1 Melosedeki keu ovole Salema keu kosi kitae ige eue Otogoe uvale DILAVA keu ke letatavage Dubu naliavale ata kitae olilu. Ige Eibolahamu tuvaliai tai ata kitae kavei to kuialai loige Melosedekiu avoele loi hoeaseavalu. 2 Ige Eibolahamu tuvaliai kosive kaveale kea hau agiale ke taitive agisi Melosedeki vavulu. Melosedeki keu iviveu kosealu keu lilikata lavisi auvu uale toelabeu avoele uesolilu. Ige ove salema keu uveve dua avale ologola iale keu uveve dua avale kosi kitae. 3 Bukau kotole Melosedekiu mamata aiaveta nonau galau ue solilu isi atave kea nonata ue solilu. Isi voeleale valive nii keta lai dibaeasolilu. Keu kateai DILAVAu volate keu dubu naliavale ata kitae olisi vali bahatale ui tiva. 4 Lai dibage Melosedeki keu kosi kitae. Iale kelu lailoi umuka o gala Eibolahamu keu tuvaliai ke hau agiale kele taiti agisi Melosedeki vavulu. 5 Eibolahamu kakolola Livai iale livaile loale ata kea Dubu haute avale ataeala kea ialelu DILAVAu livai le ke lavigei avoe laeale Iselala ata kele taitiabe agigeve. Au kateai louge ea abo atate Eibolahamu atate ke ulaele taiti agieveva. 6 Isito Melosedeki keu livaia ataele loie solilu. Keu kate solisito Eibolahamu vileo taiti agilu. Eibolahamu kela DILAVAu avolu koto loui vaeavale Melosedekiu avoele tati agisi hoeasavalu. 7 Iale lai kele malomalo kalevai Melosedekiu Eibolahamu hoeaseavale kele lai ivage Melosedeki keu ata kitae. 8 Livaia Dubu kosi kitae kea ataele Dubu taiti agiale kea memila vovoi vesulu. Isito Bukau kotou loui avoe Melosedekiu Eibolahamu vileo taiti agiale keu voele soisito vali bahata uva. 9 Iale kele da koto vole louge evive Eibolahamu taiti agisi Melosedeki vavulu. Iale kelate Eibalahamu kakolo Livai keu atave kele loito taiti agisi Melosedeki vavue solilu. Isito umukaveu taiti vavuge keta kele taiti vavuale ke umukave vole alu. 10 Livaiu ue solisege Eibolahamu taiti agisi Melosedeki vavulu. Ialelu lai dibage Melosedeki keu memila ulu ialelu Livaiu taiti vavulu ige eu ata kitaelu loui taiti agilu. 11 DILAVAu memila au basuale ke loui Iselala ata ket haiveito. Livai ata ke makage ea basuve kele Dubuve naliavale atate olievelu. Au kateaito Livai vameli kea uvule ata vole ivive Eloni ke letatavage keu Dubu naliavale kea ese uni olilu. Ige Eloni isi vamelive kea Dubu hau ai ata haivege avevea beu duabeto Dubu naliavale kosi vole dogaveu Melosedeki kelaeu loie solilu. Kosive vole dogave keu lolu isito keu Eloni vameli kele loie solilu. 12 Dubu naliavale kosive dogave keu loaleu basuale doga tagau ke vai loige mamive keu uesolilu. 13 Dubu naliavivale kosive dogaveu loale kela lailoi kosive IESU KELISO. Keu Eloni vameli kele loie solilu. Iale au loale ke atatebeu Dubu hau ke a solilu. 14 Lai dibage IESU keu Diuda atatele lolu. Ige Mouseseu memila Dubu naliavale ke makageale kele Diuda vameli kebe loue solisito Eloni vameli te ula lougelu. 15 Iale lai malomalo kalevaito Dubu naliavale kosive dogaveu loale keu Eloni late olie solisito Melosedeki kelate olilu. 16 Memila Mouseseu basuai vaeavai loui avoe Eloni vamelile loale ke ulaeale Dubu nalivale kea kosi olisi. Isito IESU keu basuale kele Dubu naliavale kea kosi olie solilu. Isito au ukolikoli vuvune vai vali bahata uvale kele Dubu naliavale kosive kitae olilu. 17 Bukau koto kele loui avoe aule vali bahata Melosedekiu ale kelate Dubu kosi kitae olisi ui tigei. 18 Iale DILAVAu basuale mamive ke levovoai basuale dogave ke vai lovovele vaeavalu. Kosealelu basu mamive ke vuvuneveu ue solialelu ataea ba kele ukolikoli agilivelu bele. 19 Basuale mami kele ataea aveveabe keu DILAVAu nile duave oliesolilu, isito DILAVAu basu dogave vaeavale kele lailole nivele lilikave ula olisi ui au loiveve ke huhuai ulivelu au loige avoluvita igalitoai. 20 Iale kele da olai koto vole loui DILAVAu au ivi tuvutele memila Dubu naliavale ke letatavage solilu. 21 Isito DILAVAu au ivi tuvutele IESU letatavalu, makage au Dubunaliavale kosi kitae olilu. Bukau kotole koto katealea ulu isi loui avoe DILAVAu au ivi tuvutele loui avoe aule vali bahata Dubu naliavale kosive kitae olisi ui tigei. Iale DILAVA ba au louale ke kalevalivelu bele. 22 DILAVAu koto kateale louale kele lai dibage IESU basu dogave vaeavale keu basuale mamive ke leivialu iale lai ke lovaluaga lailole u dua ai tigei. 23 Diuia Dubu kosive kea abo lovile vovosege tota volea lovoeabe ke agisi Dubu kosi olisi lovi ke aeviva. Katealele Dubu kosi kitaea moeagaea ueveva. 24 Isito IESU keu Dubu kosi kitae olisi vali bahata uva. Iale atabeu ba lovove vai hauve alivelu bele. 25 Keu vli bahata uvale kosive iale ataea siauvele daiai DILAVA vileo loale keale leleve ula abole mauli agievei. Kosealelu IESU keule vali. 26 IESU keu ata tuvute avevebe toelau avoele ue solilu. Ige uvue keu vatau ataea aveve toela avale ke beu avoele uesolilu. Isito uveve keu duave ula. Iale DILAVAu Otogoe letatavage keu lailoi Dubu kosi kitae olisi lailo dulge dua ava. 27 Keu Diuia dubu kosive kitae avale kate solilu Diuia Dubu kosive keale vali bahata abo toela ulialivelu ovo mamoe ke nohovu kavei vaugei. Isi aboe atate kea toelatalu abole kateigei mamoe kavei vaugei. Isito IESU keu valibela kateale a solisito tava igali ata bahata kea toela ibilalu voele alu. 28 Memila DILAVAu basu vole vaeavalu isi kele ata makage abo Dubu naliavale kosive olisi neniai hau ke a solilu. Kosealelu kea ata ula. Ialelu vaoe DILAVAu au ivi tuvute loui au vo letatavage keu kotove evisi aveve dua ke ula ai vali bahatale uva lailo naligeive.