Sabta 6

1 Eseu eseavea DILAVAu olale lai mamata lai aiata koto evige keu duave DILAVAu nile. 2 Lai mamuvu vabuiave isi kotoeabe evi keu basu luta ale kela keu bolomesiale. 3 Ige keu alu duage ai maulile ui egeai vata kole basuale keu nonau kateai loulu. 4 Ige mama aia momai lai ese agisi tuvutigelive isito agigei loi haivege sisiba nona louive isi abo kuva hosidige haiveve isi lulele nona loui haivege abo lulelele tai. 5 Isi laea davana agie solisi hau kavavale ataea, a kosi volele haualuaga kotove evisi neniai avolu hau dua aso. Vabuiavei kotoeabe evive la IESU KELISOu koto evisi hoeaseavale kelate abolai aevigeve vali bahata. 6 Labea momai huhuai kosealive lo kea nile hau dua age abo lo ivei lo letatavagei momai huhui kateale aevivale isito la IESU KELISOu ata avalelu lai uvu bahata vai DILAVA vavui olave ai vatau kosi kitae kea hauiabe keta au dua ageve. 7 Kosealelu laea vatau kosive kea hauiabe ula a soliva isito la IESU KELISOu lovi avale kelate sisila ulale kosive kea hau aevigeve. 8 La huhuige ata olea aveve dua avale keale kosiveu ibilaeabe vavei kalege hau kavavale, au au ibilalu hauivale kea bahata DILAVAu nile vole late. Kosiveule ke toiavei ibilaeabe vavei. 9 Ige ata naligevale kosivea labea momai lai hau avale ese kelai vabuu nona late louevegelive isito abo la hoeaseavale kelate lata ke hoeaseavegeve la luleleige laele hau kavavale ata keali eue kosive ke nile vole late. Kosive keule bahata la avale ke kaoai lalai loui. 10 Iale di kakoluvuia da kotou vaove louge evive kosive kele meliai vuvuneve kele doadoai uve. 11 La dibage ataeale vole kavelivelu tiluaga vole kaveveve hau keta agisi tai kelate DILAVAu seteneu sele bavuveve valevile ke lamelu ialelu kobekavai au lameale kele melitavai seteneu sele aveve ke bavui uve. 12 Da louale keu kosealu lailoea ata kaveveve ata oliesolilu, isito lailoea setene luvita vole kavei ataveali vole kavevale ataea. Seteneu munana toela kea moea voleale vatale vuvune kitae agisi vaviu aveve ke aevigei isege voleale Otogole aveve toela aevigei. 13 Katealelu kobekavai DILAVAu vale vile lameale ke bahata agive lale katealuaga valiu toelau lalai loige lale kele govadai setene aveve ke aegevealelu lale laviu dua ave. 14 Ialelu kobekavai DILAVAu lameale ke agisi lamigale katuve koto leleve keu beleti late iale beleti ke vai lai gogo umuva. DILAVAu aveve keu duave ula keu lailoi kovu, kemena bavuale kelate iale ke vai katuge ai kovu bavu seteneu ele bige nibedage olea valila a kakovagei. 15 DILAVAu uveve dua koto vai tai ata haivevale keu genau vate, samaka late iale ke agisi lai genale katuve. 16 Lai evievi keu migigi late iale kevai amiga bavuge seteneu bii vuvunete keu ba aele dalivelu bele. 17 Ige DILAVAu voelele lailo agigeale keu tuvaliu saneka late. Iale saneka ke vai ai kine bavu ige DILAVAu nona keu benesi late iale DILAVAu munana tuvu koto kevai lameale ke vatala dua ave. Aveve keneni bahata ai vali bahata guliguli ai DILAVA daluiavageve labea momai guliguli ke homasiavalive. Isito DILAVAu munana tuvu vuvunele, siauvele meliai DILAVAu ata bahatalai DILAVA laviage au ata ke dulugei. 19 Isi Bolou loui avoe, datalu guliguliageve ige DILAVAu dalu kuva alavage da vabu kaleito meliai koto louive koveo ata ko haivege abo evisi luleleai. 20 Da memila koto ke loui ata haivevaga abo davai dibulage da aike dibulae uva. Isito melitavai dalu guliguliave ige da vabu solisito melitavai koto ko loui ata haivei. 21 Di kotou kele katealu isito da koto voleave louge evive lailoi huhuivale kakolo keule ba daa avale keneni loui la haivei keu kosiveu haule meliavale ata. 22 Katealelu dale hanavage laeao tai da avale keneni la haivei lai uvu vai melitigei. 23 Di kotou vesulu isito da olale lailoi mama DILAVA isi lailoi kosive IESU KELISO keu uveve dua vai lamege lale lai evievile meliai vole lai olai vole dulugeve. 24 Ata olea abo uvu vai lailoi kosive IESU KELISO vileo vaeavage da olale DILAVAu ke huhugei ke hoeasevei vali bahata.