Sabta 5

1 Dubu elodaea da lalai koto vole louge evive dau data dubu eloda dalau, IESU KELISOu idiu dole vateu tuvu agiale ke da ivalu. Iale aule au atagale loige dale avoti tai igali toai ui. 2 Laea DILAVAu ata naliavale ataea DILAVAu la otoveale lale e kalesiave keneni, nimabigeve dua ave. DILAVAu olale la lai uvuvai hauve kele vaeavai neniai ke ave momai moni agiveve ke ula huhuai hauve ke alive. Isito lai uvu bahata vai haukalave kele vaeavai hauave. 3 DILAVAu la otovege la atake nalievevalelu, loui lamiga letatavagelive, isi loui koseai koea kitae isito kea nile neniai hauige abo lai aveve ke ivai abota la ale kelate ai. 4 Lale kateivaga ekalesia naliavale kosive kitae IESU KELISO keu loivalela aule ukolikoli mauli saneka lamei. 5 Malaha dogavea da lalai kotovole louge evive lata evievi kosivea koto louge evive isi abo vadeu louale ke evisi ave labeu amiga letatavagelive isito volea koto evisi vole hoeaseava. Kosealelu bukau tuvu loui avoe ata vadeuia abobiga letatava soliale keale DILAVAule au uvu vavei ke siauiavelive bele. 6 Ialelu loui labeu eula hanivavai amiga letatavai oagelive, isito DILAVAu adau valale sekiai uve aulela letatavagei keu valite niu loige. 7 A vadeu huhuai avale ke loui IESU laviai vai vavu, ige IESUle alu naliai abiageu naliai vai lehosiviva. 8 Lamiga naligei neniai ui guliguliave seteneu ovo laioni kelate ata kaogei oiva, kavelivelu. 9 Ige seteneu lae loige momai kotove evivale isito lai evievi ke ulale meliai uve, kosealelu, la dibage vata bahata kou uvue la vateu tuvu agiale kelate abota agiva. 10 La vateu tuvu agiale keu ba vaoe ui egealivelu bele, isito ke iae DILAVAule la bahata agigei hoeaseavei. DILAVAu lalai uvuai la toiavei olale la talivelu otogoe atagavele, IESU luvita igalile uevei. Iale vateu tuvu ke iae DILAVAule la agigei melitievege lale u dua ave. 11 DILAVAu vuvune keule vali bahata laili ui tigei, koto lelevela keu. 12 Da koto ko bahata lousege evievi ata vole ke kisaiava ata keu evievi ata, da koto ko loui lalai hanaveva, lo olale la tieliai o goadai uve. DILAVAu ata hoeaseavale koto leleve kela da loui la haiveva, iale da koto louale ko evievi lai evievi kele goadave. 13 Babuloni ekalesia lalai abo sisila nona loui avoe 'lale duave'. DILAVAu lata ata keta letatavage, laea evievi ata olilu, ige di vo vole maka keta au sisila nona lalai hanavalu. 14 Iale da olale laea volea sisila ai vole hoeaseaveve la IESU KELISOu ata oliale kelu da olale aveve dua ula ai uve vali bahata di kotou kele kateai vesulu.