Sabta 4

1 IESU keu vatae loale vateu tuvu kitae agilu iale lailota au huhuale kelate huhuai avoele meliai ui. Da louale keu kosealu, olea abo evievile vateu tuvu agiale ata kele aveve toelau ba melialivelu bele. 2 Katealelu laea vateu tuvu agiale la kea momai vatau aveve ke huhu kalevave isi vavau isivi malaha keate vavolo huhui ke kalevave isi kobekavai DILAVAu olate ke ave. 3 Atau toela keale abo olateave ai aveve toela keta agei iale memila huhui toela huhuai keate huhuai eu toela isi tebai lovi kitae ai kele eu toela isi kaivakuku hoeaseavaeviva. 4 La memila katealu isito la aike atau toela oliale ke kalevai atau dua olisi uge ata kea la ivei teteu toela alu la iveive isi lalai kotou toela loui la agige toela tigelu. 5 Isito momai ke huhuavevale. Kosealelu DILAVAu nita uvale isi vovoale kea aveve kaoaveve valiu vuguvugualu, iale vali kele ata keale oleve kateai abo avale ke baive loui DILAVA laviai. 6 DILAVAule ba vali vaola vovoale isi nita uale kea aveveabe kaoai katealelugau au kotou dua ke ata bahata haivei olale kotove kele vovoale isi niai uale lailo ko nenia DILAVAu uvale ke late aevei. 7 Vata kou vesuveveu vuguvugualu, ialelu lamiga kalikaliai guliguliai uve. 8 Di ola kitaela la ko nenia bahata volelai olai vole dulugei dua ai, kosealelu la volelai olale kele la bae aveve toela volelei alivelubele. 9 Isi da olalela ata volea deiae laeo loige kele nona loui tuvualive, isito ke agisi lai oe otove. 10 Kosealelu DILAVAu ata hoeaseave siau igalgaliai lamelu, kelu ata bahata ke hoeasevei duluge dua ageve. 11 Da olale ata haiveve ke DILAVAu makagelu iale ata kea DILAVAu vuvune vaveale kele koto ke loui ata haivei isi DILAVAu olea ata dulugevale ke au siau vavuale kelu aule ata dulugei vali bahata keu vuvuneu avoele uale keule ke agei. Aveve dua kateale ale keule IESU KELISO ivile DILAVAu ivi vai letatavai hoeaseavai avoelega ataga isi vuvuneu ui tiva koto keu leleve ula. 12 Di huhui kakoluvuia da koto vole louge evive la aike vateutuvu agivale kele tetehamai loui koseai vadeuluga lo vateu tuvu ko agiva kele malomaloalive. 13 Isito kele sisilave kosealelu IESU KELISOu vateu tuvu agiale ke latela la agilu ialelu IESU au ataga kitaeta dobai loige lale sisila kitae ave. 14 La IESU KELISO lovai tiale kele ataea lalai kotou toela louale kele sisilave, abo kateige la luleleige DILAVAu munana tuvu atagaveu laele ulu. 15 Da ola soliale laea ata haivei vavoloai volea avevele koto loui aveve toela kateale alivelu la kateale ai kele vateutuvu agige keu evievi ata olie solilu. 16 Isito la evievi ata oliale kele vateu tuvu agige keu duave, momai vabualive vateu tuvu agilivelu isito la KELISO ivi vale kelu sisilave isi DILAVA hoeaseavave. 17 DILAVAu ataea aveve kaoaveve valiu vuguvugualu aule luta lai loele sitatisi kaoai tai, isito ke iae kotove dua evie solivale keale vadeu ai. Keale davanau toela kitaeale ke agisi eseve valivelu bele, kitae aule vai. 18 Koto kele bukau kotou loui avoe DILAVAu ata melite agiveve keu aukalu iale aule oleve kateai kalau toela ai oivale ke agigei. 19 Bukau tuvu koto kateale loulu iale la olea DILAVAu olale vateu tuvu agiale lale lai aveve duale melitavai valevile ale kosive DILAVA ke igali huhuai uve. Lale kateigaule au loivale kele aule ba la kalevalivelu bele, isito aule la agigei tai.