Sabta 5

1 Laea DILAVAu huhui ese lalaea katealelu melitavai lovai aveveve late ave. 2 IESU KELISOu lailolai olai amiga vai lailoa vavei voeleale keu abo memila ovo mamoe kavai vauge nai hagoale kelate DILAVAu ke ivai IESU KELISOlu siisla kitae alu iale IESU KELISOu lailolai ale kelate lailota volelai olai vole dulugei. 3 Laea DILAVAu ata lalaea katealelu aveve toela bahata ke kalevave labea momai volele tebau aveve ke aevegelive. Isi huhui toela aevegelive isi momai ai kakolou hau ivai huhu moeagalive. 4 Isi momai aveve toela koto keta loui kotou baiu ue solivale keta louevegelive. Isito kotou dua ula loui lailoi mama DILAVA ke hoeaseavageve vali bahata. 5 La huhuige ata olea aveve toela kateale ai voleali tebau aveve ke ai. Aveve toela ke ula huhuaevei volea haute ke ivai avolu ola kavavale kea ba DILAVA IESU KELISOti uvale vatava keveo talivelu bele. Ata olea volea haulu ola kitaeavale hau keule DILAVAe be olisi. 6 Isoho ata volealai uvu isi la seleavei loui koseige aveve kateale ale keu duave. Abo kateai louge momai ba kotoeabe ke evisi alive kosealeleu ata olea DILAVAu koto evie solisi aveve toela kateale avale kelai DILAVAule tuvu kitae ai. 7 Ialelu labea ata katealeali igali toai aveveabe late aevegelive. 8 Lailo kea memila vavile ui vaviu aveve ke ave isito la ave kosiveu ese olisi atagavele ulu. La kosiveu ese olisi atagavele ulu iale atagau aveve kelate aevigeve lai uvevele. 9 Ataga kele aveve kosealeale ba loi aveveu dua aveve lilikate isi koto leleve sele site. 10 Ialelu kobekavai kosive vai sisilatilivelu aveveve ke kaoai aevigeve duave ula. 11 Labea momai hau voleu baiveu uesoliale ke aevegelive aveve katealeu vaviu avevela keu iale lale atagale ui aveve kateale bavuge keu ba laele lolivelu bele. 12 Ataea vaviu aveve kateale ai mahogovage keu toela kitaeale kele momai aveve toela kateale loui vole haivegelive keu ke evisi avota ke ava. 13 Kelu loui aveve toela kateale ke bavuve kosealelu kosiveu atagale hau keale ba daiai loi eule haovole ui ige KOSIVEu atagale lale ba ke ivai dibage oleve keu toelave isege oleve keu duave. 14 Katealeluga Bukau tuvu kotou loui avoe navavale ataea kobekavave la kea vovoale ata latea iale kobekavage KELISOu atagau laele kalui atagai. 15 Koto katealelu lai uvevele neniai uve momai ata malomalote late ai uevevale isito ata lulelelete late ai uve. 16 La vadeu avale kele aveve dua ula ai neniai uve kosealelu ave vali kou valiu toelala kou loiva. 17 Laea momai lulele solivale ata kelate aevegelive isito kosiveu olate kaoai ivai kele luleleai olave ke ula. Aevei nikovai guliguliai uevigeve. 18 Labea momai eu toela ke isi tilogoalive, ee keu tilogoivale ela keu ale ke iluaga tilolou aele dobalau ke alu ige ale valila ke kakovai sonemei oigei tuvuve bukialivele. Kelu kate kalevaito munanau tuvu laele uale kele sekiai uve. 19 Isi volelai Bukau koto loui vole haivei nogoli dubue guliguliavale ane keta loui saiale eneve ke loui vole haivedua ai DILAVA hoeaseavai ugeve. 20 Isi vali bahata lailoi kosive IESU KELISO ke ivivele lailoi mama kitae DILAVA ke hoeaseavai uevigeve. 21 La IESU KELISO vabuiavai hoeaseavale kele vole huhugei vole dulugei uevigeve. 22 Keatea la kosiveu koto evisi lovai tivale kelate lai velavuia koto evisi olaeabe ke ave. 23 Kosealelu KELISO keu Ekalesia kine olisi aveve toelale au ata agiale kelate malahaea keatea kine olilu. 24 Katalelu Ekalesiaea KELISOu koto evisi lovale kelate, keateale abo velavuia koto evisi olaeabe aevigei. 25 Malahaea KELISOu Ekalesialai olai abolai voeleale kelate lai ivvuvulai olai dulugeve dua ave. 26 IESU KELISOu voeleale kele Ekalesiaea aveve toela ulialu keu kateai olale abo kotove evisi Babatisoage au ke agigei tuvutigei. 27 Keu kateai olavale Ekalesia hoeaseavei aveveabe toela isi huhuiabe toela uliage abo atau tuvu olige aule bae amigalu agigei. 28 Malahaea la lamiga hoeaseavale kelate da olale lai keate hoeaseave dua ave. Isi olaeabe keneni ave malaha olea abo keate duluge dua ale keale abobigatagau ke hoeaseavalu. 29 Ata beu ba au vava ke koeamalivelu bele isi late isito aule au vava ke naliu dua ai. Hoeaseavai kelate IESU KELISOu au Ekalesia ke naligei hoeaseaveva. 30 Lailoea IESU KELISOu ata olisi vavave late olilu kelegau lailo dulugei lailo naligeva. 31 Kelega Bukau kotou loui avoe voo voleu au mamata au aiata kalevei au keateti igali toage kea vava igalila kea. 32 Vole lohomeale kele koto leleve voleu ulu koto keu kosealu IESU KELISOu Ekalesia keali igali toale keu vole lohomeale kelate. 33 Nona keu ioniveu katealu isito malahaea la lai vava hoeaseavale kelate lai keatelai olai hoeaseaveve ige keatea lata lai velavuia koto evisi olaeabe ke aevigeve homasi kalevaito abo vadeu louge evisi ave.