1 Da koto vole louge evive keatea lai velavuia koto evisi lovave, isoho lavolea lai velavuia DILAVAu nona evie solivale kelai koto isute abolai lou kaleva. 2. Isito kotoeabe evisi dua ke ivai kele abota DILAVAu koto evisi lovai tai. 3 Keatea momai huhuai kosealive loeale loi vavau dua kole loi velavu hoeaseavei lole kine bisi hau dua loi vavale otovei ogona dua katui kele loi velavu hoeaseavei momai kateale aevevale. 4 Kateale akalevaito lai uvu dua avale kele lai velavu hoeaseavegeve abolai tuvu kalevaito sekiai aboili uve. Kosealelu vavau ivi ivi keu keu ba tai egealavelu bele, isito uva aveve keule vali baita ui tigei ige DILAVAule lai aveve ke ivai loui koseai aveve koseale keu duave baua. 5 Memila keate kea aveve toela asolivale kea abo uvu agisi DILAVA vavuale kele abo velavuia koto evisi lovei tiva. 6 Memila keate vole SELA keu katealu. Keu au vela EIBOLAHAMU kelu loui koseigei 'Di Kosive', lale kelate ai lai velavu ke hoeasevege lai avale keule SELAu avale ke late olige laba vole vabuiavalivelu bele. 7 Ige malahaea lata lai keate ke hoeaseavegeve aboili udua ageve la kea ata melitea isege lai keate kea melie solilu, ialelu lai keate hoeaseavei aboili udua ageve kosealelu DILAVAu ukolikoli louale ke abota agisi. Isito lale kate solige voleali ugologoloige DILAVAu ba lai imili ke evilivelu bele. 8 Koto ke vaoveda louge lake nenia evive uvu igalile voleali igali toai ugeve, laea bahata evievi ataeala ialelu volelai uvuai vole dulugei ugeve isi lamiga letolevai vole hoeaseavei ugeve. 9 Ataea laele aveve toela age momai keu ibilave aboele alive isi isoho abo lalai kotou toela louge keu ibilavelu kotou toela loulive isito kotou dua loui hoeaseaveve kosealelu DILAVAu lailo toiavei, isiviale lai aveve dua kateale alivelu keu ibilavelu DILAVAu lailo hoeaseavei. 10 Bukau kotou kele loui avoe ata olea olai udua aluaga kotou toela lolive ata seleave kalevai. 11 Abo avale toelake kalevai aveve dua ai isi uveve dua kaoai kele meliai ui. 12 Kosealelu kosive keu vali bahata evievi ata ke nimbigei imiliabe ke aule evisi vavei olaeabe ke. Isito nive keule tuvu niai ui aveve toela avale kelai isi au ba imiliabe ke evilivelu bele isi vadeu abo louale ke vavelivelu bele. 13 Bukau koto keu koseai loulu, oleu olai aveve dua kele meliai uge oleule ba loi lehosivai. 14 Isito la oleu aveve duale ataea vateu tuvu lamege keta duave. Abo kateige kelu sisilave momai ke bavuiavalive. Lale hau moeagale uve, DILAVAu oula keu alu loiva vabualive. 15 Isito lailoi kaka kitae IESU KELISO, ke igali vabuiavai hoeaseavave ige vali volele ataea la belagege, la lai uvu vai IESU vileo vaeavale ke loui lavigei hoeasei haive dua ave ige abota IESU hoeaseavai. 16 Momai koto isuta loui lavigelive isito saiale IESU nona loui haivei aveve dua abolai ave ige abole lalai louale ke huhuai matiavei. 17 Lai DILAVAu ola ai kele vateu tuvu vale keu duave isito lai aveve toelale vateu tuvu vale keu toelalu. 18 IESU KELISOu ata bahata kea toelaluga loi tava igalile voelealu keu lilikata uale ata isege lailoea toelavale ataea iale keu au voele kele lailo kokeni agisi au mama DILAVA vileo tilu ige mamaveu lailo koneni amigalu agilu ataea IESU KELISO kavage voelealu isitota kobelai au munana valu. 19 IESU vatae loiesolisege munanaveu loi NOA uvule dobage au au kotove loui ataea aveve toelau agigei dibulale late ale ke haivelu. 20 Noau bouti kitae kousege DILAVAu ata kea inohole ui huhuai avoe atabeale ba koto evisi avoe loi. Ivaga ata homasiage DILAVAu e kitae hanavage davalau vuloai loi kavesege ata eiti '8' ulaea vovo solilu. 21 Aveve katealelu lai huhuige lai babatisoale keu kelate lai eu uvue tiale keu voeleale kelate isi ele kobekavale keu IESU voeleai kobelale kelatela keu. Lai eu uvue tiale keu laloivava ula totoa solilu isito lai lole huhui dua ai loui koseai DILAVAule loi toela uliai totoai. Lailole huhui kateale huhuai emoige DILAVAule lailoi toela totoai amigalu lailo agigei. 22 IESU keu otogoe tialeu au mama DILAVAu ada vaiteveo ugulumalu. Keu keve aike ugulumai anelu bahata nalievei otogoe uvale kosive bahata ke naligelu.