeale keateali navalivelu homasiai isi tai au kakolo malahati ui avoti aveve toela ke agei. Keu kosealu keateu keate meiale melu isige malahau malaha meialemelu vaoe abole ibila toela agisi. 28 Ataea DILAVA ke homasiavage DILAVAu ke kalevege abole aveve toela ke ula huhuai ke agei. 29 Aveve duau aboele ue solige aveve toela keu uvuiabele ililohoi ulu. Abole tebai abo kakoluvuia hauta vavoloai vole agisi toela tigei toela aveve ke ula huhuai ke ai tigei. 30 Abole DILAVA vai toelatisi volelai kotou toela loui abobiga letatavagei aveve toela ke ula huhuai loui ke ula ai tigei mama aia kea koto evilivelu bele. 31 Abole lulele solisito volelai koto loui vaeavai ke belalave ai vole kavei volelai ba uvualivelu bele vole agigei toela tigei. 32 Ata kea huhuige DILAVAu basuai vaeavale lo o talavatu ai louale keu loui avoe aveve toela kateale avale keale vateu tuvu kitae agisi vovoi keale toela ke ivaito vali bahata ke loui vole haivei ke loui sisilave aevigei. Loui aveo keu alevalau ke alu.