1 DILAVAu memila au basuale kenenile au aveve ke loui ata bahata haive solilu isito au haiveale keu vaoe aveve duau loiveve keu munana ula. Lahani moeaga kela abole ovo mamoe kavei vaui DILAVA hoeaseavagei abo kateai olavale aveveabe keu DILAVAu nile duave olisi isito memila basute kele aveve kateale keu nenie solilu. 2 Memila ataea DILAVA hoeaseavage keu aveveabe toela uliateto aveve toela avale huhui toela keu aboele ue solige abo ovo mamoe kavei vauvale ke kalevalu. 3 Isito abo vagala igaligali kele ovo mamoe kavei vaui abo aveve toela huhuai loui koseai lailoi toelau vato uva. 4 Iale kele lai luleleige ataea aboi toelalu ovo kavege taoeabeu lotivale kele toelaeabeu ba tava igalile ue solilivelu bele. 5 Katealeluga IESU KELISOu vatae lolivel ai DILAVAlu loui avoe ataea ovo kavei vaui a hoeaseavale kelu a homasialu isito a vava vole damuale kele dal vatae tai. 6 Da luleleige ataea abo toelalu ovo mamoe kavei vule vitai tatavele otovei vauvale kelu a olae solilu. 7 Katealeluga da loui kosealu kosive dala kou dale ai ola ai. Abo Bukau kotole di aveve loui kisaiale kelate dale ai. 8 Bukau kotole IESU kateai loulu koto kele au memila DILAVAlu loui avoe ataea abo toelalu ovo kavei vule vitai tatavele otovei vauvale kelu eu olae solili homasialu. IESU koto kele lai dibage DILAVAu memila guligulite ke kalevalu. 9 Kelega IESU loui avoe Kosive dala lou dale ai ola ula ai iale IESU koto kelega DILAVAu memila guliguliu avevete ke kalevai lovovele IESU avevete ke vaeavalu. 10 Ige IESU KELISOu DILAVA ula ai tava igali voeleale kele lailoi toela uliage uesolilu. 11 Memila Diuia Dubu kosive kea vali bahata ovo momoe kavei vaugei DILAVA hoeaseavaeaviva isito ovo kavei vauevivale keu ba atau toela ulialivelu bele. 12 Isito IESU tava igali voeleale kele ataea toela ulialu keu ue solige IESU eue tige mamave DILAVAu letatavage IESU adave vaiteveo ugulumai ulu. 13 Iale keu ave keveo ugulumai ulu au kele usege DILAVAule olea avolu tuvuai kavale ke bahata agisi genave valale otovege aule kosiabe olisi. 14 IESU voele igaliale kele ataea toela uliage valebeu ba DILAVAu nile toelalivelu bele. Isito aveveabeule vali bahata DILAVA nile duai ui. 15 Ige kelega munanau tuvu memila Bukau kotole koto vole loulu. 16 Isi loui avoe kosiveu loui kosealu valivole niule loige dale abolai basu vole dogave ai vaeavale ke dale di basu vai uvuiabele kisaiai vaeavage abole ke huhuai lovai tai. 17 Isi tota loi avoe dale toelaeabe eta huhualivelu bele. 18 Kosiveu kateai loui ataea aveve toela uliale kele ataea ba tota ovo momae kavei vaulivelu bele. 19 Iale di kakoluvuia IESU voeleale kele lailole doadoai loi DILAVAu uale kele hoeaseavai. 20 IESU keu lailolai kuvau doga alavalu. Memila Dubu keu ogonata DILAVAu uvale ou uvu ke bavulu. Ige atabeu ba keveo talivelu bele isito IESU loi voeleai lailolai ukolikoli anaka alavale kele lailole DILAVAu uvale keveo taevei. 21 IESU keu lailoi Dubu kosi kitae olisi ata bahata nikoveva. 22 Iale kelu lai sele kalevaito lailoi uvu vai DILAVA vavui loi vavavele uevei. Kosealelu IESU voeleige taoveeu lailoi uvu hoeaseavale kele lai ba lailoi aveve toela huhu moeagalivelu bele. Isi lai Babatisoage lailoi uvu duale ketale lailole DILAVA luvita igali toai atave olisi. 