1 Lo la kalevei loalea Atenisi vatae ui tota lai nonabe evie solila ai tota Timoti hanavage la ivelivelu tilu. 2 Timoti keu loi kakolo lo aboili DILAVAu hau aive IESU nona loui ata haiveva lo ke hanavai olale eu loi laili ui lai evievi vai melitige meliai uve. 3 Katealelu lo olale vateu tuvu laele loige lai evievi kele kuiakava kalevaito ele meliave. La ivage vateu tuvu katealeu lai loele loige keu DILAVAu olala keu. 4 Lo memila laili ui la haivei koseiva vateu tuvule ba lailoele loi ialela keu loivai. 5 Di uvu laele uale kelega da Timoti hanavage lae tilu. Lai uvu vai melitilivelu da loui kosealu oloivaga seteneu seleavege toelale tige loi hau avale keu baiveu ue soliva. 6 Isito Timotiu ave kuialai loaleu lai aveve dua loui lo haivei loui avoe evieviabeu melialu ige abo vole hoeaseaveva. Tesolonia ata kea vali bahata la huhugei olavale la ivei Timotiu koto kateale louge lota olai la ivegei. 7 Loi kakoluvuia lo koveo uale vateutuvu moeaga agieveva isege lai koto keu loige lo ke evisi lota melitavai lalai sisila kitae aevelu. 8 Katealelu vateu tuvu lo agigege lo ba ke huhualivelu bele lo ivage laea lai evievile meliai ulu. 9 Lo lai evievi koto evige loi kotou vesulu isi aike lalai DILAVA laviava. Lo sisila kitae lali ai olale lole oleveo kateai loi sisila nona ke loui DILAVA daluiavai. 10 Katealelu lo loi uvu vai DILAVA vavui valile isi vavile lalai guliguliai olavale DILAVAu kuva alavage lo lolivelu la lai evievile meliavale kele la dulugei. 11 Lo olavale lai loi mama DILAVA isi lailoi kaka kitae IESU KELISO keale ba kuva vole age lo loi la ivegei. 12 Lo olavale kosiveu la melitievege lo lalai olavale kelate lata volelai olai vole duluge dua aevigeve isi ata bahata dulugeveve. 13 Lale aveve kateale asege DILAVAule lai uvuvai melitige IESU loivale vali kele IESU ataeale avoluvita loige lai lole aboili eue tai lai loi mama DILAVAu nivele leleige aule lailo ivege lai nivele atau dua olisi ui.