Sabta 6

1 Laa voleu evievi ata voleti tuvuai kotou toela volelai louluaga koto kevai evievi site mulimulia nita ke loulive isito laa ulaea ugulelemai koto ke loui vai hoeaseavage vesui. 2 Lale huhue solilu vaoe DILAVAu ataeale vatau atate vai kotale vaeavai kotove lale ba vatau atate ke aveve kaoai ba kotave katealelu ave vali kole volea aveve eseieve kelu kaoai louge ue solisi. 3 Lale huhue solilu vaoe lailole Aneluia aveve kaoai agisi kotole otovei katealelu lai ave vali kou uvevetele volea toeala kaoai hoeaseavage sisilai ui. 4 La Ekalesisolivale kea nile kotai koto louge keu toelalu. 5 Laa matiage keu duave. Kosealelu au laele lulelete atabeu eu solilu lulelete atau uge lougau lai toela volele louvale ke kaoai louge vesui. 6 Isito la kate solisi volele koto loui kotaeviva la kateisege evievi solivale ataea lai aveve kaoai kele koto louva. 7 Laa volele koto loui kotavale kele da dibage laea lai evievile melie solilu ataea laele aveve toela age momai ke ibila alive. Ataeau la vavoloeavege keta duave momai tuvuai agigei kotalive. 8 Isito da evige evievi ata laea volele aveve toela ai vole vavoloeavei vole agigei kotava. 9 La dibage aveve toela kateivale avale kea Otogoe DILAVAu vatau doga ale keveo ba talive bele. Momai lamiga seleavei oigelive la dibage ataea aveve toela ai voleali navai sele silava hoeseavale malahaea keateali vole kalevei ata voleali navai tebai oiva. Isege malahae malahaeali tebai oiva kateivale kea ba Otogoe DILAVAu vatavau dogave keveo talivelu bele. 10 La dibage vavoloivale ataea volea hautelu olai moeagavale ataea eu toela ivale ataea volelai dubito toela avale ataea ata seleavei moniabe vavoloai agivale ata kateivalea ba Otogoe vatava dogave ke uvue talivelu bele. 11 La volea memila kateale ava isito la kosive IESU KELISO lovai tige DILAVAu ivivele laele aveve toela uliai la hoeaseavege la nivele nenive ula atau dua olilu. 12 La voleule loui koseai DILAVAu kuva bavue solige dale di ola ai keta duave isito vaveve volea uva. Aveve volea la hoeaseava solivale kea uva aboleto ba loi isi da ola soliale aveve volea daa vage daa olaeabe ke alivelu. 13 Lovi keu gogo vilela keu ige gogo keu lovi vilela keu igeto DILAVAule ke kosai katui isi lailoi vavakou tebau vava olie solilu. Isito DILAVA vilela momai DILAVAu vava ko vai keateali navai okale keu DILAVAu vavala keu. 14 Ige DILAVAu voelele IESU isale kelate aule au siaule lailo isagei. 15 Au la dib solilu lai vava keu IESU KELISOu vavala keu au dale valivelu IESU vava ke lkoveai vai tai tebai oigei? aba ke alivelu bele. 16 Au au diba solilu ata vadeu keate tebate keti tebage keu avoti vudiu misi igalila keu. Bukau loui avoe oleu keate keti nage kea vudiu misi igaliala keu. 17 Isegeto oleu DILAVAti igali toai uge DILAVAu munanau tuvu avoti igali olisi ulau ke alu Otogoe talivelu. 18 Katealelu momai labeu lai kakolou keateti nalive. La aveve vole toela age keu toela kitae olie solilu isito lale aveve vole toela ai ata voleti naige lale kele lai vava vai toela kitaele vaeavave ige au toela atala keu. 19 Au la diba solilu lai vava keu DILAVAu ola munana tuvu ola keu DILAVAu au munana tuvu lamege keu lai uvue ulu dubuvela keu lai vava keu laele olie solilu. 20 Isito DILAVAu vo IESU KELISOu loi voeleai ata data voialu au taota kelu hoeaseavage vali bahata. AMENI.