1 DILAVAu au loviu ii vai damula age da IESU KELISO ivile lovive ke ai Diu ata olie soliale ke haiveva. Da lovi ke ala age abo da vai vai dibulae vaeavalu. 2 Da huhuige laea da hauivale ionive, galave evilu DILAVAu au uvu vai damuge da hauve ke ai la dulugeva. 3 DILAVAu memila au koto vole loui mahogovale ke loui da haivulage da ke dibai lalai levaleva ko kisaialu. 4 Lale di levaleva ko dodaveluaga DILAVAu memila KELISOu avale mahogovale kele da luleleale ke dibave. 5 DILAVAu memila aveve ke loui ata haive solilu isito aike au munanau tuvu hanavege kea koto ke loui, au Abositolo tuvute isi au Beloveta tuvute ke haivege ea ke dibalu. 6 Au memila mahogovale koto kela kou IESU KELISO u kotou dua keu Diuia ata oliesoliale keo tige kea ke evisi Diuia ataeali igali toai ata igali olige DILAVAu keneni bahata igalitoai hoeaseavelu. Katealelu Diu ata olie soliale keale Diuiali igali toai IESU KELISOle DILAVAu au atalai louale ke agievei. 7 DILAVAu da letatavai au uvu vai damuge da melove olisi vuvuneve kitae kele kotove loui atave haiveva. 8 Da lovi ke aito huhuige dau DILAVAu ata kea nile da ata kitae olie solilu. Da valaeabele ulu isito DILAVAu da letatavai da hanavage Diuia ata olie soliale keveo tialeu IESU KELISOu abolai vale vile moeaga Otoveale ke lai ba dodavelivelu bele hau isute. 9 DILAVAu olale da ata bahata haivege abo kele luleleage DILAVAu ata bahataele au atate agiva. DILAVA kela vata ai vale vile aito au ata bahata kele au atate agiale ke mahogovai memila ata ke lavige solilu. 10 Isito DILAVAu aike ata bahataele au atate agisi olale kea ekalesia olisege Otogou vuvunetea isi Aneluia ke ivai dibage DILAVA keu kele lulele kitaealu. 11 Memila vau ue solisege DILAVAu vaoe IESU aveve ke huhuai kalevage ulu. Iale vali voleo au louale ke lailoi kosive IESU KELISOu kotove ke vai lelevetilu. 12 Ige lai lailoi uvu vai avoele vaeavale kele kele lailole avoluvita igalitoale kele vabuiava solisi meliai DILAVA laviagei. 13 Katealelu da la lavigei evive labea momai vateu tuvu agiale ke huhuai sekiagelive isito avoele meliageve kosealelu da la dulugealeluga vateu tuvu ko agiva. 14 DILAVAu a uvule IESU aveve huhuale keluga da kome bokoai vata bisi lailoi mama laviava. 15 DILAVA kelega Otogoe uvale isi vatae uvale evievi ata bahata kea ivive valu. 16 Lailoi mama DILAVA keu siauveu kitae keu Otogoe ui hau kenenia kineve kitae. Keluga da ke laviai olavale au munanau tuvu lameale kele vuvune lamei lai uvu vai melitige lale kele meliai uve. 17 Lale lai evievile meliai uge IESU KELISOule lai uvule uitigei da lalai guliguliai olavala volelai olai vole dulugeve ige keu laele kitaeai idiu lavige idumuvea vatau uvue tai lavige idiu meliai lavisi uale kelate lata ave isi meliai lavive lai evievile. 18 Lale katealuaga DILAVAu ata bahata keali IESU KELISOu lalai olai. La dulugeale ke huhuai kele luleleave IESU KELISOu lalai olale keu eseieve olie solilu isito olave keu kitaeai ulu, bosive lai lolai. 19 La ba au lalai olai la dulugeale bahata ke dibalivelu bele keu haovole kitaelau ke lailoi ageto lai ela malomaloai oiva. Katealelu lai ba DILAVAu lai lolai ale ke dodavelivelu bele hau kitae. Katealeluga da vali bahata lalai guliguliai DILAVA laviava. 20 DILAVA keu ata melite, keu siauve keu lailoi uvue ulu ialelu lailole vadeu huhuai laviage keu ba avoele isualivelu bele isito aule lailoi ola ke ivai ke leivia moeaga lailo vavei. 21 DILAVAu IESU KELISO hanavage ekalesia lailoi kuva ale kele lailole vali bahata lvlve letatavai guliguliavai. Hoesea vage ivive vage bahata letatavage keu ui tiva.