Sabta 1

1 Dau di vila Bolo, DILAVAu olale dau IESU KELISOu abositolo olisi hauvele hauiva. DILAVAu ataea Ebesesi vatae uale la kelaiga da levaleva ko kisaiai hanavalu da dibage la kea lai evievile meliai IESU KELISO luvita ueviva. 2 Iale da olale lailoi mama DILAVA isi lailoi kosive IESU KELISO kea la huhugei la hoeaseavege la u dua ava. 3 Daa olalela lai lailoi kosive IESU KELISOu mama DILAVA ke hoeaseavai. Kosealelu kela IESU KELISO hanavage loi lailo hoeasavei Otogou vuvunete ke bahata lailoamege keu lailoi uvu vai melitisi vai luleletilu. 4 DILAVAu vata avale kelegau memila lailo huhugei olavale IESU KELISOu lailo agige lai atave olisi. Lalokauvele ata tuvute olievei nivele ata vaite olisi uevei. 5 DILAVAu lailolai ola kitae ale kelegau lailo huhugei olale IESU KELISOu lailo agige lai atave olilu DILAVA au ola ulalegau kateale alu. 6 Iale lai ke hoeaseava dua ai kosealelu keu au uvu bahata vai lailo vavege lai kele atave olilu isi au huhuivale vo igali vai lailo vavege lai kele atave olilu. 7 IESU au taola lailoi toela ibila age DILAVAu lailoi toela bahata totoalu DILAVAu au uvu vai lailo vaveale keu hau vole kitae kelegau lailoi toela totoalu. 8 Au au uvu bahata vai lailo vaveale kelega lai aveveve dibai kele luleleaevelu. 9 Lai memila aveveve kele lulele solilu isito aike au olale lailo haivege vaoe vadeu IESU vilele loiveve ke lai dibalu. 10 Lai luleleige DILAVAu louale vali keule loige otogoe uvale isi vatale uvale keale bahata IESU KELISO keu adau valale bahata igali toai ui. Ige aule kenenia kosi kitae olisi. 11 IESU KELISO kelega DILAVAu lailolai hau moeaga moeaga otoveale ke lailole agisi. Kosealelu DILAVAu memila lailo huhugei lailo makaevege lai aike atave olievelu. Keu memila au olale hau ko neni otovei loui avoe koeale tiveve koseale aevei. 12 Keu kateai lailo makageale kele lo volea memila IESU KELISO huhuai lovai tivale keale DILAVA hoeaseavai ivie letatavagei. 13 Ige lata kelate ave kosealelu lo memila kotou dua loui la haivege la eviale kele lale ukolikoli agive. Ige DILAVAu memila au louale munanau tuvu lamege la kele luleleige laea atave lala kea. 14 DILAVAu au munanau tuvu lailoameale kele lai dibage lailole vaoe DILAVAu vale vile lailolai otoveale ke agievei. Isi kele lai dibage DILAVAu lailoi toelau ibila ale kele aule loluaga lai lo agigei tai. Katealelu lailole DILAVA hoeaseava ivive letatavai guliguliavagei. 15 Da evige la koto leleve ke evisi lailoi kosive IESU KELISO lovaevei DILAVAu ata bahata lai olale ke dulugeva. 16 Da lai koto ke evisi sisilai vali bahata lalai DILAVA laviai guliguliava. 17 Da lalai guliguliai lailoi kosive IESU KELISOu mama laviava DILAVA keu atagau mama iale ke da laviai olavale keu au avale ke la haivei la melitievege lale kele lulele ai au avale ke dibave. 18 Da laviai olavale eu lai uvu alavai lulele lamege lale kele au la toiavei lalai valevile otoveale ke dibai huhugei uve. DILAVAu otoveale keu hau kitae. 19 Da guliguliai olavale laea luleleige DILAVAu vuvune kitae vai evievi ata lailo vavelu. IESU KELISOu vuvune kitae kele. 20 IESU KELISOu voeleige DILAVAu au vuvune kitae kele IESU KELISO isage abatale kobelage vai au ada vaiteo vaeavalu. 21 Ige keu keveo ui Otogota vata kota ata kea kitaeabe olisi ulu. Iale olea vatau vuvune agisi Otogou vuvune agiale kea ba IESU KELISO leivialivelu bele eu vuvune kitaele uge. 22 DILAVAu vale vile ko neni agisi genave valale otovei letatavage eu valevile ko nenita Ekalesia ko neni bahata kineabe olilu. 23 Ige Ekalesia kea IESU vava late ige IESU Ekalesia bahata kea kine kitae olilu. Iale keule ekalesia bahata ke au vuvune vavege abole avo late olisi uevei.