1 DILAVAu au basuale mami kele oleveo kateai avolu guligulialive koto loui au ata lavigelu. Ige abo Dubu koui kele hoeaseavai avolu guliguliavagei. 2 Abo Dubu kouale ke ivi vole ivihai avoe uvu tuvute. Iale ke uvule hau vole lameba kelate ulu ige abo beledi agisi DILAVA hoeaseavale ke batabataveu ulu. 3 Iale uvu tuvute ke iae uu vole ogonata bavuale ke abo ivie loui avoe ivi tuvuve baua. 4 Uvuve ke uvue abo golota batabata vole ai kele senisi hagote vauvale batabata keta kele ulu. Golota maua vole ale keta ulu keu uvule DILAVAu vule votote abutitale au basu kisaiale kea ulu. Ige golole kabusi late ale ke uvule lovi Mana baive keta kele ulu. Ige maua ke igali uvule Eloniu bedoeau asiliale keta ke uvule ulu. 5 Isi maua ke tatale abo golota Anelu munana ale ke abuti vaeavage kea Otogoe Aneluia DILAVAu atagale leleivale kelate ai ulu. Ige kea akomaea Dubu kosive kitaeu ataea aveve toela totoalivelu tao vai maua tatale vaeavale ke bavui tatavele ulu kele koto volea ulu. Isito da olae soliale aike loui la lavigei. 6 Uvuve abutita kele abo hau kateale otovelu. Iale vali bahata Dubu kosivea tiluaga Dubu uvu tuvute keveo tai Dubu hau ke aevigei. 7 Isito Dubu kosi kitae ke vole igaliule lahani igali uvule vali ni igali ke uvule aule uvu tuvute ke uvue tigei ovo mamoe ke tao vai tai DILAVAu nile vaeavagei. Ige DILAVAu ke ivai Dubu kosi isi atave kenenia toela eta uliagei. 8 Aveve kele munana tuvute kea lailo haivege lai luleleige memila guliguliu avevete keu usege atabeu ba DILAVAu uvale ou uvu tuvute keveo ba talivelu bele. Isito Dubu kosi kitae ke igalile keveo tigei. 9 Iale memila avevete keu lailo haivege lai dibage ave vali kole ovo mamoe kavei vaui DILAVA hoeaseavale katealeu ba atau uvu hoeaseavalivelu bele DILAVAu nile. 10 Memila basute aveve kele lovi iveve vava hoeaseaveve katealeu ba atau uvu hoeaseavalivelu bele. Aveve katealeu ui loivaga DILAVAu basu dogave vaeavage memila avale keu vesulu. 11 Ige IESU KELISOu loaleu memila guligulite aveve kelate a solisito Otogoe tiale lailoi Dubu kosi kitae olilu. Otogoe avevete keu vatae lai avale kelate olie solilu isito duave ula. 12 IESU KELISOu DILAVAu uvale keveo tialeu ovo mamoe tao agisi tai DILAVA hoeaseava solilu. Isito IESU tava igali lailoi toelalu voeleale kele lailole mauli agievei, tanikiu IESU. 13 Memila Dubu kosivea ovou tao agisi ataele kisiai katui ovo vol evauge nai vesusege utive ke agisi ela ataea vava vavui vavaeabe liguhai hoeaseavaeviva. 14 Isito IESU avale keu aveve kateale leivialu. Ukolikoli munanau tuvu vai melitige au aveve duale au vava vai DILAVA vavui lailoi toelalu loi voelealu. Iale lai ba lailoi aveve duale ukolikoli agilivelu bele. Isito faoveu lailoi uvu hoeaseavale kele. Isito taoveu lailoi uvu hoeaseavage duale kele lailole ukolikoli DILAVA ke hauve ai ukolikoli mauli agisi. 15 IESU au voele kele basu dogave vaeavalu ige kele DILAVAu ata toiaveale keale ukolikoli mauli agisi au abolai vadeu louale keta agievei kosealelu memila basute ke valale ataea ui aveve toela aeviva. Isito IESU voeleale kele abo memila vadeu avale ke ibilave abole agisi. 16 Da kele kotovole louge evive ata voleule nita uive BUkale au ola vadeu loui kisaialogo voeleige abole olave ai. Hauve ke agisi au louale ata ke. 17 Isito ata keu voele solisege au vadeu loui kisaiale keu ba velevalivelu ele isito keu voeleige keu iae au louale keu ba leleve olisi. 18 Iale kelate abo memila ovo mamoe kavege taoabeu lotige memila basuale keu leleve olilu o vai lelevetilu. 19 Memila avevete keu kosealu Mouseseu memila Bukau kotole basuale koto keneni loui ata haivelu. Isi ovou tao agisi eta ebuelu isi idi vole ivie hisobi ke hasive leguvai vai mamoe homo taoveta vai ivive ke vilialu. Isi vai mamoeu taole ketevei vai kisiai katuge Bukau tatale lavusege ata bahata kele taou bidoai lavulu. 20 Au kateaito ata lavigei avoe taou laele lavuale kele DILAVAu au basuai vaeavale kelu olale la basuve ke evisi lovave. 21 Moueseu kateaito tota kelate ai tao agisi dubule kisiai katulu isi Dubu uvue tai valevileta abo DILAVA hoeaseavale ketale tao ke kisiai katulu. 22 Iale basu mamive kele lai luleleige abo tao agisi Dubu valevile kele kisiai katuge keu DILAVAu nile duave baua. Isi lai luleleige taou lotiale ke ulale DILAVAule aveve toela uliai. 23 Memila aveve kele Mouseseu kateai tao agisi Dubu olobe lobe ke vavei hoeaseavelu aveve keu Otogou aveve ke munanave ulala. Isito ave vali kole IESU voeleale ke lale DILAVAu ataea aveve hoeaseavaeviva. 24 IESU KELISOu ataea Dubu tuvu kouale keveo tie solilu isito DILAVAu uvale Otogo keveo tilu. Kosealelu vatau Dubu keu Otogoe DILAVA uvale keu munana ulala iale keu eue tialeu DILAVAti ui lailolai DILAVA imiliaviva. 25 Diuia Dubu kosi kitae keu lahani igaligali kele valiu ni igali kele aule ovou tao agisi tai Dubu uv tuvute ke vavugei isito IESU keu lailolai voele solilu. 26 Au kateale ateto vata ko ai ui loale ke uvule lahani moeaga kele vateu tuvu agisi voelealu. Keu kate solisito tava igali vateu tuvu agisi vali vaove ata uvale koea toelalu voelealu. 27 Lai luleleige ata bahataeale vovoi isito keu iae DILAVAule aveveabe kaoai ibilaeabe vavei. 28 Katealelu DILAVAu louge IESU loaleu atabahaaea toela ibilalu tava igalilu voelealu iale au ba tota vaoe loi ataea toelalu voelealivelu bele. Isito aule loi olea inohovele uvale ke agigei tai Otogoe, kelu amiga neniava tiva o uva.