23 Lai lailoi uvu vai vavuale kelu lai meliai ata vole haivei kosealelu lai luleleige DILAVAu vadeu lailolai louale ke aule lailo vavei. 24 Lai katealele vole melitiluaga lailole kele volelai olai volele aveve dua ageluaga udua aevei. 25 Ata volea kate solisito igali toai guligulia vale ke kalevalu iale lai kateale a kalevaito vole vaevua loi guliguliai. Kosealelu IESU loiveve valiu vuguvugualu. Iale lai melitavai vole melitigei igali toai guliguliagei. 26 Lai koto leleve evisi luleleaito melitavai IESU kalevai aveve toela avaga DILAVAule oleve kateai lailoi toela totoai kosealelu IESU ba tota lailoi toelalu voele vole alivelu bele igalilau ke age vesulu. 27 Lailole katealuaga vaoe DILAVA ataea aveveabe aboele kaoai ibilaeabe vavelivelu ale ke lai lole vabuiavagei kosealelu olea DILAVA homasiavai hauve lehosivivale keale DILAVAu venele vaugei. Lole bavuiavagei kosealelu olea DILAVA homasiavai hauve lehosivivale keale DILAVAu venele vaugei. 28 Memila ata voleule Mouseseu basuale ke lehosivage ata abutita igalitaea ke ivai louge abole keu avale ke avoele kaoai to avolu uvualivelu bele isito vuleta kavage voeleai. 29 Memila avevete keu katealu. Kelate ave vali kole olea DILAVAu vo IESU homasiavai taove keta ivai koelehamai loui koseiva keu kitae oliesolilu. Ige DILAVAule ke agigei toelatigei kosealelu IESU voeleage mamave DILAVA keu taove keta ata kea toela ulialu. Isi olea lailo hoeaseavevale munanau tuvu kelu kotou toela louvale ketaeale vateu tuvu kitae agisi veneu vodale naive. 30 Lai luleleige DILAVAu bukau kotole loui avoe ata olea da vai toelativale kea ibila dale vavei. Isi au tota loui avoe dale di ataea aveveabe aboele kaoai. 31 DILAVA keu tuvute kea kosive kitae olialelu ataeale au aveveabe toela kaoai ibilaeabe vaveliveluage ataeale vabuiavai. 32 La memila DILAVAu atagau koto evisi vale ke huhuave la kele vateu tuvu kitae agisito kele otolova solievelu. 33 Vali kela ataeau ataea vudile lalai loui koelehamai la agisi toelatigelu. Lake ivala aito tialea aoili vateu tuvu ke agilu. 34 Ige ataea lai kakoluvu agisi dibulae hanavege la kelai uvuai tialea ke dulugelu. Isitota vali voleo ataea loi vavolota lai hau agige la ke ivai abolai tuvue solisito sisilaevelu. Kosealelu la dibage la DILAVA vileo hau vole vale keule vali bahata uitigei. 35 Ialelu labea momai lai valevile ke huhuaelive. Isito meliailivelu valivelu ibila kitae agive. 36 Lale kateai homasi solisito DILAVAu ola aluaga au lalai vadeu louale ke lale agive. 37 DILAVAu Bukau kotole loui avoe loivale ata keu valiu ege solilu. Aule loluaga solekata loi au ba kedalivelu bele. Niu vaga leguvale kelate aule loi. 38 Iale olea abo uvu vai damuale keale di nile lilikata leleisi abo evievile ui tigei. Isito olea da homasiavai dalu ola savale ke da ba abolai sisilalivelu bele. 39 Isito lailoea kuiakavale at olie solilu isito lailoea evisi lovale ataea iale DILAVAu ba lailo agigei toelatilivelu bele. Isi lailo kalevelivelu bele. Isito aule lailo agigei Otogoe tai sisila, sisila, sisila kitaela keu lailoai. AMENI.