1 Daa laa lavigevege evive da kosiveu hau avale kelega abo da vai dibulae vaea vage da aike koveo uva. Isito da olale dilavau la toiavei. Uvevedua lameale kele meliai aveve dua ageve. 2 Labea momai lamiga letatavai hanivavalive isito vole huugei vole hoeaseavageve. Momai volelai tuvuagelive isito voleali sisilai vole dulugeve. 3 Munanau tuvu la agigege la ata igali oliale kele meliai voleali u dua ave. 4 Munanau tuvu igaliu lai lo agigege lai IESU luvita vava igalitoai Otogoe tiveve ke igali huhuaeviva. 5 Lailoi kosive ke igaliu kitae alelu aa voele evievi igali babatisou kuvaveu igali. 6 Ige DILAVA keu lailoi mama igali isi lailoi kosi kitae igali keu vali bahata lailoili ui lailo agigei melitigeva. 7 Keluga lai bahata ata igali isito KELISOu au siaule au lovi o hau igaligaliai lailo vavelu. 8 IESU KELISOu avale kele bukau kotou koseale loulu lovi avoe au eue talivelu seteneu atave dikaiavalivelu kea toelale ogeta au atate otoveito au haukala igaligaliai vavelu Bukau kotou kateai loulu. 9 Isito au eue tiale keu baivela vadeu keu baivela kosealu keu memila au oo kalei vatae dobai lolu. 10 Otogoe dobai loale ataleke igalila kuialai Otogoe kenei leivigei au oe tilu. Keu keveo tialeu vale vile bahata kea kitaeabe olisi naligeva. 11 Iale IESU KELISO kela au lovi, haukala ke igaligaliai au olau ata ke vavelu ige volea abositolo haukala ke aeviva isege volea Beloveta isege volea oo igaligalile ata haivesege volea Basitasege volea Tisa sege ke igaligalile au haukala vaveale ke aeviva. 12 Keu ke makagei au vuvune, siau vavei olale kea haukalave ai atave bahata ke haivei dulugei ige abo evievile meliai ui isi IESU KELISOu ata vole haivege abo evievile meliai ui. 13 Keale kateige lailole bahata igali toai lailoi evievile meliai DILAVAu voo keu avevele lulele ai lailole kateige lailoi evievi keule kitaeai IESU evievi ke nenita ui. 14 Katealelu lai ba lailoi evievile eseu esea avevelate alivelu bele seleivale ata kea loi seleavege abole kotoeabe evisi ai. Isito lai katealivelu bele isoho seleivale ataea loi koto ni volete, tolove louge lai kotoeabe ke evi kalevai. 15 Lai ke evi kalevaito koto leleve loui voleali sisilai vole dulugei lai katealuaga lailoi kosive kitae IESU KELISOu aveve kele lai bahata meliai ui. 16 KELISO keu Ekalesi kine kitae isege Ekalesia kea vavave late lailoi vavale adau uge genau uge niu baiu ulu. Iale keale kineu ola ke aevegei. Kelate lai igaligaliai KELISOu valale uale kelu lailole lovi ai o hauve ai volelai olai vole dulugei kele lailoi Ekalesia aveve keule meliai ui. 17 Katealelu da KOSIVE ivile koto loui la haivege evive, labea ba evievi ata olie soliale ke aveveabe late aevegelive. Kosealelu kea huhui be dua a solilu. 18 Kea katealeluga vaviu aveve ke ulau aboele ulu, uvuabeu meliage kea DILAVAu kotole lu lele soliale kelu abo ba DILAVAu mauli agilivelu bele. 19 Lai lole ata katealea aveveabe toela loui haivege kea kele ba matialivelu bele kosealelu kea abo uvu vai aveve duale vaeava solilu abo uvu vai aveve toelale vaeavale kele abole ke ula huhuai aevigei. 20 Kea kateiva isito laea IESU KELISOu aveve katealebe ale evie solilu. 21 Lo memila tialea IESU koto leleve ula loui la haivege la ke evisi vaevelu. 22 Katealelu la memila avale ke tota aevivale, la memila avale keu vavau ola keu la seleavei la agigei toelatigeva. 23 Kateale a kalevaito uveve doga huhuai lai uvu neniavai uve. 24 Kosealelu lailoi DILAVA keu tuvute ige aveveve keta nenive ula iale au uveve dogave vai lameale kele lamiga hoeaseavei DILAVAu avale kelae ai uve. 25 La bahata kenenia vole seleave kalevave isito koto leleve loui vole hoeaseavegeve kosealelu lailoea ata igaliu ataeala. 26 Isoho la volelai tuvualuaga momai tuvuai uvaga valiutai dobalive. 27 Isoho ai kakolu tuvualuaga solekata vesuiava a ke asolige valiniu tai dobage setenelu anakala ke alavalu aule kela velevai aeo loi kelu tuvu kale. 28 Daa olavale ata olea vavoloivale kea vavolo kalevaito lovialivelu kele moni agisi abobiga dulugei ata volea vale site keta dulugei hau vaveve. 29 La voleali nonaluaga lai nonau tavale kotou toelata louevegelive. Isito nonau dua ula lougeve ilivelu ata vole agigei toelatige kalevaito agigei hoeaseavege abole lai kotou dua kele u dua aevegei. 30 Labea momai lai aveve kele DILAVAu munanau tuvu vai uvutievelive. Kosealelu munanau tuvu lai uvule uale keu DILAVAu kisai late kelega la dibage DILAVAule vali voleo ba la agigei au vatavae tai. 31 Labea momai volea toela ke huhu moeagagelive isi volelai tuvualive isi ataea nile volea aveve toela loulive isi huhui toela volelai alive. 32 Isito vole huhugei aveve dua volelai aevegeve isi vole dulugeve ata vadeu laele aveve toela age toelave ke ibila avale isito DILAVAu IESU KELISO vilele dai. Lai toela uliale kelate ai volea toela huhu kalevaito momaeavave.