Sabta 6

1 Iale lai DILAVAu kotou umuka kele lulele ai kotove voleta kaoai kele lulele aevei da memila kotou umuka loui la haivei loui kosealu lai aveve toela ke kalevai lai uvu vai DILAVA vavuve. 2 Isi Babatisoave ige kosiveale abo ada agisi lai tatale otovei la hoeaseavei isi voelele kobekavave koto da loui DILAVAu ataea aveve aboele kaoaveve koto keta da lalai loulu. 3 Iale da olale laea kotou umuka kele luleleave isi kalevai DILAVAu koto voleta kaoavei ketale luleleave DILAVAu lailolai kuva kateale alavage lailole kateale ai. 4 Isito ata olea DILAVA lovai kotovele luleleale kea kele kuiakavai aveve toela avale keale oleve kateai abo aveve toela kele kuiakavai DILAVA lovai. Kea memila DILAVA aveve kele luleleai munanave tuvu agievelu. 5 Isi kele luleleige DILAVAu koto keu duave isi dibage vatau dogau loiveve keu vuvunele kitaeai. 6 Iale kea kateaito DILAVA kalevai kuiakavale kele abole oleveo kateai abo aveve toela kalevai tota kuiakavai DILAVA lovai keu nenie solilu. Kosealelu memila abo IESU vai idiu dole kavai avolu kotou toela louge ataeau evasiavale kelate ata kea DILAVA kalevai kuiakavale kea memila abo ale kelate ai IESU vai tota idiu dole kavale kelatela abo ke ava ige aveve kele ataeale IESU koeleavai vai toela tigei. 7 Koto kele da koto vole louge evive ataea avale keu vatau dua vatau toela kelate vatau dua kele ataeale lovi kage veniu loige lovi keale lalava dua ke ai ige ataeale ke agisi isi DILAVAla vatau dua kateale hoeaseavalu. 8 Isito vatau toela kele vale vile kea lalava dua alivelu bele vatau toelage adu toela keale kele lalavai ige ataeale kelu tuvuai adu ke vaugei iale lailole DILAVA lovaitige aule lailo hoeaseavei isito lailole kalevai tige aule lailo agisi toelatigei. 9 Di huhui kakoluvuia da kotou isula ke lalai loulu isito da huhuige laea da louale kelate a solisito DILAVA lovai tiva au la agigei tivale kuva kela tiva. 10 Iale DILAVAu la avale ke ivai ba la momaeavelivelu bele keu aveve dua avale kea kosive. Ialale la vali bahata lai uvu vai vavui aveve dua ai vole dulugevale kele au ba la momaeavalivelu bele. 11 Iale da olale la igaligaliai aveve kateale avale kele meliai tigeve. Ilivelu vali vaola lai ukolikoliu mauliu lalai uvale ke agive. 12 Iale da olae solialela la aveve ke homasiavalivelu isito evievi ata volea abo uvu vai DILAVA vavui meliai inohovele uvale kelate lata ave. Ilivelu DILAVA lalai vadeu louale kelate agive. 13 Memila voleo DILAVAu Eibolahamulu loi avoe leleve ula dale alu aveve vole ai. Kosive beu DILAVA lateu ue solialeluga DILAVAu au ivi tuvutele koto ke loulu. 14 Au Eibolahamulu loui avoe leleve ula dale a hoeaseavage ai atateale moeagai. 15 DILAVAu kateai louge Eibalahamu koto ke evisi uvaga DILAVAu louale keu avoele lolu. 16 Ataeale volelai badu koto louge voleule kosiveu ivi louive ela kotoeabe ke kavage abole kotoeabe ke evisi loui koseai kotove keu leleve ige abole volelai kotou toela louvale keule vesui. 17 Ataea aveve keu katealu ige DILAVAta kateale ai au ivi tuvutele loui olale Eibolahamu atate keale DILAVAu au ivile louale keu sele olie solisito leleve ula au ba au louale ke kalevalivelu bele. 18 DILAVAu vadeu alivelu au ivi tuvutele koto louale kele lai dibage o luleleige sele nona olie solilu si lai dibage au louale keba kalevalivelu bele. Ialelu lai vatau aveve kalevai DILAVAu lailo agiveve ke huhuai melitavai ulivelu au loige lai ukolikoli lu o mauli agisi sisilai. 19 Lai ukolikoli agiveve ke huhuige anika late ba hadalivelu, tetetetealivelu bele lai ke huhuai melitavage valege toelau ba lailo agigei toelatilively bele. Isito lai lole eue tiveve ke huhualuaga lailole DILAVAu uvale keveo ui. 20 Ige IESU lailolai unila tialeu keve uva keu Dubu kosi kitae oliale kelu aule Melosedekiu Dielusalemae oo kele kosi kitae olisi Dubu naliale kelate ai Otogoe ui vali bahata lai lo dulugeva.