1 Iale kobekavai ese igali late ai vali bahata volelai olai vole dulugei uve. 2 Ata oleu vadivadiai laeo loige ke vai oe vaeavave. Kosealelu memila ata volea katealele Aneluia loige agigei aboi oe otovelu. 3 Isi ata volea dibulae uale keta huhugei dulugeve isi meliai guligulile dulugeve. Kosealelu isoho lale lata dibulae uluaga olale ata volea la dulugei. Isi ata olea vateu tuvu agiale keta dulugeve kosealelu isoho lale lata vateu tuvu valuaga olavale ataea la dulugei. 4 Da koto vole louge evive vole lohomegevale aveve keu duave. Kele keateule au vela huhuisege velaveule avota au ivu huhuagei isito olea abo keate kalevei ata volea keateali aveve toela ai. Isoho voleali tebau aveve ke age DILAVAule aveveabe ibila ke vavei. 5 La uluaga moni huhu moeaga kalevave isito vadeu aveu laele uale keu avola keu. Kosealelu DILAVAu loui avoe da ba la kalevelivelu bele. Isito dale vali bahata laili ui la dulugei. 6 Iale kele lai melitavai loui koseai DILAVA keu loo dulugevale kosive. Kelu atabeu ba lo dikaiavelivelu bele. Ige lo ba vabualivelu bele. 7 La nimabigevale ata keta momagelive. Keala DILAVAu koto loui la haiveva ige aveveabe keu duave ula. Iale abole aboi evievile melitavale kelate lata aevigeve. 8 IESU aveve keu igali memila ave isi vato ulau ke alu. 9 Iale ata volea loi koto tolove louge ke evi kalevave la ke evige koto keule la agigei kuvau toelala tai. DILAVAu la hoeaseavei lai uvu agisi melitige keu duave isito lovi ivevele basu loui lovavale kea loi abo koto louge labea momai kotoeabe evilive. Kosealelu la basu ke lovage keu ba laa hoeaseavalivelu bele. 10 Kosealelu IESU loi voeleige ukolikoli agiveve kuvau ulu ige ata volea Diuia avale ke lovail loui avoe loeale kole ukolikoli vai. Isito aveve katealele abo ba ukolikoli agilivelu bele. 11 Diuia Dubu kosi kitae keu memila ovou tao agisi Dubu uvu tuvute keveo toelaeabe totolu tilu. Isege Bubu koso volea ovo avave agisi tai botoe vaueelu. 12 Kelate abo ole IESU kava solisito vai tai ou iae kavage voelealu. Kosealelu IESU olale au taota ataea toela bahata totoai. 13 Iale IESU keveo vateu tuvu agiale kelate lailota vateu tuvu agisi. 14 Kosealelu vata koveo lailoi oo leleve keu ue solilu isito lailoi oo leleveu loiveve kela lai ko nikovai uva. Keule loige lailole talivelu keveo ui IESU luvita. 15 Iale IESU aveve kelu lai vali bahata DILAVAlu sisilai ivive loui hoeaseavagei aveve katealele lailole lai loi aile IESU ivi loui letatavai ata haivei. 16 Labea momai aveve dua avale ke momaeavalive isito vali bahata vole dulugeve. Lale kateale ai DILAVA hoeaseavage aule lalai sisilai. 17 La naligevale kosi kitae kea koto evisi lovave. Kosealelu kea lai ukolikoli agiveve mauli oo lu agiveve kele laa naligeva. DILAVAule vali vaovela abo oleve kateai la nalige vale ke loui ibilaeabe vavei katealelu kotoeabe evige abo kele sisilai abo haukala ke ai la dulugei. 18 Isi lolai DILAVA laviageve loi uvule lo dibage haube toelau uesolilu. Kelega lo olavale vali bahata aveve dua ula agei. 19 Iale da la lavigei olavale la DILAVA daluiavage au solekata da hanavage da laeo loi. 20 DILAVA kela lailoi kosive IESU ke isage au kobelalu. Ige IESU voeleale kelega au mamoe nalievevale kea kosi kitae olilu isi kele basu dogave ai vaeavale keule vali bahata ui tigei. 21 DILAVA keu uvale DILAVAla vali bahata aule ugei iale da olale DILAVAu la melitigei la vadeu laele ue soliale ke lamegei. Ige la kele olave ai aveve dua agei isi da olale DILAVAu IESU KELISO vilele besai au ola lailolai agei. Ige kele lai vali bahata IESU KELISO ivi letatavai hoeaseavagei koto keu lelevela keu. 22 Di kakoluvuia da koto lalai louale ke eviu dua ave da levaleva ko kisaiai egeta butuha solilu ialelu meliai ke lova dua ave. 23 Isito koto voleave da louge evive. Abo lailoi kakolo vole Timoti dibulale vesui lolu iale aule solekata daeo loige da avoti laeo loi la ivegei. 24 Iale loi sisila nona ko loui lai kosive isi evievi ata bahata ke lavige ige Italie evievi ata kea lalai abo sisila nona hanavalu. 25 Da olavale DILAVAu la bahata huhugei la hoeaseavei di kotou kele katei ulu.