Sabta 2

1 Laea memila DILAVAu koto evie solisi aveve toela avale kele laea vovovale ata kelatea. 2 Vali kela laea vatau aveve ke lovai vatau kosive ke olave aeviva. Vatau kosive keu ata olea DILAVAu koto evie solivale ke nimabigeva. 3 Lailo ko nenia memila ui ata keali aveveabe kelate aeviva isi vali kela lailoi vavau ola ke ula aeviva. Isi huhui toela ke ula huhuaeviva. Lai ata kelate ai uvu ola ke avale kele DILAVAu lailota ata ketalai tuvu kitae alu lailo kavelivelu. 4 Isito DILAVA keu aike lailolai uvuai lailolai olai lailo dulugeale keu kitae. 5 Katealelu lai memila aveve toela ai vovosege DILAVAu au voo IESU KELISO hanavage loi lailo dulugege lai kele uveve dua agievelu. DILAVAu lailo bahata huhugeale kelegau lailoi toelale lailo agigelu ige lai evile olievelu. 6 IESU KELISOu lailo dulugeale kelega DILAVAu lailo letatavege lailole IESU KELISO luvita tai Otogoe igali toai uevei sisila nonala keu. 7 DILAVAu lailo huhugei IESU KELISO hanavage lailo dulugeale kele ataea aike uvale isi vaoe uale ata keale bahata huhuige DILAVAu lailolai hau ale kou hau kitaealau lailolai ko alu kelu huhua ai mauli. 8 DILAVAu lailo huhugei lailoi toelale lailo agigeale kele lai huhuige DILAVAu lailolai ola kitae alu. Isito lai loi aveve dualegau lailo agige solilu isito au sisila kitaele gau lailo agigelu kelu lailota avolu sisilai. 9 Lai uveve dogave agiale kele lailomiga letatava, hanivava kalevai kosealelu lai vadeu dua avale kelu DILAVAu uveve dogave ke lailo vave solilu isito au sisilalegau ke lailo vavelu. 10 DILAVA kela IESU KELISO vilele dai lailo agigelu isi uveve dua lailo vavelu au kateai olale lai atave olisi aveve dua ai au memila lailolai haukala louale ke lai ai ata haivei tai. 11 Da koto vole louge evive laea Diuia ata olie savalu iale Diuiale la agigei matitisi lai ivi agisi toelatisi lalai loui koseai loea aveve dua ai loi veuivale vate boilu. Isito loea lo ale kolate a savalu, iale kelu laea DILAVAu ata olie savalu keale lalai kateai loui isito aveveabe keu atau aveve ula ialelu la memila ale ke ula huhuave. 12 Vali kele la KELISO luvita igali olie solilu DILAVAu memila Diuia ata makage ea atave olilu isito la kea ata volea tolove. DILAVAu memila Diu ata lai koto loui vaeavai avoe dale la hoeaseavege lale udua ave. Isito la kelai koto kateale loue solilu kosealelu laea vatau aveve ai. Otogoe tiveve ke huhue savai DILAVAta diba savaevelu. 13 La memila DILAVA vileo oge vole isito IESU KELISOu loi voeleale kele DILAVAu la agige la aike avoluvita igali toai ulu. 14 IESU KELISO vileoga lai bahata voleali igali toai udua ava memila Diu ata isi Diu ata olie soliale keale volelai tuvuai vole aligei abouvu lilikata ui isito IESU KELISOu aike kuva alavage lai ata iga olisi voleali u dua ava. 15 IESU kuva alavale keu kosealu Diuia basu kele Diuia ata isi Diuia ata olie soliale kea voleali ugologoloai uva. Ivaga IESU au voele kel Diuia basu vuvune ke vesuiavage ue solilu keu kateai olale Diu ata isi Diu ata olie soliale kea loi avoluvita igali toai ata igali olisi katealeluga lai voleali u dua ava. 16 Lai memila voleali igalito solisito voleali u toela aeviva. Isito IESU KELISOu idiu dole voeleale kele olale Diu ata isi Diuia ata olie soliale kele lai bahata vava igalile voleali igalitoai DILAVAu ata olisi u dua ai uva. 17 IESU KELISOu dobai loi kotou dua louale kele au olale Diuia ata olie solialea kea DILAVA vilela ogela uvale isi Diuia DILAVAu vavale uvale kea bahata voleali uveve dua ai. 18 Katealelu IESU KELISOu kuva alavage lai bahataele munanau tuvu luvita kuva igalila lai loi mama DILAVA vileo taevei. 19 Katealelu Diuia ata olie soliale la kea oge ata olie soliale la kea oge at olie solilu la memila ata vole olievelu isito DILAVAu aike la agige la ataveali ese igali olilu. 20 Da louale keu kosealu laea DILAVAu oo late, IESU KELISOu hade melite ke late ige Abositolo is beloveta kea hadeu adale idi keu tatale o koui letatavale kelate. 21 IESU KELISO kela oo ke bahata hade bige keu meliai lavisi kitaeai o tuvute olige DILAVAu avoele ulu. 22 Iale laea DILAVAu oo tuvute kelate IESU KELISOu la agigei la melitievege la voleali igalitoage mama DILAVAu munanau tuvu laili ulu.