1 Loi kakoluvuia lo IESU ivile la lavigevege koto ko evive. Lo loevealea la oleve kateai DILAVA hoeaseavale kuvave la haivelu ige la loi koto ke evisi nenive ava katealelu lo olale lai aveve dua keu vali bahata ui tigei. 2 Lo IESU vuvunele la haivege la ke age nenive. 3 Iale DILAVAu olae soliale la volea keateali tebaevelivelu isito laea ke leiviai ata tuvute olisi uve. 4 Isi olale la bahata lai keateali vole hoeaseaveve ke dibave. Iale aveve dua ai lai keate hoeaseaveve. 5 Labea momai DILAVAu koto evie solivale ata kelate ai lai vavau isivi lai keatele aevegelive. 6 Aveve kateale a kalevave labea momai lai kakoluvuia ivuvuiali teibai okalevave. Kuva kateale lo memila la haivelu la aveve kateale age DILAVAule la banisiavei. 7 DILAVAu lailo toiavei olae soliale lai aveve toela kele ulivelu isito olaveu lai lailoi vava ko ivai hoeaseava dua ai ugei. 8 La oleu koto ke homasiavale keu atau basuale ke ula homasiava solilu isito DILAVAu au munana tuvu lameale ketagau au ke homasiavalu. 9 Loi kakoluvuia laea volelai olavale isi vole hoeaseavale aveve ke la bahata dibalu DILAVAu la haivege la biagea aveve ke dibalu ialelu loui lo ba ke kisaiai la haivelivelu bele. 10 Isi la aveve kateale ale keu lai ata volea Magidonia vatale uvale ke hoeaseavelu ialelu loi kakoluvuia lo la laviage ke evive aveve dua kateale ai avoele melitavai tigeve. 11 Lo memila la haiveale kelate lai kakoluvuia aveve ivai avoele koto lougelive isito lai avevete ke ula ai avoele meliageve. 12 La meliai haualuaga la ba ata imiliavelivelu bele. Katealele ekalesia soliale keale lai aveve ke ivai loui koseai leleve ula ata kea evievi ata leleveala kea. 13 Loi kakoluvuia lo olavale vovivale kele nona leleve loui la lavigei labea momai ata volea IESU loiveve ke huhue soliale ata kelate aevivale isi vovoale kelai uvu moeaga kalevave. 14 Kosealelu lo dibage IESU keu voleai tota kobelalu iale ata olea abo uvu vai IESU vavuito voelale keale kobekavage DILAVAule agigei IESU luvita Otogoe tai. 15 Kosiveu lo haivealela lo loui la lavigeva kosiveu loivale vali ke niu loige vovoale keale luta kobekavai. Igeto ba lai nita uvale keale ba vole bevuai IESU luvita tai. 16 Vali kela kosiveule Otogole dobai loige DILAVAule louge Anelu ivi kitaete keule toiage DILAVAu kibi kotoige olea abo uvu vai IESU vavuito vovoale keale bahata abatale luta kobekavai. 17 Ige vali kela lai nita uvale ke DILAVAule agige lailole bahata Otogole vole bevuiai kosive luvita belelevai vole ivei vali bahata DILAVA luvita ui tigei. 18 Katealelu koto ko loui vole melitigei meliai uve IESU inohole.