1 Memila evievi atate kea vovolu isito aveveabe keu lailo haivege lai luleleige aveve isuteu lailo bavugeale ke gogoniave. Isi la aveve toela ai eveivale ke kalevave isito lailoi evievile viliviliavale ata kelate alivelu DILAVAu lailolai hau vole otoveale ke agive. 2 IESU keu lailoi evievi umuka iale lai meliai vali bahata aveve dua ke kaoai huhuagei IESU keu idi keu do homasiava solisito vaoe au mamati ui sisilalivelu ke huhuaive olale idi ke dole vateu tuvu agisi voeleai. Ige ataea koele hamai evasiavale keu ke huhue solisito idiu dole voelealu. Iale kelu keu aike au mamau telona adave vaiteveo ugulumai uva. 3 Iale ataea vai toelatisi avolu louvale ke huhuave. Katealelu la ba vateu tuvu agiale ke ba homasiavalivelu bele. Isi kalevalivelu belel eu lailo huhugei vateu tuvu kitae agilu. 4 IESU au avevete kele meliai aveve be toela a solisito voele kavalu. Lailoi toela ibilalu isito laea aveve toelale meliaito vovo savalu. 5 Isoho DILAVAu la melitigei la agigei au ese toale ke la momaeavalu. Au Bukau kotole loui avoe di esea kosiveu vateu tuvu lameale kele labea homasiavale. La eviluaga momai kalevalive isito meliai avoluvita uve ai maulitelu. 6 Kosealeu kosiveu olelai olale ke aule vaeu tuvu vavei. Isi olea eseve oliale keta aule vateu tuvu vaveito ba hoeaseavege abo doadoai. 7 Bukau kotou katealu iale la vateutuvu agiale kele meliai uve. Laa vateutuvu agiale kele ivage DILAVAu la agigei au ese toai la hoeaseaveva. Vatau ataea olai eseabea aveve dua alivelu age abole vateu tuvu vavei. 8 Iale kelate DILAVAu eseale bahata vateutuvu agisi isito isoho la vateu tuvu agie soliale kele laea DILAVAu ese olie solilu isito heiata late mama soliale ese. 9 Lailoi vatau mamuvuia lailolai louge lai kotoeabe evisi lailoi aveve neniavalu. Isito lailoi Otogou mamau lailolai louale kotoeabe lai leivialu. Iale kelu lai kotoeabe evisi lailoi aveve keneniavai aboili u dua ai uevei. 10 Lailoi vatau mamuvuia lahani moeaga site ke uvule aboi olale lailolai loui vateu tuvu lailo vavei. Isito DILAVAu kate solisito lailo hoeaseavelivelu vateutuvu lai loamei olale lai aveveve late aevei. 11 Lailole luta vateu tuvu agige keule tuvuige kele lai ba sisilalivelu bele. Isito laile kele otolova solisito kele melialuaga lailoi aveve kele lailole udua ai. 12 Iale lai aveve volea toelage ke ivai kalevai kuialai aveve dua ave. 13 Isi kuvau ioni kela tigeve ige ata volea la ivei la lovegei tai aveve toela kalevaive. 14 Ialelu kobekavai ata bahataeali uveve dua ai uve. Isi la avale toela kalevai aveve dua age abo DILAVAu avale late laele ivai. Aveve kateale a solivale kea ba kosi kitae DILAVA ke ivalivelu bele. 15 Ialelu lamigalai neniave DILAVAu lailo huhugei haudua lailolai avale kele momai kuiakavai vale vole toelau lai uvule uale ke kalevage au kitaeai ata vole agigei toelatigelive. 16 Ialelu lamiga neniaveve la lamiga neniave soliluaga lale tebau aveve ageve. Isoho Isou DILAVA huhue solisito aveve toela ale kelate lale ave. Iso keu ese uni isege Deikobou kove. Isito Isou au mamau hau agiveve ke huhue solisito au lovi iveve ke huhuai hau bahata ke au ko Deikobo vavuge koveu au lovi vai vavuge eu ilu. 17 Isito keu iae la huhuige Isou olale au mamau hau keneni agisi ige mamaveu kuvave bavulu. Kosealelu Isou memila hau keneni agisi au ko vavulu kateage Isou hau ke huhuai alio kitae alu. Isito hau agiveve keu avoele malomaloalu. 18 Memila voleo Iselala ataea tala vole ivi Sainai keveo tievelu, tialea tala ke mutie usege DILAVAu dobai loi tala kele uge veneu avoele nage goe kitaeu bavuge loai ulu. Ige kele hebulu kitaeu lolu. 19 Ige Iselala ataea tala ke valae uevesege kibiu kotoige abo evisege DILAVAu kotou loige abo ke evisi bavuai olae savalu DILAVAu kotou tota loi. 20 Kosealelu kea DILAVAu koto evialelu vabualu. DILAVAu abolai loui avoe labea momai tala koveo vaea talive ige lai ovo beta vaealoige vuletige au voeleai. 21 Tala keu aveve toela kitaeage Mouseseu loui avoe da ke ivai teteai vabuiavalu. 22 Iselala ataea memila tala keveo tiale aveve kateale ivai bavuiavalu. Isito laea ave DILAVA luvita igali toale kele la ba vabuiavalivelu bele. Isito lale sinasinai Saioni tala keveo ukolikoli DILAVA ke oo Dielusalema keveo Aneluve moeaga moeagaeali uve. 23 Ige ata moeagaea aveve kaoivale DILAVA keu keveo ulu. Ige Ekalesiave luta uale ataea ivi kisaiavale keta keveo uevelu. Ige DILAVAu ata hoeaseavege aveveabeu nivele duai uale kea munanata keveo ulu. 24 Ige IESU lailolai basu dogave ai vaeavale lailoi toela uliavale keta lavui ulu. Memila DILAVAu Eibolou taou lotiale ke ibilave alu isito IESU taou lotiale kela lailoi toela totoalu. 25 Laea Otogou vatava keveo tiveve ata lala koea iale kelu lamiga neniaveve. Labea momai DILAVAu lalai vadeu louale kelu homasiavale DILAVAu memila vatae loaleu tala keveo atalai louge abo kotove evisito homasiavage au ke agigei toelatigelu. Iale DILAVAu aike Otogola ui lailolai louvale ke lailole evie soliluaga lailole oleve kateai au lailo kavelivelu ale ke gogoniai. 26 Vali voleo louge vatau hadalu, oo hamuu katulu isito aike au lailolai koto vole loui avoe dale vaoe louge vatau Otogoti hadaviliviliai. 27 Au louale keu baiu kosealu au memila valevile aeveale keale hada viliviliai ue solisi. Isito au ele uvale keu ba katealivelu bele aule u ulagei. 28 Iale DILAVAu Otogoe vatavau dogau hadahada soliale vai lailo vaveale kelu lai neniai vabuiavai sekiai ui hoeaseavai guliguli dua agei. 29 Kosealelu lailoi DILAVA keu vene late iale lailole aveveve dua kateale a solige aule lailo agisi toelatigei.