1 Loi kakoluvuia lo vadeulu ba olovoleu velevai loiveve loui la haivei. 2 La biagea huhuige kosiveu loiveve vali keu vavolou atau vavile loale kelate ialelu lo ba tota kisaiai la haivelivelu bele. 3 Vali kela ataeale huhuai koseai lo u duala ko ava toela beu ba lolao lolivelu bele kateai lousege aveve toelau keate voleu au ese vaeavalibelu age vateveu tuvu kavale kelate abolai loige abole toela kitaele tai ige abo ba kele iluvilivelu bele. 4 Kelu laea vaviu ata olie solilu isito laea valiu ataea iale IESU loiveve keu vavolo atau loale kelate lale ivai tetehamave, kelu la niai ualelu la ba tetehamalivelu bele. 5 La kea bahata DILAVAu atagale ui valiu ataga olievelu lailoea vaviu ata olie savalu. 6 Ialelu labea momai vaviu ataea navivale kelate a kalevave isito kobekavai malomalo kalevai niai uve. 7 Ataeale vavile navagei isi vavile eu toela ke isi malomaloa au oo kaoai oigei. 8 Isito lai loea atagau ataea ialelu lai malomalo kalevaito niai ui. Katealele lailoi evievile meliai. Vole hoeaseavege seteneu aveve toelau ba lailo agigelivelu bele isi lai volea sisila ai vole hoeaseavei. Eue tiveve ke huhuivale keu saneka vai kine bavuale kelate avevebe toelau ba loi lai loi huhui ke vai toelatilivelu bele. 9 DILAVAu lailo makagei agisi au tuvule otove solilu isito lailo agigei olale lai IESU voeleale kele lai ukolikoli agisi. 10 IESU lailolai voeleai olale lai nita uale isi vovoale kea bahata igalitoai IESU luvita uevei. 11 Katealelu la aike avale kelate ai vole hoeaseavei vole melitigei ui tigeve. 12 Loi kakoluvuia lo la lavigei lo olavale lai minale DILAVAu hau avale ke hoeaseavei kotoeabe evive. DILAVAla ke makagelu iale abo badeu louge evisi ave. 13 Kea hau ke avalelu loui abolai olai hoeaseaveve voleali ugologolo kalevaito voleali u dua ave. 14 Loi kakoluvuia lo koto vole ko louge evive ata olea lovialivelu homasiavale ke haiveve. Isi ata olea vabuivale keta haivege bavu kalevai isi olea abo evievi kalevivale ke malihe dua ave. Solekata atalai loui tuvu kalevaito ke neni hoeaseavegeve. 15 Lamiga neniaveve ata voleu laele aveve vole toela age ibilave akalevave isito aveve dua ula volelai aevigeve isi aveve dua ata bahatalai ave. 16 Vali bahata sisilagege. 17 Vali bahata DILAVA imiliavageve. 18 Laea IESU KELISOu ata lalaea ialelu aveve vadeu laele loige viko kalevaito DILAVAlu sisilave, keu DILAVAu olala keu. 19 Labea momai munana tuvu kelu homasialive. 20 Olea DILAVAu koto louge momai kotoeabe kavalive. 21 Isito koto ke bahata sesiai ivage oleve keu leleve olige ke evive. 22 Aveve toela ke bahata gogoniave. 23 DILAVAu uveve dua lai lo vaveale kele lo olale au lai aveve bahata hoeaseavai lai munana lai uvu lai vava ke bahataele aveve toela uliage lailoi kosive IESU kuialai loivalela lale nivele lilikata leleive. 24 DILAVAu la toiaveale keu sele ata olie solilu au vadeu louale ke aule ai iale aule lai aveve bahata ke hoeaseavai. 25 Loi kakoluvuia lolai DILAVA laviageve. 26 Ekalesia la bahata nohovu. Lo olale volelai olai vole hoeaseavegeve. 27 Bolo dau Kosive ivile la lavigei olale kisai ko vai Ekalesia bahata usege uvuiabele dodavege abo evisi. 28 Da olale lailoi kosive IESU KELISO keu vali bahata la huhugei laa hoeasavegei di kotou kele kateai ulu. Laa nohovu.