Sabta 11

1 Evievi aveve keu kosealu evievile lai huhuige lai vadeulu olavale ke lailole agievei isi evievile lai huhuige Otogoe lai iva soliale kea ulu. 2 DILAVAu ataea memila uvale kea kateai abole evievile meliai uge DILAVAu ke letatavagelu. 3 Evievilega lai luleleige DILAVAu louge kotovele Otogoe uvale isi vatae uale ko nenia ulu. Lai ivivale isi iva soliale ke nenia kotove ulale bahata daiai ulu. 4 Evievilega Eibolou DILAVA hoeaseavai ovo mamoe kavai vauge aveveve keu Keini avevete ke leivialu evievilegau au kateai DILAVA hoeaseavalu. Ige DILAVAu aveveve ke ivai avolu loui avoe au lilikata ulu. Ata vaite Eibolou kateaito voelealu isito evievive aveve keu aike lailo haiveva. 5 Ige evievilega Inokau voele solilu isito DILAVAu tie solisege DILAVAu sisilave ava. 6 Koto evie soliale ata kea DILAVAu ba sisilaeabe alivelu bele. Isito olea Otogoe talivelu olai aboi uvu vai DILAVA vileo vaeavai loui koseai DILAVAUle loi ibila loamei isi olave ale keale ibilave agievei. 7 Evievilega Noau aveve koseale alu toelau loige DILAVAu ivai Noa laviage evisi bouti vole bosi koulu iale kele au ese lohomegei usege eu ata bahata kavege ea bahata vovoatievelu. Noau aveve kele lai ivage DILAVAu nile nenive ula lilikata uale ata. 8 Ige evievilega Eibolahamu DILAVAu koto evisi olave alu. DILAVAu toiavai avolu loui avoe ai vata huhuivale ke kalei vata voleo tige dale vata ke vai amui. Ige Eibolahamu kotove evisi au vata kalei kobelai au vata simalale vatava keveo tilu. 9 Au tialeu DILAVAu avolu vatava vole makale keveo tai ulu. Keu keveo oo koue solisito valai ula basumai uva. Au vo Aisikiu au vo Dieikoboti avoluvita ulu. DILAVAu Eibolahamulu vata makai louale kelate abolai loulu. 10 Eibolahamu oo leleve koui ele ue soliale keu kosealu DILAVAu Otogoe avolu oo leleve kouale kelau ke nikovai ui valai ula basumai uva. 11 Ige Selau au evievilegau ese vaeavalu keu mabata, koli olisi uale malahaveta koli oliale o bulukale isito Selau huhuige DILAVAule au louale kelate ai, iale kelega ese valu. 12 Eibolahamu maku olige ese vaveve keu avoele toloalu, nenie solilu isito DILAVAu louge mabata keu ese voo igali vaeavalu ivie Aisiki keu esea Otogou didi isi davalau gone , mili late moeagai ulu. 13 Da louale ata kea evievi ata olisi ulogo ba vovolu kea DILAVAu abolai louale ke bahata agie savalu. Isito oge volela lavisi ivale kelate ai sisilae velu kea loui avoe loea vatakou ata olie solisito deia latea vata koveo ueviva. 14 Koto kateale louale kea luleleige oeabe keu vata koveo ue solilu katealeluga abo olai aboi vatate leleve vai avoele ui. 15 Kea abo vata kalevale ke huhue solilu abo ke huhuibeto tota kuiakavai keveo tilu. 16 Kea kate solisito olaeabe kitaeu Otogoe vata keveo tai ui. Kateila age DILAVAu keveo kelai, kitae kouevei matiabe a solisito abolai loui avoe laea di ese lala kea. 17 DILAVAu memila Eibolahamu laviai avoe ai vo Aisiki kele ai ese moeagaeale ba ui. Iale vali voleo au Eibolahamu evievi kaoai laviai avoe. 18 Ai voo Aisiki vai talivelu kavai da hoeaseava DILAVAu kateai avolu louge au kotove evisi au vo igali ke vai kavalivelu tilu. 19 Eibolahamu huhuige voveule voleige DILAVAule ba isage kobelai iale Eibolahamu au vo bilivelu asege DILAVAu kotou loige au kalevale kele Aisikiu voelele kobelale kelate alu. 20 Ige evievilega Aisikiu valivaoe loiveve nona ke loui Dieikobota Isota haivei hoeaseavelu, abolai guligulialu. 21 Ige evievilega Deikobou au vo Dioseba ke vo abutita hoeaseavelu keu bulukalu loui au bedoeale besai. Au vavivu hoeaseavelivelu guliguliaito kalevei voelealu. 