Sabta 9

1 Laa huhuige dale di kakoluvu agigei toelatigei. Be DILAVAu au Abositolo lovi damuge da lailoi Kosive IESU ke ivalu da kosiveu lovi avale kele laea evievi ata olilu. 2 Ata volea huhuige dau Abositolo ata olie solilu isito laea huhuige dau kosiveu Aboisitolo leleve olilu. 3 Isito da Abositolo olisi kosiveu hau asege ata volea loui avoe dau Abositolo leleve olie solilu keu seleai ataea lovi isi ataea moni agiva, kateige dale koto koseale loui kotoeabe kavai. 4 daa kosiveu lovile hauasege abo lovi damuale keu duave. 5 Ige Abositolo volea IESU kovuvuiali isi Bita abo ivuvuiali oai tai ata haivevale kelate data ata haiveale keu duave. 6 Abositolo volea la ouai lovi vaveva isito la huhuige daule Banabasiti loi adatela loi lovite ai isi. 7 Tuvaliavale ataeale gamani lovi o hauve age gamaniule ibilaeabe ai mon vavegei ige ata voleu au lovi avale keule au vule lovi ke igei ige bolomakau naliavale keule bolomakau amu, e ke agisi lovilu igei kelate lo kosiveu koto loui ata haivesege abo lovi ouai loamege keu duave. 8 Da louale keu ataea aveve ula loue solilu isito DILAVAu basuale keta ke loulu. 9 Lai Mouseseu basute ke dodavage loui avoe bolomakau vule loviasege momai aive bavui umuvalive keu vuu kele loviai lovi ige keu duave la huhuige DILAVAu bolomakau avalelau ke loulu. 10 Be keu lailolai gau ke loulu la luleleige vata kavale isi lovi lovovale kea olale abo lovi kai abo vute kele lovi isi hauagei iale loea Banaasiti ata kelate. 11 Loea lae tialea DILAVAu kotou dua loui la haivelu la huhuige lo la haivesege la ouai lovi loamege keu duave. 12 Abositolo volea memila la haivesege la lovi vaveale kelate la huhuige loea la haivesege la lovi loamege keu duave da huhuige keu duave isito loea lovilu la imiliave o lavige solilu isito loea loi ada tetaga lo loviai lovi iva. Kosealelu lo olae savalu la huhuai koseai loui kea IESU KELISOu koto loui lo haivevale ibilaveluga abo lovilu lo imiliavelu. 13 La huhuige ata olea Diuia Dubu kitae kele hauivale keale dubu lovi ke igei ataeale lovi agisi loi DILAVA hoeaseavaito lovi ke vaki vole agisi igei. 14 Kelate kosiveu olale olea kotove dua loui ata haivevale keale ata kele aboli lovi iveve ke agigei. 15 Isito da katealelu olasolilu da laele hau agilivelu koto ko kisaiava solilu da DILAVAu koto ko loui ata haiveloho vagalau voeleale keta duave isito da ke ibilavelu laele hau agilivelu bele dale laele hau agige di koto koule dobai. 16 Da DILAVAu koto louvale kole ba hanivavalivelu bele. Kosealelu kosivela da hanavage da kotove ke louve da DILAVAu nona ko loui ata haive solige da nohoma voele ata dalau niai oiva. 17 Dale di olale IESU hau ke aluaga dale loui koseai dale ko ibila dua vai isito DILAVAu au loviu hau damuale kele dale olave ai hau ulai ibilave valivelu bele. 18 Katealelu dale ibilavelu vadeu vai da kotou dua loui ata haivesege ea evivale keu di ibilala keu da ola solilu ata haivevale ke ibilavelu hau agilivelu. 19 Da ataele di ibilalu hau ke asoliva dau ata voleu hau ata olie solilu isito da ata bahata kea hau ai kele kosivelu ata moeaga agigei loiva. 20 Dale Diuia oe tiluaga Diuia aveveabe late ai katealivelu kosivelu ata vole agigei dau Mousese basuale nona ke lova soliva isito dale oleve keve o tiluaga isoho Diuia ata haiveluga ea avale kelate ai kele ata agigei. 21 Dale Diuia ata olie soliale kea oe tiluaga abo vadeu ale kelate ai abo late olisi ata kea Mouseseu basuale koto ke loui lovai tiesoliva ige data basu ke lova solisi Diuia aveveabe keta asoliva kele ata kea aveveabe ke ai valivelu ata ke agigei da aveve kele DILAVAu basuale ke homasiava solilu isito da IESU KELISOu basuale ke valale ui ke lovai tiva. 22 Dale evievile melie soliale keu oe tiluaga da ba koto isute loui haivelivelu bele isito dale damiga letolevai. Katealele dale ata bahataea aveve late ai kele ata moeaga vole agigei ukolikoli kuvale otovei. 23 Da aveve kateale avale keu kosealu dale kotou dua loui ata haivevale kele DILAVAule ata ke hoeaseavei data hoeaseavai. 24 La ivage ata moeagaea gilu vole kitaele giluhamai viliviliai tivaga igaliu tai velevai ibilave valu. Kelate lai ave DILAVAu koto kole melihamai tivagato ivivela aule ukolikoli lai loamei kelu amiga sesia. 25 Giluivale ata keale giluhamale ke evetevete ai giluivaga keule kinea bele ui ige abole giluai oleale ke ibila vai isito ibila vale keu ba ui egealivelu bele isito lai DILAVAu haule meliai uale keule ibilave vale keu ba toelalivelu bele, ukolikoliai ui. 26 Katealelu da DILAVAu kuvala viliviliai lilikata tiva abo vole baisialivelu eveteveteai meliavale kelate ai. Sele solisito DILAVAu haule meliai hauiva. 27 Dale di aveve ke eveteveteava solisi di aveve keneniava solisi DILAVAu hau kele melitava solige DILAVAule di lovolu ata vole vage aule kotove loui ata haivei.