22 Ige evievilega Diosebau voelelu aive Iselala ata lavigei avoe da voeleisege ke iae DILAVAule la agigei hanavege Agubito vata ko kalevai lai vatateo teve. La tiluaga di itavata agisi talivelu keveo lailoi vata teo abavuve. 23 ige Mouseseu mamau au ivuti, keatetei Mousese vai mahogovaleu bata abutita igalita. Kosealelu ea ivage eseabe keu eseu dua baua. Isi abo evievile huhuige DILAVAule vaoe ese ke vilele hau moeaga agei. Iale kelu vatau kosi kitae ke vabuiava solisito basuve ke kosai ese ke va mahogovalu. 24 Ige Mousseu bosiai olae soliale vatau kosive belo ke vavia olisi. 25 Isi keu olae soliale kosive ke ole ui aveve toela alivelu. Isito au evievile meliai olale o ke kalei talivelu DILAVAu ataeali ui vateu tuvu agisi. 26 Kosealelu keule vaoe au ibila dua agiveve ke huhuai olale KELISOu ivile vateu tuvu agisi. Keu huhuige vaoe uvevete keu kitaeai Agubito oo Egypty valevile dua keneni leivigelu. 28 Isi au evievilegau dibage DILAVAu louale ke ese unila uale keneniale vovoatisi. Iale au Basiova aveve ke loui Iselala ata haivege abo ovo mamoe taola abo ou anaka vavulu. Ige voele Anelu ke ivai eseabe ese unila uale ke kave solilu. 29 Ige evievilega Iselala ataea ee taote koui tilivelu age eu davuhovosege vatau omeage ea tilu vaki voleo. Ige Agubito amia olai aota loi vaki voleo tai isi loisege eu loi bavuevege ea ee isi vovoatilu. 30 Ige Iselala ataea abo evievile meliai valiuni vai vai voleta dai. Vovoleavivaga keu basiu bokohovoi dobai vata kavalu. 31 Ige tebau keate vole Leihabi keu au evievile ivage Iselala ata abuti kea DILAVAu ataea ata abuti kea Dielikoea uveve kaoai ivaito loevelivelu. Ige Dielikou ou ataea ke ivei kavelivelu age Leihabiu ke ivei agigei au oe hogogelu. Iale vali voleo Iselalaea loi evievi soliale ata ke kaveito Leihabi kavae savalu. 32 Da olai koto kole ata volea aveve loui isito dale kea aveve louge kotoule egeai isito ata kea viala koea. Gidioni, Balaki, Samusoni, Diebeti, Deividi, Samuela isi Beloveta ataea. Kea kalaeabe da ba loui vesuavalive bele. 33 Kea aboi evievile aveve koseale alu volea vatau ata isege volea ata keali vole haivei vataeabe agilu. Volea aveve dua ula aeveale kele DILAVAu abolai vadeu louale ke abole agisi isege volea ovo o too ai hanite laioni ke aile vovosolisito meliai ulu. 34 Volea aboi evievile meliai uge veneu vauge solilu. Ige ata volea gaiata koievelivelu age ea ke lelevalu. Volea govada solige DILAVAu govada vavege ea tai tuvalile ata kavei ovegelu. 35 Ige keate volea aboi evievile meliai uge ataea bea vovoge DILAVAu isaevege ea kobekavalu. Isege volea dibulae uale kea olae savalu abo hanavege dogoai taevelivelu. Isito olai vateu tuvu agisi vovolivelu vaoe kobekavai ukolikoli mauli o lu agievei. 36 Ige ataea vole evasiavei koele hamai visukavaeavei vole umuvei agigei diblae otovelu. 37 Isi vuleta ata vole kaveva soata ata vole sogei bukigeva gaiata vole bievige voviva. Evievi ata kea hauiabeu ue solige mamoeta nanikosi vate kolovui ueviva. 38 Kea ou ue soliale late ai botoe ueviva volea manu valae ueviva, volea vatau vae ueviva, ige ataea ke kavei huhuai avoe isoho koea atau toelaeala koea. Isi vateu tuvu kitae vaveva abo huhuige kea atau toela isito aveveabe keu vatau ata ke leivigelu. 40 Kosealelu DILAVAu lailoeahau vole dua otovelu lai uge hau dua keale ui. Isito lai ue solige kea ba ulivelu bele. Lai ula age hau dua kea lailolai ulu. Kelu nenialivelu aele vaso.